2 Korinto 8 - Mazu Otchena a Mulungu

Jokokomeza ira aKorinto kaakamihedege afwiwa kasimenle

¹ Hiyo abalihu nnafuna nyo muiziwe zela sayi da Mulugu dedo daavahile liye makuru a atu omuroromela Yesu a Masedoniya.

² Sayi diwa tchoira masiki aliwa kagalive muwari moxixiwa na makatamiho ohokala a masika eto kagali muwari mosimela undimuwa, aliwa kohowanda akamiheda afwiwa mohagalala.

³ Miyo eto nnoahidedela umboni ira aliwa kohowanda velela na makalelo okwaranya, moholingana na jengo janna atu. Velela uwa, kohovelela na mmirimani mwewa mwatene,

⁴ aliwa nivepaga na ntindi ira: <<Na hiyene nnafuna nigumanele na afwihu anafuna soka kobiri ira niwande akamiheda afwihu otchenihiwa kasimenle.>>

⁵ Yeniyo eto tchairilena na makalelo mwaumbuwela hiyo. Aliwa mbwenye karomile vivaheda mmandani mwa Nabwiya. Nomala eno, muwari mofuna mwa Mulugu, aliwa za vivaheda mmandani mwihu.

⁶ Wanle Titu ohouwandelani zela ja sokasoka ji. Eto fendo ila vamaruwa liye azaga wewo, hiyo nohonvepa ira aukokomezegenive ira mukwakwanelihede zela sayi doakamiheda afwihu.

⁷ Nyo muli atu a nroromelo, muhuiziwa wonga pama, muli atu okana zelru eto muli atu oirana japama. Voira jatene ejo munoirana pama, inafwanela nyo atu anaazivela hiyo mulabe pama zela jovahana ji.

⁸ Miyo dawongaga eni, kahi ira nnaurumani. So miyo nnawongela ira mwagaonne upama unera afwinyu a Masedoniya, na nyenne mulimbihiwe muwari movaha ira zivela wenyu uoneye ira kwa ibaribari.

⁹ Tchoira nyo muhuiziwa sayi da Nabwiya wehu Yesu Kiristu. Liye masiki alive orayela, osanduwa, liye kala osimela ira nyo muwari mosimela mwaye, muwande rayela.

¹⁰ Nnafuna dukokomezeni onamo waga zela jovaha ji. Miyo nnaonamo ira inafwanela muvelele mwasiwa nyo mwali arandji soka yaka ile eto hiya kala arandji soka bahi, nyo eto mwali ofuna velela na mmirimani mwenyu mwatene mofuna mwenyu. Mabasa anno anairana nyo pakana peno, ba mabasa anafuna upindulrani.

¹¹ Mwa eno, inafwanela mudowegenave musogolro ante mufiyede mariha yofuna yenyu yanna nyo voroma vene hiya gomela vari. Malringana muvahe muwari mwa yenno inna nyo.

¹² Tchoira mutu afuna vaha na mmirimani mwaye yengo inna liye, yovaha yofwanela tcheniyo inavaha liye na mmirimani mwaye zela vigomenle liye. Mwasiwa kalivo unakosiwa yengo yahanna liye.

¹³ Dawongaga eno, kannawonga ira afwinyu kawande kala pama, nyo aliba akamiheda mukukumuliwe, nari.

¹⁴ So mbwenye miyo nnawonga muwari moira kana unna nyo tempu ila uvunguwe vang'ono muwari moakamiheda ira atene mukale okanene. Eto na aliwene kaza kakana sogolro, kawande ukamihedani ira atene mukale okanene.

¹⁵ Kalaga nnga mazu kalrembiwe wanle oira: <<Wenno agudile pwi, apima, kajakalawo johala eto wenno agudile vang'ono, apima, kajahalela.>>

Pawulo ohawandela aKorinto zela atu kafuna dowa kaapande

^16-17 Hiyo nihiwonga na Titu tchineneva ira awelele wa nyo akoka. Liye uhurumela vepa wehu ira aze aupandeni. Hiya vepa wehu bahi, liye unavenya ira aupandeni na mmirimani mwaye mwatene. Nona Mulugu atamaleliwe, na mwasa oira liye gunvahile zelru mulombwana Titu ira akayena funafuna ukamihedani nnga funafuna unna miyo.

¹⁸ Hiyo eto nnomuruma mbalihu mmohiwa ira adowe vamohi na Titu. Mulombwana unafuna hiyo muruma gwenno usimbwile iziweya muwari mwa makuru matene a atu omuroromela Yesu zela laleya waye wa Muselu Wapama.

¹⁹ Hiya laleyave, liye gwenno makuru a atu omuroromela Yesu kamusakunlre atu ira awende vamohi na hiyo ulrendo wehu odowana josokasoka jinasogolrelra hiyo. Nnasokela ira Nabwiya mwinnya atitimihiwe eto ira naaonihe afwihu zela zivela wehu.

²⁰ Jatene eji nnerela ira ahakalevo mutu unafuna niwanganyeda zela yovaha yapama inasogolrelra hiyo.

²¹ Tchoira hiyo kannafuna irana yapama vamentoni va Nabwiya bahi gomela eno. Nnafuna eto niirena yenno ili yapama vamentoni va atu.

²² Hiyo eto nnomuruma mbalihu mmohiwa ira aze vamohi na afwihu ambinli ayo. Liye gwenno ninvahile hiyo mabasa fendo didjindji, hiyo muonaga ira gu mutu oirana ja Mulugu muwari mwa jatene. Liye agavwile zela makalelo munna nyo, funa waye oirana ja Mulugu unadowave sogolro.

²³ Zela Titu, liye gwenno unalabetcha vamohi na miyo ira nyo mukale pama. Zela abalihu amohiwa ambinli ala, aliwa ba atu orumiwa na makuru a atu omuroromela Yesu. Aliwa eto anafwanyeya kagali aliba oniha undimuwa wa Kiristu.

²⁴ Inafwanela mwaairelege alombwana anno upama ira kawelela wa makuru a atu omuroromela Yesu, kawonga upama wenyu, afwiwa kakayena ibaribari zela zivelana wenyu eto kakayena ibaribari zela mwasa unautitimihanani hiyo.