2 Amwene 4 - Mazu Otchena a Mulungu

Elizewu ohowendjeda azeti wa makwele mmohi wa muhiyana

¹ Ohokalawo makwele mmohi eni wa muhiyana. Marafula mamunaye ali muwari mwa asempuru a anamafiyiheda. Muhiyanole ohozaga, awongaga mokumbanya na Elizewu eraga: <<Miyo mamunaga, namalaba wenyu uhukwa. Eto nyo muhuiziwa ira namalaba wenyu ali mutu omuova Yehova. Liye agakwile, ukalawo mulombwana wenno nanfiyarile hiyo kobiri uzile ira anikose. Voira miyo kadinna yengo, liye unafuna aatukule ahimaga ambinli ira kakale azari aye.>>

² Evale Elizewu ohonfukaga eraga: <<Nnga wafuna ira miyo duirele nni? Kadiwandele inna we vande!>> Evale muhiyanole ohowakulaga eraga: <<Miyo namalaba wenyu vande kadinnavo yengo, so dinna garafwa na azeti nimohi bahi!>>

³ Evale Elizewu ohowonga eraga: <<Kavenya udowe wa amwandamanawo, wabolihe jombwe mohokala yengo. Eto jombwe jiwa jiindjive.

⁴ Wamala boliha jombwe jile, udowe wavolowe mmba vamohi na ahimawo, ufunge musuwo. Era eno urome miminela azeti ule mujombweni mule. Yombwe yazala, uhelege wewa wene.>>

⁵ Evale muhiyanole ohovenyaga vamentoni va Elizewu vale, liye dowa boliha jombwe. Nomala enne, ohozaga, liye volowa mmba mule vamohi na ahimaye, aliwa funga musuwo. Evale ahimaye ale kozana jombwe, liye zalihaga na azeti.

⁶ Mwa enne jombwe jabolihile atu jile jagamanle zala jatene, muhiyanole ohomuwongagana mwanaye mmohi, liye ira: <<Kadivahe yombwe imohiwa.>> Mbwenye mwanaye ule ohomuwakulaga eraga: <<Kiliwo yombwe imohiwa yohala.>> Noira enne, azeti ule ohopararigi.

⁷ Noira enne, muhiyanole ohodowaga muwandelamo mutu wa Mulugu ule. Agamuwandenle, mulombwana Elizewu ohowongaga na liye eraga: <<Udowe wagulihe azeti uyo, udowe wapagalri mangawa unna we. Era eno wagamanle pagalri mangawa matene, kobiri inahale inerege ulaba weyo vamohi na ahimawo.>>

Muselu wa muhiyana wa nkuda Sunemi mmohi na mwanaye

⁸ Siku nimohi niwa mulombwana Elizewu ohodowaga tatamo ya Sunemi. Agadowile wewule, ohokalawo muhiyana mmohi orayela azilege amukanyihedaga Elizewu eraga: <<Ndoweni vande vaga ira mudowe mwadje.>> Mwa enne, mulombwana Elizewu fendo datene davira liye wewule, operuwetcha vande va muhiyanole, liye djaga.

⁹ Noira enne, muhiyanole ohomuwandelaga mamunaye, liye ira: <<Miyo nnaona nnga mulombwanole unaviretcha uno gu mutu osakulreya wa Mulugu!

¹⁰ Inafwanela nimusakanyele mwana kwartu yaye nimburo na zulu wa nyumba yehu ila ira liye akalegemo. Nimusakanyele kamaye na mezaye vamohi na kaderaye vamohi na panti. Era eno fendo datene nnazege liye, unerege dowa agonege wewule.>>

¹¹ Mwa enne siku nimohi Elizewu agazile, ohodowaga kwartu yenne, liye gonanti.

¹² Elizewu ohomuwongana muzombwe waye aitaniwa Jeyazi, liye ira: <<Kamuitane muhiyanole.>> Muhiyanole agazile, liye oimela ha vale.

¹³ Evale Elizewu ohomuwongana muzombwe ule ira: <<Udowe wawonge ira: <Weyo unonizuzumela valukulu muwari monilaba hiyo. Nnga hiyo nuirele nni? Akala uhukana yengo inaukatamiha miyo podi didowe dawonge na mwene, nari na musogolrelri mundimuwa wa anyakondo.> >> Mwa enne namalabaye Jeyazi ule ohodowaga, liye nfuka muhiyana wa Sunemi ule. Mbwenye muhiyanole ohomuwakula ira: <<Miyo kilivo inadikatamiha, nari. Tchoira miyo nnovwanana pama na atu a nlogo naga.>>

¹⁴ Noira enne, Elizewu ohowongaga na namalaba waye Jeyazi ule, liye ira: <<Nnga muhiyanola nnafuna nimuirele yengo nni?>> Evale Jeyazi ohowakula, liye ira: <<Muhiyanola kanakayena mwana eto mamunaye uhumala ulula.>>

¹⁵ Mwa enne Elizewu ohomuwongana, liye ira: <<Kamuitane.>> Muzombole agadowile muitana, muhiyanole ohozaga, liye imela va mulango.

¹⁶ Evale Elizewu ohomuwandelaga eraga: <<Yaka ya metchelo, mwedi nnga wenna, unomukana mwana wa mwanapongwe mmandani mwawo.>> Evale liye ohowakulaga eraga: <<Mbwiyeni, nyo muli mutu wa Mulugu, kamudinyenge miyo namalaba wenyu.>>

¹⁷ Jagaireyile enne muhiyanole ohokana vambani. Tempu yawongile Elizewu ile yagafiyile, liye ohombala mwanapongwe, nnga mwawongele Elizewu.

Elizewu ohonvenyiha mokwani muhiyana wa Sunemi mwanaye

¹⁸ Mwanole agaulukunle, siku nimohi ohodowaga wafwanyeya babaye wewo wali liye na anamahanda.

¹⁹ Mwa enne agali wewule, morurumutcha ohoromaga muitana babaye mokuwa eraga: <<Dihikwa, Babani, murula dipa kahi masika!>> Evale babaye ule ohomuwongagana namalabaye mmohi, liye ira: <<Kamutukule, unvelele wa mmaye.>>

²⁰ Evale namalabole ohomutukulaga mwanole, mudowagana wa mmaye. Evale mmaye ohomutukulaga muhela mmandani mwaye. Ante fiyeda midiya mwanole ohokwa.

²¹ Noira enne, muhiyanole ohomutukulaga mwanole, liye dowa mugonantiha vakamani va mutu wa Mulugu ule. Evale ohonfungelaga emule, liye kuma.

²² Agakumile, ohomuitanaga mamunaye, liye muwandela eraga: <<Mmurume namalaba mmohi tchineneva, atukule buru mmohi ira adivelele wa mutu wa Mulugu, didowe dawonge na liye eto diwelewo mobaranya.>>

²³ Mamunaye ule ohowakulaga eraga: <<Kodi mwasiwa gwa nni funaga jodowa wa liye peno? Tchoira peno kahi siku na pwando ya mwedi muxa, nne kahi sabado.>> Evale muhiyanaye ule ohowakulaga eraga: <<Kamukukumuwe.>>

²⁴ Noira enne, muhiyanole ohelihaga yogaratela vaburuni vaye, liye gwelavo eto liye muwandela namalabaye mmohi eraga: <<Kavenya utamangihege burula mobaranya. Umukukihe pama fiyeda vanafuna miyo uwandela ira uimele.>>

²⁵ Evale muhiyanole ohomaruwaga, liye roma muhara mutu wa Mulugu ule, ante liye fiyeda nfwanya mwango Karimelo. Mwa enne Elizewu agamuonne muhiyanole olapela wene azaga, ohomuwandelaga namalabaye Jeyazi eraga: <<Kaing'ana! Muhiyana nkuda Sunemi ule unaza.

²⁶ Katamanga, wangumanena eto unfuke akala liye na mamunaye, vamohi na mwanaye kali apamene.>> Evale namalabole agadowile, aganfukile, muhiyanole ohowakula, liye ira: <<Nari, hiyo atene nili apamene!>>

²⁷ Evale muhiyanole agafiyile wa Elizewu vamwangoni, ohodowaga, liye kumbarela manyalo a Elizewu. Mwa enne Jeyazi, namalaba wa Elizewu ule, ohodowaga ira amukumihevo muhiyanole vamanyaloni va Elizewu vale. Mbwenye mutu wa Mulugu ule ohowongaga eraga: <<Kamuhiye, tchoira liye uhukana kumbanya ulukulu mmirimani mwaye. Mbwenye Yehova uhudikuwa, kadiwandenle imukumbanyihile.>>

²⁸ Evale muhiyanole ohowongaga eraga: <<Kodi mbwiyeni miyo dohouvepani mwana? Kodi miyo kadawongile vale ira: <Kamudinyenge.>?>>

²⁹ Evale mulombwana Elizewu ohomuwandelaga Jeyazi eraga: <<Kavenya tchineneva ukozeye. Utukule nkogozo waga, umaruwe, udowe wa mwanoyo. Mbwenye wadowaga mundila kunongege tempu waalondjelaga atu. Eto mutu aulondjela, kumuwakule. Wafiya, wahele nkogozo waga ula vakoveni va mwanole.>>

³⁰ Mbwenye mwanole mmaye ohowongaga na Elizewu eraga: <<Miyo nnawonga vamentoni va Yehova eto nnawonga vamentoni venyu ira nyo mwahala, miyo kannauhiyani.>> Evale na Elizewu wenne ohovenyaga, aliwa dowaga vamohi na muhiyana wenne.

³¹ Eto Jeyazi ohotukulaga nkogozo wa Elizewu, liye sogolra. Agadowile, ohotukulaga nkogozo ule, liye dowa hela vakoveni va mwanole. Mbwenye mwanole kawongilege nne kilivo yengo ili yatene yaireyilege. Noira enne, liye ohomaruwaga, liye za nfwanya Elizewu, liye muwandela eraga: <<Mwanole kavenyile!>>

³² Elizewu agafiyile vande vale, anfwanyile mwanole agali okwene vakamani vaye.

³³ Mwa enne liye ohovolowaga mmba mule, liye vifungela emule na mwanole. Noira enne, oholobelaga wa Yehova.

³⁴ Noira enne, ohovenyaga, liye mugonantela mwanole, liye tukula mulomo waye dowa gumaniha na mulomo wa mwanole eto meso aye liye gumaniha na meso a mwanole eto mandaye, liye dowa hela vazulu va manda a mwanole. Evale maningo a mwanole kohoromaga kaha akoka.

³⁵ Noira enne, Elizewu ohovenyaga, liye roma wendawendaga mmba emule. Evale ohowelela mugonantela mwanole, liye mala vitapula vazulu va mwanole mwakoka mwene. Noira enne, mwanole ohowetchemulaga fendo tanu na mbinli. Mwa enne ohogudubulraga meso.

³⁶ Noira enne, Elizewu ohomuitanaga namalaba waye Jeyazi, liye muwandela eraga: <<Kadowa wamuitane mmaye aze uno.>> Evale ohodowa muitana, liye za wa Elizewu. Agazile, Elizewu ohomuwandelaga eraga: <<Mwanawo ula, umutukule.>>

³⁷ Evale muhiyanole ohozaga, liye kokora vamanyaloni va Elizewu aoramihaga muru waye ante fiyiha vati. Noira enne, ohomutukulaga mwanaye ule, liye kuma.

Elizewu ohokumihamo yopa yafwanyeya mpanelani

³⁸ Elizewu ohowelelaga Jiligali. Mwa tempu yenne Jiligali wohokala ndala ilukulu. Fwanyeya ira siku nimohi kohokalawo asempuru a anamafiyiheda kagaratilege evo vafwanyeya Elizewu. Mwa enne Elizewu ohomuwandelaga namalabaye eraga: <<Katukula panela indimuwa uhele veko ira upiye sopa para asempuru ala kadje.>>

³⁹ Mwa enne muwari mwa asempuru ale, mutu mmohi ohovenyaga, liye dowa mukokolani ira adowe avende matamba. Mbwenye agadowile wewule, ohofwanyaga muratchi eni oramba anna jovaha jiwa nnga mangu a mukokolani. Mwa enne ohatchaga, liye zaliha vakapani vaye, liye zana vande. Agazilena, ohogwadanyaga, liye gumaniha na matamba ale, liye piya mpanelani mmohive emule. Mbwenye jovaha jejile, kalivo aiziwile.

⁴⁰ Jagaitwile, kohokumihamo vang'ono ira atwale kadje. Mbwenye aliwa kagalawihile, kohowongaga keraga: <<Andimuwa, mutu wa Mulugu, mpanelani mu muhukala yengo yopa!>> Mwa enne tchawandile dja.

⁴¹ Mbwenye Elizewu ohowongaga eraga: <<Kadowelani utu, muzena!>> Kagazilena, Elizewu ohotukulaga utule, liye hela mmatambani mule, liye kwi: <<Katukulani murome agawela atu.>> Mwa enne mpanelani mule yopa yafwanyeyagamo yohokumagamo.

Indjivihiwa wa pawu

⁴² Noira enne, ohokalawo mulombwana mmohi akumilege tatamo ya Bali-Salisa. Azaga, ohozagana pawu 20 dosakanyiwa na sevada oroma handiwa, vamohi na mangala amohiwa a sevada mutiti, liye nvaha mutu wa Mulugu wenno unafwanyeya agali Elizewu. Elizewu ohomuwongana namalabaye ira: <<Katukula jeji waavahe atu ira kadje.>>

⁴³ Evale namalabaye ohowakulaga, liye ira: <<Kodi makalelo bavi anafuna miyo agawela alombwana 100 ira kadje kakwakwane?>> Evale Elizewu ohomuwakulaga, liye ira: <<Kadowa waavahe atu ira kadje. Tchoira Yehova unawonga ira: <Atu anodja kafiyede rumbala eto jodja jihale!> >>

⁴⁴ Evale namalabole ohodowaga, liye avaha atwale aliwa dja, aliwa rumbala, fiyeda jodja jile hala nnga mwemo mwawongele mazu a Yehova.