2 Korinto 10 - Mazu Otchena a Mulungu

Mazu otanda muselu wa kapitulu 10 na 11 Pawulo ohawandela ibaribari aKorinto zela makalelo aye

^1-2 Nyo munaona ira miyo Pawulo dakala na nyo nnakaletcha mutu oviyeviha, mbwenye dakala olapela wene, dalrembaga karta, nnalremba nnga mutu orutcha. Miyo mbwenye nnafuna duvepeni ira mwaumbuwela pwaseya na tangaranga da Kiristu, daza wa nyo kamukayena makalelo oira daona, dikale mutu orutcha wa nyo. Mwasiwa dihikana ibaribari ira daza, nnokala orutcha zela atu anne anaumbuwela ira hiyo nnalaba na kopolo da maningo.

³ Tchoira masiki niwendege na maningo, hiyo mbwenye kannawana na kopolo da maningo.

⁴ Tchoira jowanana jinna hiyo kahi jowanana ja maningo, mbwenye ti jowanana jinna kopolo da Mulugu dowanda gondjiha mabazi a Satana.

⁵ Hiyo nnotolotcha jowonga na zelru dovitukulela datene nnalabana atu kaahiyihaga afwiwa ira kahaiziwe ibaribari ya Mulugu. Hiyo nnogondjiha youmbuwela ili yatene ira ikale yonvwelela Kiristu.

⁶ Mbwenye vwelela wenyu wakala wokwakwanela, hiyo nnokala okozeyene ira nivirege muwari mwa nyo, nitongege yohovwelela ili yatene inafwanye hiyo.

⁷ Nyo munaing'ana makalelo kanna atu undeve bahi. Akala ukala muwari mwa nyo mutu unawanda wonga ira: <<Miyo dili wa Kiristu>>, inafwanela aumbuwele eto ira: <<Sawasawa nnga miyo dili wa Kiristu, na aPawulo anne ba a Kiristu.>>

⁸ Akala dawongaga eno nnasimbwa vititimiha zela utongi wehu, miyo kannanyaswa. Tchoira Nabwiya univahile utongi oira nuulukuliheni, hiya ira nutolotcheni.

⁹ Kamuumbuwele ira miyo nnalremba makarta ira mudiovege.

¹⁰ Tchoira miyo nnovwa atu anawonga ira: <<Makarta analremba Pawulo bonyemela, bokana kopolo. Mbwenye wamuona mutuwa, govuta. Awongaga, jowonga jaye ti jowonga jolramwiseya.>>

¹¹ Inafwanela mutu wenno unaumbuwela ejo, aiziwe ira jinawonga hiyo mukartani nagali olapela wene, vamohi na jejo jinawonga hiyo nagagumanne na nyo, ti jimohive.

¹² Hiyo kannakukumuweletcha jovisakulrelra vamohi na jovihiyanihaga na atu amohiwa kalaga nnga jejo jinakukumuweletcha atu anno anavikalihetcha nnga atu ohokala a masika. Aliwa mbwenye kavipimaga oka oka, kavihiyanihaga oka oka, kiiziwile inera atu.

¹³ Hiyo kannavititimiha kwaranyiha marka. So nnavititimiha zela mabasa olaleya, Mulugu univahile liye bahi. Tchoira muwari mwa mabasa ehu olaleya Mulugu univahile liye, nihiwanda fiya wa nyo.

¹⁴ Nona navititimiha zela ulaleyani wehu, kahi ira nihikwaranyiha marka, tchoira oroma ulaleyani Muselu Wapama wa Kiristu ali hiyene.

^15-16 Hiyo kannakwaranyiha marka, hiyo roma vititimihaga zela mabasa alabile atu amohiwa. So yofuna yehu ili ira nroromelo nenyu niulukule ira mabasa naromile hiyo laba muwari mwa nyo kadowegeve sogolro. Era eno hiyo nnowanda dowa laleya vilambo dimohi diwa nnafwanyeya olapela wene na nyo. Nairaga eno kannafwanyeyana vititimiha zela mabasa alabile afwihu amohiwene.

¹⁷ So mbwenye mutu wenne unafuna vititimiha, avititimihe muwari mwa Nabwiya.

¹⁸ Tchoira mutu olaba pama kahi wenno unavititimiha ekave, mbwenye gwenno Nabwiya unamurumela liye nnga mutu olaba pama.