2 Peduru 2 - Mazu Otchena a Mulungu

Wendjelihiwa zela anamafundjiha onama

¹ Mbwenye Mulugu agaasogolrenlre anamafiyiheda ira kawongege na aIzarayeli, kohokalawo eto anamafiyiheda amohiwa onama kavennye muwari mwewa. Sawasawa eto zela tempu ili hiyo ila muwari mwa nyo anoza kaoneye anamafundjiha onama anafuna zagana mozembiheya mafundjihelo onama omunonga mutu. Anofiyeda mwezo omuruna Mbwiye wenno aagunle, kavizelena tolotchiwa wewa mobaranya.

² Na mwasa wa jowonga ja atu onamale, atu oindjiva kahara ndila ya ibaribari anoza kahare jofuna jewa ja maningo. Evale ndila ya ibaribari inoza iluluvihiwege.

³ Muwari mofuna mwewa nnga karayele, anoudjelrani muwari mwa mazu onama. Zela atu anno, aliwa kohomala gwana mulandu romanave wanle. Kinakana makalelo ovulumuwa eto wenno unafuna atolotcha unafwanyeya orurumuwene.

⁴ Tchoira wanle kohokalawo angelro kamutegenle Mulugu. Mbwenye Mulugu kaakurumuwenle. Aavokedile angelro ale mmunloni ira kakale wewo omangiwene na makurenti muisini yohokala ya masika fiyeda ora inafuna atu tongiwa.

⁵ Wanle eto ilambo yohozala atu omutegela Mulugu. Mbwenye Mulugu agaonne makalelo anno, kaakurumuwenle. Ohoruma mahindje madjindji ira aatolotche atu a ilambo ya wanle ale. Mbwenye Mulugu ohowanda mukoya namalaleya wa upama unafwanyeya agali Nowe vamohi na atu amohiwa atanu na ambinli.

⁶ Mulugu eto agaonne makalelo a sidadi da Sodoma na Gomora, liye ohotumeya, aliwa fiyeda kala ndorave, gomela evo. Yeniyo yali yofwalrafwaniha zela yenno inafuna aireyela atu ohoirana ja Mulugu.

⁷ Mulugu eto ohonvunela mutu wapama Lroti wenno azuzumetcha na mwasa wa jotakala jatene jairetcha atu abure anno.

⁸ Tchoira mutu wapama Lroti ule, akalaga muwari mwa atu abure malambo matene, liye ozuzumiha kalawo waye wapama na mwasa oona eto ovwa joira joviringaniha malamulo jaira atu.

⁹ Akala jatene ejo Nabwiya ohoirana wanle, ku wonga Nabwiya uhukana makalelo oavunela atu apama anafwanyeya muwari mwa makatamiho eto uhukana makalelo oaoniha goyi atu ohokala pama fiyeda siku notongiwa.

¹⁰ Eto anafuna za simbwa onihiwa goyi bure banno anairana jofuna jewa ja maningo, kavitakalihaga muwari mogonihana burebure. Aliwa eto analuluviha utongi watene. Ba atu ohoova yengo eto ba atu ohovwelela eto anaaluluviha angelro okana undimuwa kahakukumuwaga.

¹¹ Eto fwanyeya ira kohokalawo angelro amohiwa anna iwandelo na kopolo kwaranya anamafundjiha onamale. Mbwenye aliwa masiki kaganna iwandelo na kopolo, aliwa kakala vamentoni va Nabwiya, kinafiyeda wonga mazu oaluluviha angelro afwiwa.

¹² Anamafundjiha onamale mbwenye anakala nnga anavinyama ohoumbuwela yengo, nnga anavinyama oirana jiiziwile atu jokumela mwa jofuna jewa. Kabaliwe ira kahindiwe, amala katolotchiwe. Aliwa anawonga joluluviha zela jengo jahaiziwile atu. Anoza katolotchiwe na mwasa wa jotolotcha jinera atu.

¹³ Anoza kawatchele ubure na mwasa wa ubure unera atu. Anoziveliwa irana jabure jiwa na ntana nene. Aliwa kadjaga pwando yozivelana na nyo anakala nnga madamba nari jodugudela kaziveliwaga jonyenga jinera atu.

¹⁴ Kamuing'anaga mutu oriya, so anaumbuwela jomuraruwana bahi. Aliwa kinawanda tega fiyeda ona ira: <<Ante va nihikwakwana.>> Aliwa mabasiwa ku anyenga atu oholimba. Mmirimani mwewa kalemenle jofuna ira kakayena jorayela pwi bahi. Ba ahima otembelrelreya!

¹⁵ Ndila ya ibaribari kohomala tatila. Kohofiyeda mwezo opupuruwa. Aliwa kaharile ndila imohive yahara mulombwana Balawu mwana Beyori, wenno aziveliwa pa kobiri muwari moirana jengo jabure.

¹⁶ Liye mbwenye ohosumululiwa yoviringaniha yaye na buru ohowanda wonga. Buru ule awongile na nizu na mutu, amuhiyihaga namafiyiheda onama ule ja mihala jaira liye.

¹⁷ Anamafundjiha onama ale anakala nnga isime yohokana mahindje. Anakala nnga ifunga yatamangihiwaga na nipevo nlukulu. Aliwa eto kohokoyeliwa nimburo nnafuna atu kala, nimburo nowopiha, wewo uli isi ilukulu.

¹⁸ Kaaona atu axa karomaga wene atawa afwiwa anairana joviringana, aliwa anodowa anyenga muwari mokuwa na mazu pwi ovitukulela, a uzimora, kaanyengaga ira kairegena joraruwa jinafuna maningo.

¹⁹ Anaanyenga atu muwari mopangana ira: <<Hiyo nnafuna nukutcheni>>, aliwa kagalive azari oirana ubure watene. Tchoira mutu unakala muzari wa yenno imugondjihile.

²⁰ Tchoira aliwa kagamanle tawa jotakala ja ilambo ya vati muwari moiziwa ibaribari zela Nabwiya wehu Yesu Kiristu wenno uli Nvulusi wehu, amala karoma vipitikelrelra muwari mowelela jotakala ejile akoka aliwa fiyeda gondjihiwa, makalelo anafuna atu kana anagomela kala makalelo abure kwaranya makalelo kanna atu kahanaiziwe ja Yesu.

²¹ Tchoira zela aliwa yali yapama kahavwe wene ndila ya upama hiyaniha no roma iziwa ndiliwa kamala welela mundulri kahiyaga malamulo otchena kavahediwe atu.

²² Jaaireyele aliwa ti jengo ja ibaribari jinawongiwa muwari mwa imariya yoira: <<Mwanambwa agaraveyile, unowelela dja maraveyo aye eto nguluwe yagamanle vihuwa, inowelela pingiriya vamadogoni akoka.>>