2 Peduru 3 - Mazu Otchena a Mulungu

Za wa Yesu

¹ Afwaga anaaziveliwa miyo, ni ti karta nanembinli dulrembenleni miyo. Muwari mwa makarta amenlene dilrembile miyo, dilrembile ira dulimbiheni muwari mwa ibaribari munna nyo. Dilrembile ira duwumbutchedeni

² ira muwande tulela jengo ja sogolro jawongile anamafiyiheda otchena eto muumbuwelegeve nlamulo na Nabwiya, Nvulusi wehu, nawongile liye muwari mwa anamarumiwa kaulaleyileni.

³ Yengo yoroma inafwanela muiziwe ira malambo ogomiheda kafiyaga, anoza kaoneye atu opokiha anafuna za wongaga jowonga jopokiha muwari mofuna ira kairegena jofuna jewa ja maningo.

⁴ Anerege wonga ira: <<Kodi nipangano naye noira: <Nnoza. Nnoza>, tivi? Liye kanawanda za! Tchoira roma wanle ababihu anakalawo, aliwa kwaga. Jatene jinave ireya nnga mwazela atu kuma mapanduwelo a ilambo.>>

⁵ Kawongaga eno, aliwa anodiwala komove ira wanle Mulugu muwari mowonga bahi ohopandutcha ilambo ya zulu na ilambo ya vati. Anodiwala ira teya youmma ikumile muwari mwa mahindje muwari mowonga bahi. Mowonga bahi kohooneya mahindje wu na teya youmma wu.

⁶ Vagavirile yaka didjindji, ilambo ya vati ya wanle yaliwo yohomala bwinihiwa na mahindje amohive anne fiyeda tolowa.

⁷ Eto Mulugu muwari mowonga waye bahi unokoya ilambo ya zulu na ilambo ya vati jejo jiliwo tchineneva ira vasogolro jitumeyiwe na munlo. Jeji jinafuna jize jiireye siku notonga eto siku nnafuna tolotchiwa atu ohoirana ja Mulugu.

⁸ Mbwenye nyo afwaga anaaziveliwa miyo kamudiwale yengo imohi ya ibaribari. Ona wa Nabwiya, siku nimohi nnakala nnga yaka 1.000. Eto yaka 1.000 unaona nnga siku nimohi bahi.

⁹ Nabwiya kanadodoma ira akwakwanelihede nipangano naye na makalelo nnga atu amohiwa anaumbuwela atu ira unadodoma. So mbwenye Nabwiya wire kala ovilela na nyo, avahaga tempu ira atene katwaruwe mwasiwa liye kanafuna ira mutu atolowe.

¹⁰ Mbwenye siku na Nabwiya nnaza nize nnga mbava azaga. Evale zulu unoza udimele muwari movweya titima wohokala wa masika. Jatene jinafwanyeya zulu jinoja jifiyede dimela, wahakale nne yengo imohi. Eto na ilambo ya vati yenna vamohi na jatene jilimo jinomala tumeyiwa.

¹¹ Mwawanda iziwa ira jatene jene jinoza jinyungulruwe na makalelo anno, inafwanela nyo mukale atu owenda na makalelo otchena, atu oirana ja Mulugu,

¹² mudedihaga siku na Mulugu neno nnafuna za eto mulabege ira siku neno nibaranye fiya. Siku neno nafiya, zulu unoza utumeyiwe eto umale eto ja zulu jinonyungulruwa jijaga.

¹³ Mbwenye nnga mwemo mwapanganne liye, hiyo nili muwari modediha ilambo ya zulu ixa na ilambo ya vati ixa mwemo munafuna kala upama.

Mazu Ogomiheda

¹⁴ Nona afwaga anaaziveliwa miyo, voira nyo muli vari vodediha eji, inafwanela muzuzumelege ira liye azaga, aufwanyeni mwahanna ndamba nari yodugudela eto mwagali opwaseyene.

¹⁵ Mwaona vilela wa Nabwiya, inafwanela muiziwe ira unaavaha atu tempu ira kavulusiwe. Tcheniyo imohive mbalihu Pawulo wenno unamuziveliwa hiyo yulrembenleni liye muwari mwa zelru divahiwe liye.

¹⁶ Muwari mwa makarta matene alrembile Pawulo zela jeji, jikalawo jengo jimohi jiwa jorutcha onelramo. Atu ohoonelramo eto ohowanda imela pama anatukula ja Pawulo jile, aliwa futukulaga nnga vinerana atu na Mazu amohiwa, kavitatamulelaga tolotchiwa.

¹⁷ Nona nyo abalaga anaaziveliwa miyo, muwari moiziwa jatene eji jahanaireye, muviing'anele pama tawiha ira munaze muholowe na joviringaniha jinera atu anno oviringaniha malamulo. Tchoira mwahara joviringaniha jewa, imela muimenle nyo kamunakanave.

¹⁸ So nyo mbwenye muulukulege muwari mwa sayi no onelramo unavaha Nabwiya Nvulusi wehu Yesu Kiristu. Undimuwa watene ukale waye tempu ili hiyo ila fiyeda malambo a mukalakala. Ame! Kukala mazu a karta nanembinli nilrembiwe na Peduru.