2 Korinto 2 - Mazu Otchena a Mulungu

¹ Tchoira dagaupandileni, muwari mwa upa wanna hiyo, miyo dohoumbuwela ira: <<Miyo kannawelela dowa apanda akuda Korinto tchineneva tawiha ira miyo vamohi na aliwa nnaze nione upa akoka.>>

² Tchoira dauonihani upa, nnga unafuna dihagalaliha bani ahali nyenne duonihileni miyo upa?

³ Evale paulrembelani miyo karta. Ira dilrembe na makalelo nnga mwalrembele miyo, ali ira dagazile, dahawande ona upa muwari mwa nyo mufwanenle dihagalaliha. Tchoira miyo dohokana ibaribari ira hagalala waga wafuna ukale hagalala umohive wafuna kana nyo mwatene.

⁴ Tchoira miyo daulrembenleni muwari mokukumuwa, muwari mokana zuzuma wohokala wa masika mmirimani mwaga eto muwari mwa misodi didjindji. Mbwenye miyo dulrembelagani kaali ira duzuzumiheni mmirimani mwenyu, nari. Ali ira muwande iziwa zivela undimuwa unna miyo zela nyo.

Pawulo ohakokomeza aKorinto ira kaonihe zivela wewa zela wenno ategile

⁵ Eto akala ukala mutu atatamunle upa, mutuyo mbwenye kadionihile upa miyo. Ira dahawonge mosimbulela, nnawonga ira liye auonihileni nyo mwatene upa.

⁶ Zela mutu wenno, malringana matongelo a nyo anamwindji mwamutongele nyo, kohokwakwana matongelo anno.

⁷ Eto inafwanela muwande rungunuwa ira mmulevelele eto mmulimbihe tawiha ira kumbanya waye unamusimbwele.

⁸ Nona miyo nnouguzelani mendo ira muirena yengo ira liye aiziwe ira: <<Afwagala anodizivelave nnga veretcha atu.>>

⁹ Tchoira miyo para ulrembelani mazu malambo a mundulrimu, ali ira duxixeni, diiziwe akala nyo muli atu ovwelela muwari mwa jatene.

¹⁰ Mutu uli watene unamulevelela nyo, na miyene dihimala mulevelela. Eto yengo ili yatene ilevelenle miyo, akala ikala ilevelenle miyo, dilevelenle vamentoni va Kiristu ira nyo mukale pama,

¹¹ tawiha ira nnoza ninyengiwe na Satana. Tchoira nihimala iziwa malrango aye.

APawulo kamwada nukela wa Kiristu

¹² Dagadowile Toroyade ira dilaleye Muselu Wapama zela Kiristu, Nabwiya ohula musuwo ira dilaleye.

¹³ Masiki eno, miyo mmirimani mwaga kadawandile pwaseya na mwasa oira kadamuonne mbalaga Titu wewo. Evale miyo dohahiya akuda Toroyade ale, miyo kwaranyavo ante Masedoniya dimusakaga Titu.

¹⁴ Mulugu mbwenye atamaleliwe na mwasa oira unonisogolrelretcha ira niwendege nnga aliba gondjiha muwari mwa Kiristu. Eto muwari mwa hiyo, Mulugu unomwada nukela wapama mwatene mwene. Nukela uwa unamwada hiyo tchi ibaribari zela Yesu.

¹⁵ Tchoira hiyo nawendaga muwari mwa ale anavulusiwa nari muwari mwa ale anadimela, nnafwanyeya nagali nukela wa Kiristu vamentoni va Mulugu.

¹⁶ Zela ale anadimela, hiyo nili nukela wa ukwa. Mbwenye zela ale anavulusiwa hiyo nili nukela wa ingumi ozela ingumi inafuna atu kana. Kodi mutu guvi unna iwandelo yolaba mabasa anna omwada nukela wa Kiristu?

¹⁷ Unawanda gu hiyene mwasiwa hiyo kannawonga mazu a Mulugu muwari mofuna watchela kobiri nnga jinaira atu adjindji. Hiyo mbwenye nnawonga mazu a Mulugu vamentoni vaye muwari mwa Kiristu nagali eto atu a ibaribari, orumiwa na Mulugu.