2 Korinto 3 - Mazu Otchena a Mulungu

Akuda Korinto kafwanyeya kagali karta na aPawulo

¹ Kodi hiyo nawongaga eni, nnavitetela akoka vamentoni venyu? Kodi ira nyo munirumele, inafuneya ira hiyo nikayena makarta onihidedela umboni nnga vinera atu amohiwa ira kawande roromeliwa? Owu hehi ira atu amohiwa kanirumele, kodi inafuneya hiyo nikayena makarta onihidedela umboni okumela wa nyo? Nari.

² Tchoira karta ninna hiyo nonihidedela umboni, gu nyenne. Nyo muli karta nilrembiwe mmirimani mwehu, neno nnaiziweya eto nnaileriwa muwari mwa atu atene.

³ Nyo munaoneya nnga karta nokumela wa Kiristu, neno nivahediwe hiyo. Eto kamuli karta nolrembiwa na tinta, mbwenye muli nnga karta nolrembiwa na Munemba wa Mulugu Okalawo, neno nahalrembiwe vamabweni osemiwa nnga matabwa, mbwenye nolrembiwa mmirimani.

Pawulo ohiyaniha Yopangana Ixa na Yopangana ya Wanle

⁴ Hiyo muroromela Mulugu wehu unazela muwari mwa Kiristu.

⁵ Kahi ira hiyo nihikana iwandelo yolaba mabasa anno muwari mwa hiyo oka, owu mwa kopolo dehu, nari. So mbwenye unaniwandiha gu Mulugu.

⁶ Liye gunivahile iwandelo ira nikale anamalaba a Yopangana Ixa yenno inalaba muwari mwa Munemba hiya yolremba. Tchoira yolremba inopa mbwenye Munemba unavaha ingumi.

^7-8 Mabasa ozana ukwa kazaga kalrembiwe vamabweni osemiwa, Mozeji liye watchela. Mabasa anno ozana ukwa kohoza na undimuwa fiyeda Ana Izarayeli aliwa imwanana ing'ana wintoni wa Mozeji na mwasa wa undimuwa wafwanyeya wintoni waye na mwasa oka makalelo ojerimela. Eto fwanyeya ira jerimela wa wintoni waye wohototowa. Akala mabasa a ukwa kohokana undimuwa, kodi mabasa a Munemba kinakana undimuwa wokwaranya? Anokana.

⁹ Tchoira akala wohokalawo undimuwa muwari mwa mabasa ozana mulandu, mabasa omukaliha mutu wapama vamentoni va Mulugu undimuwiwa unafuna ukale undimuwa wokwaranya.

¹⁰ Tchoira na ibaribari yenno yanna undimuwa malambo a mundulrimu peno kinna undimuwa mwasiwa ukala undimuwa uzile wokwaranya.

¹¹ Tchoira akala yenno yafuna mala yohoza na undimuwa, na ibaribari yenno yahanamala inokana undimuwa kwaranya.

¹² Muwari moira nihikana yodediha yozela undimuwa wokwaranya, nona nnawenda molimbiha murima.

¹³ Kanili nnga Mozeji wenno ahenle yokunelana kove yaye ira Ana Izarayeli kahaone undimuwa wokumela yengo yoing'anela mala.

¹⁴ Mbwenye aIzarayeli kafwanyeya kagali ovanda onelramo. Nona fiyeda peno, kailerigi mazu a Yopangana ya Wanle, onelramo wewa unakala okuneleya wene na nguwo yavikunenlena Mozeji ile. Kinawanda onelramo, mwasiwa yokunelana ile inawanda kumihiwawo muwari mwa Kiristu bahi.

¹⁵ Fiyeda ante peno eni aliwa kailerigi mazu kalrembiwe na Mozeji, ikalawo yokunelana inakunela mmirimani mwewa.

¹⁶ Mbwenye mutu arungunuwa, adowa wa Nabwiya, yokunelana ile inokumihiwawo.

¹⁷ Fwanyeya ira Nabwiya gu Munemba eto uli Munemba wa Nabwiya, ku wewo unafwanyeya kutchiwa.

¹⁸ Hiyo atene eto muwari moing'ana undimuwa wa Nabwiya kove dihu dagali dohokuneliwa dene nnasandutchiwa ira nikayena makalelo amohive, hiyo sanduwaga vang'ono vang'ono kwivelagave undimuwa unna liye. Jatene eji jinakumela wa Nabwiya wenno uli Munemba.