2 Samuweli 1 - Mazu Otchena a Mulungu

Muzombwe mmohi ohomuwandela Davi zela ukwa wa mwene Sawuli

¹ Sawuli agakwile, Davi agawenlewo kondoni wewo waagondjihile liye aAmaleki, ohokalaga waniwa Zikalagi malambo menli.

² Siku naneraru, ohokalaga muzombwe mmohi azilege akumaga kapamentoni wa mwene Sawuli. Muzombole azilege na jowara jaye jagamanle kauwa eto mmuruni mwaye mwatene mwagali pii na teya. Liye agazile, ohofiyaga vamentoni va mulombwana Davi amukokorelaga momuriheda.

³ Evale Davi agamuonne enne, ohonfukaga muzombole ira: <<Kodi weyo unakuma waani?>> Liye ohowakulaga eraga: <<Miyo ditawile kapamentoni wa aIzarayeli.>>

⁴ Evale Davi ohonfukagave eraga: <<Kadiwandele, kodi iireyilewo nni?>> Evale muzombole ohoromaga muwandela mulombwana Davi eraga: <<Ii, jiireyilewo kahi ja masika. Eni atu kohotawa kondoni, atu adjindji kohokwa. Eto mwene Sawuli vamohi na mwanayene Jonata na aliwene kohokwa!>>

⁵ Evale Davi agavwile enne, ohonfukaga muzombole eraga: <<Kodi weyo uwandile iziwa avi ira mwene Sawuli vamohi na mwanaye Jonata kohokwa?>>

⁶ Evale muzombole amuwandelaga mazwale, ohowongaga eraga: <<Ira miyo diwande iziwa, iireyile eni: Miyo dafwanyeya mwango wa Jilibowa. Miyo dagali wewule, dohonfwanya mwene Sawuli agasamenle mwanango waye, agaporeyile, agahanle vang'ono ira akwe. Eto dohoonaga aterelado vamohi na kavalo da kondoni dagali vakwikwive ira dinfwanye.

⁷ Eto Sawuli againg'anne mundulri ohodiona miyo, liye diitana. Agadiitanne miyo dohorumela ira: <Miyo vano.>

⁸ Evale liye ohodifukaga eraga: <Weyo uli nkuda ani?> Miyo dohomuwakula ira: <Miyo dili nkuda Amaleki!>

⁹ Evale liye ohodiwongana ira: <Kafiya uno, uze udimarihe. Mwasiwa miyo nnoona upa wohokala wa masika eto kannawanda kwa!>

¹⁰ Noira enne, miyo dohofiya vali liye vale, miyo mmariha mwasiwa miyo dohoiziwa ira: <Wenna masiki dimuhiya, kanakalawo.> Dagampile enne, dohotukula tchapowa wa umwene afwanyeya mmuruni mwaye vamohi na purusera neno nali mmuwononi mwaye, miyo zaga wa nyo mbwiyeni. Jengo jiwa ti jeji dizilena miyo ji.>>

¹¹ Mulombwana Davi agavwile jejile ohokawulaga jowara jaye. Eto alombwana atene kali evale, na aliwene kohokawulaga jowara jewa.

¹² Evale kohoromaga kumbanya, kanlaga fiyeda siku natene kahadjileve yengo, kamunlelaga mwene Sawuli na mwanaye Jonata vamohi na atu a Yehova anno kali aIzarayeli kapiwe na supada kondoni ule.

¹³ Noira enne, Davi ohowelela nfuka muzombwe wenno azilege amuwandelaga mazwale, kwi: <<Weyo uli wa uvi?>> Liye ohowakulaga eraga: <<Miyo dili nkuda Amaleki, babaga gu mulombwana mmohi oza ilambo yenna.>>

¹⁴ Evale Davi ohowelelave nfuka eraga: <<Kodi weyo uwandile avi tukula ndanda nawo we mpana mulombwana wenno uhambihiwe na Yehova?>>

¹⁵ Noira enne, Davi ohomurumaga muzombwe mmohi, muwari mwa ale kawenda na liye, kwi: <<Kaza umpe wenna!>> Evale muzombole ohodowa, liye mulata fiyeda muzombole liye kwa.

¹⁶ Muzombole apiwaga Davi ohomuwongana eraga: <<Kalivo unafuna tongiwa zela ukwa wawo. Mwasiwa mulomo wawo guzile hidedela umboni ira: <Na ibaribari miyo gumpile mwene ohambihiwa na Yehova!> >>

Nyumbo ya Davi muwari mokumbanya ukwa wa mwene Sawuli na mwanaye Jonata

¹⁷ Noira enne, Davi ohoumbuwelaga nyumbo, liye romaga imba muwari mokumbanya ukwa wa Sawuli na mwanaye Jonata.

¹⁸ Agaimbile nyumbwele oharuma atwaye ira: <<Mutukule nyumbo ila, mudowe mwaafundjihe atu atene a aJuda.>> Nyumbo yaimbile liye tcheniyo ilrembiwe muwari mwa Livuru na Upama. Nyumbo yaimbile liye inawonga ira:

¹⁹ Amwene ehu anno kafwanyeya kagali wareya wa aIzarayeli peno kohopiwa mwangoni. Anyakondo a kopolo kohogwa.

²⁰ Kamudowe mwawonga sidadi ya Gate nne mmarampani a Ajikelomi zela jiireyile, tawiha ira anamwali a aFilistewu kavwa, anahagalalege. Kamuwongege tawiha ira anamwali a atu ohoineliwa anaze kavwe, karome lupalupa moteyela.

²¹ Nyo mwango da Jilibowa kamukayena ningame, nne kamurumbweliwe muzongwe. Minda dowandamana kadivahe jovaha. Mwasiwa ku wewo ugondjihiwe defeza da anyakondo a kopolo eto ku wewo wagomihedile hambihiwa na makura defeza ya mwene Sawuli.

²² Urwa na Jonata nali urwa nopa, novuviha sangiri, noatolotcha andimuwa a kopolo. Eto supada na Sawuli kanaimwananetcha apa amwidanaye.

²³ Sawuli na Jonata aliwa kali afwihu apama naaziveliwa hiyo. Kahanakwe, aliwa tchamwalana. Eto na ukwa wene kimwalanile. Aliwa kahanakwe kali obaranya kwaranya akakozi eto kali atu a kopolo kwaranya apodogoma.

²⁴ Nyo anamwali a Izarayeli inafwanela mmunlele Sawuli, mwasiwa liye ouwarihetchani jowara joriya jofila eto liye oriyihetcha jowara jenyu na jengo ja oru.

²⁵ Anyakondo olimba murima eto a kopolo kohokwa kondoni. Jonata uli vati okwene mwangoni.

²⁶ Miyo nnounlela weyo, mbalaga Jonata. Weyo wali nfwaga dauziveliwa miyo! Dizivela wawo wali otikiniha. Weyo dizivela wawo wohokwaranya zivela unakana ahiyana.

²⁷ Anyakondo olimba murima kohogwa eto jowanana jiwa ja kondoni jihimala nongeya!