2 Peduru 1 - Mazu Otchena a Mulungu

Malondjelo a Peduru

¹ Unalremba gu miyo Simawu Peduru, muzari wa Yesu Kiristu eto namarumiwa waye. Nnoulrembelani nyo mwatene muvahiwe ira mukayena nroromelo nnga hiyo muwari mo wongowa wa Mulugu wehu na Nvulusi Yesu Kiristu.

² Malondjelo anaurumihedani miyo ba ala. Difunne ira sayi na murendele jiwendjediwe wa nyo muwari momuiziwa Mulugu wehu vamohi no muiziwa Yesu Nabwiya wehu.

Jozuzumela ja mutu omuroromela Yesu

³ Mulugu muwari mwa kopolo daye uhunivaha jatene jinafuneya ira niwendege na ingumi eto niwendege na makalelo nnga anafuna liye. Vahiwa uwa unazela muwari momuiziwa wenno uniitanne ira nize muwari mwa undimuwa waye na upama unna liye.

⁴ Muwari moza muundimuwani mwaye na muupamani mwaye, liye univaha mapangano aye ofuneya eto ohokala a masika. Ali ira muwari mwa mapangano ale hiyo niwande irana jofuna ja Mulugu nagavuneliwe mwa ubure watene unafwanyeya mwilamboni ya vati ozela jofuna irana jotega.

⁵ Na mwasa oira Mulugu univaha makalelo oirana jofuna jaye, nyo mwaganna nroromelo nenyu, inafwanela muzuzumelege ira muwendjede mawendelo ofwanelela. Mwaganna mawendelo ofwanelela, inafwanela eto muzuzumelege ira muwendjede iziwa.

⁶ Mwaganna iziwa, inafwanela eto muzuzumelege ira muwendjede viwendiha pama. Mwaganna viwendiha pama, inafwanela eto muzuzumelege ira muwendjede vilela. Mwaganna vilela, inafwanela eto muzuzumelege ira muwendjede irana ja Mulugu.

⁷ Mwaganna irana ja Mulugu, inafwanela eto muzuzumelege ira muwendjede airela abalihu upama. Mwaganna airela abalihu upama, inafwanela eto muzuzumelege ira muwendjede zivelana.

⁸ Tchoira akala munowanda irana jatene eji eto akala munowendjedave, ti jeji jinafuna ukamihedani ira mukale atu owanda hinda mabasa, ovaha misapo dapama, mwagalive atu omuiziwa Nabwiya wehu Yesu Kiristu.

⁹ Mbwenye wenno ahanairana ejo, liye mbwenye gu mutu ohoona, so unaona jengo ja vakwikwi bahi. Tchoira liye umala diwala ira jotega jaye jihimala huwiwa wanle.

¹⁰ Nona abalaga inafwanela muzuzumelege ira ioneye ira mwa ibaribari muli atu oitaniwa, atu osakulriwa. Tchoira mwairaga eno, kamuza mugwagwaduwa.

¹¹ Eto muwari mwa eno, tempu yafiya munohuleliwa eto munowatcheliwa na manda menli ira muvolowe Umwene ohomala wa Yesu Kiristu wenno uli Nabwiya wehu na Nvulusi wehu.

¹² Nona miyo nnafuna nnga diiregeve uwumbutchedani japama ji, masiki nyo mwagamanle iziwa jatene eto mwagalive oimelene muwari mwa ibaribari inna nyo.

¹³ Nnaona ira tchi yengo yofwanela duwumbutchedeni eji ira dulimbiheni dagalive muwari mwa maningo dahanakwe.

¹⁴ Mwasiwa Nabwiya wehu Yesu Kiristu udiwandela mohokayikela ira: <<Weyo tchineneva unowungula maningwawo.>>

¹⁵ Mbwenye miyo eto nnerege uzuzumelanive ira dadowa, nyo mwahala, muwande umbuwela eji ora ili yatene.

Ibaribari inahara hiyo inakuma mMazuni

¹⁶ Tchoira hiyo nuuwandelagani zela kopolo da Nabwiya wehu Yesu Kiristu nari nuuwandelagani zela mazelo aye, kahi ira nahara anatchitwa ohokana mabasa osakanyediwa na uyesa, nari. Mbwenye nawonga mwasiwa undimuwa waye nohoona na meso.

^17-18 Tchoira nagali vamohi na Yesu vazulu va mwango otchena ule, Yesu ohoteteliwa eto ohovahiwa undimuwa na Mulugu Baba muwari mwa nizu nokumela wa Mulugu Okana Undimuwa Watene nazile niiraga: <<Ula gu Mwanaga unamuziveliwa miyo, wenno unadihagalaliha.>> Na hiyene nohovwa nizu nokumela zulu nne.

¹⁹ Hiyo muwari mwa jejile javwile hiyo, nnowanda kana ibaribari ira mazu a anamafiyiheda ba a ibaribari. Nyo mwavuruwana mazwale, muhusakanya pama. Tchoira mazu a anamafiyiheda anakala nnga panti yomoneya nimburo na isi. Aneregeve moneya fiyeda siku nnafuna unde tcha eto Nikoroxo nivenye mmirimani mwenyu.

²⁰ Mwa jatene eji yengo yoroma inafwanela muiziwe ira kavali mazu ofiyihediwa kakumile muwari moonelramo wa mutu eka nari.

²¹ Tchoira mazu ofiyihediwa kikumile muwari mofuna wa mutu, nari. So mbwenye atu kawonga mazu a Mulugu muwari mosogolrelriwa na Munemba Otchena, hiya mofuna mwewa.