2 Amwene 3 - Mazu Otchena a Mulungu

Tonga wa mwene Jorawu

¹ Mwene Jozafa agamanle yaka 18 aatongaga aJuda, tchi tempu Jorawu mwana Akabe aromile liye atonga aIzarayeli sidadi ya Samariya. Jorawu atongile yaka kumi na mbinli.

² Liye ohosakanya jabure vamentoni va Yehova. Mbwenye ubure waye kwasimbwile fiyeda nnga wa babaye nari ubure wa mmaye. Tchoira liye ohobwanyula ikwamutu yosema ya Baali yenno yasakanyile babaye.

³ Masiki eno liye ohoirana yotega imohive ya Jerobowawu mwana Nebati, wenno aategihile aIzarayeli. Yotega yenno liye kahiyile.

Mwene Jorawu ohagumaniha amwene afwaye ira kadowe kawane na akuda Mowabe

⁴ Mulombwana Meza, mwene wa akuda Mowabe, ali maliba fuwa mabila. Mwa enne liye muwari mogondjihiwa na aIzarayeli, aveleletcha wa mwene wa Izarayeli ana mabila okwakwana 100.000 vamohi na mawoya a mabila a alombwana 100.000.

⁵ Fwanyeya ira mwene Akabe agakwile, mwene wa akuda Mowabe ule ohokonda tongiwa na Jorawu mwene muxa wa Izarayeli.

⁶ Agaonne enne, mwene Jorawu ule ohokumaga Samariya tempu imohive yenne, liye dowa agumaniha anyakondo atene a Izarayeli.

⁷ Eto ohorumihaga milanyo wa mulombwana Jozafa mwene wa Juda ira: <<Mwene wa akuda Mowabe unakonda tongiwa na miyo. Kodi weyo unodikamiheda ira nidowe kondoni nawane na akuda Mowabe?>> Evale mwene wa Juda ule ohowakula ira: <<Miyo kadinna makani, nnodowa vamohi na nyo. Miyo nnogumanela dikale na nyo, anyakondo aga anokala vamohi na anyakondo enyu eto kavalo daga nnokala vamohi na kavalo denyu!>>

⁸ Noira enne, mulombwana Jorawu ohonfukaga eraga: <<Nnga nnafuna nihare ndila ivi?>> Evale liye ohowakula ira: <<Nnafuna nihare pandi ya kokola ya Edomu.>>

Mwene Jorawu ohodowa nfuka Elizewu zela makalelo kafuna atu gomela

⁹ Mwa enne Jorawu mwene wa Izarayeli na Jozafa mwene wa Juda vamohi na mwene wa Edomu, kohomaruwaga kawendawendaga ante malambo matanu na menli. Mwa enne anyakondo kanna atu vamohi na anavinyama ewa kohomaleliwaga mahindje.

¹⁰ Evale mwene wa Izarayeli ule owongaga eraga: <<Nihikwa hiyo! Kodi eni Yehova kanigumanihile hiyo amwene araru ira anivahede mmandani mwa akuda Mowabe?!>>

¹¹ Evale mwene Jozafa ohonfukaga, liye ira: <<Kodi uli hiyo uno kaliwo namafiyiheda wa Yehova ira ninfuke Yehova muwari mwa liye?>> Evale munyakondo mmohi wa mwene wa aIzarayeli ohowakulaga eraga: <<Uno ukalawo namafiyiheda mmohi unaitaniwa Elizewu mwana Safati, wenno ali nkamihedi wa Eliya.>>

¹² Eto mwene Jozafa ohorumelelaga awongaga eraga: <<Mazu a Yehova anafwanyeya na liye.>> Noira enne, mwene wa Izarayeli, na mulombwana Jozafa, vamohi na mwene wa Edomu kohodowaga ira kawonge na Elizewu.

¹³ Kaganfwanyile, Elizewu ohowongaga na mwene wa Izarayeli ule eraga: <<Miyo kadinna pandi na weyo. Udowe waafukege anamafiyiheda a babawo na anamafiyiheda a mmawo.>> Mbwenye mwene wa Izarayeli ule ohomukalelagave ntindi eraga: <<Nari, miyo kannarumela dowa afuka anamafiyiheda amohiwa. Tchoira Yehova uhunigumaniha hiyo amwene araru ira anivahede mmandani mwa akuda Mowabe.>>

¹⁴ Evale mulombwana Elizewu ohowonga eraga: <<Miyo nnawonga vamentoni va Yehova wa Makuru Matene, wenno nnamulaba miyo ira ahakala mulombwana Jozafa mwene wa Juda aza, miyo kadauing'ana nne kadaubalra.>>

¹⁵ Noira enne, ohowongagave eraga: <<Kadowani mwanvende maliba imba arpa mmuzena.>> Evale maliba arpa agazile, aimbaga, kopolo da Yehova dohomuzelaga Elizewu.

¹⁶ Evale ohoromaga wonga eraga: <<Yehova unawonga ira: <Mudowe munkolopani mule, mwatimbe miliha didjindji.>

¹⁷ Tchoira Yehova unawonga ira: <Miliha nnafuna nyo timba nnomala zala mahindje aharumbwile muzongwe nne mwahaonne nipevo niombaga. Mwa eno, nyo atene munofiyeda ng'wa mukwakwane vamohi na anavinyama enyu atene.>

¹⁸ Eto jejo jinafuna ireya kahi yengo vamentoni va Yehova. Eto unouvahedani akuda Mowabe mmandani mwenyu.

¹⁹ Eto nyo munofiyeda gudjula sidadi dewa dowerewerihiwa na muru vamohi na sidadi dindimuwa dosakulreya eto munogwada mitengo diwa dapama datene eto munovuhelela visime diwa datene da mahindje eto minda diwa datene dapama, nyo munomala vokedamo mabwe.>>

²⁰ Elizewu agawongile eno, mmetcheloni muwa na mabebehi, yagafiyile ora yenno inaveleletcha atu jovelela ja jodja, mahindje kohoromaga za kakumelaga pandi ya Edomu. Evale ilambo yatene yafwanyeyaga atu ile yohozalaga mahindje.

Gondjihiwa wa akuda Mowabe

²¹ Evale akuda Mowabe kagavwile ira amwene araru ale kohomaruwa ira kadowe kawane na aliwa, kohagumanihaga alombwana atene kanna idadi yowanda dowa kondoni. Atene anne kagamanle gumana, kohodowaga mmadilreni mwa ilambo ya Mowabe na ilambo ya Edomu.

²² Mwa enne, mmetcheloni muwa, akuda Mowabe ale kagavenyile na mabebehene, kagaonne nzuwa nimoneyaga mahindje ale, aliwa kaing'ana mahindje ale, kaona kagali ofilene kalaga nnga sangiri.

²³ Mwa enne kohokuwaga keraga: <<Kaing'anani sangiri! Eni amwene araru ale kera wana oka oka, aliwa fiyeda panana. Kavenyani atene nidowe natukulewo jengo jiwa jatene.>>

²⁴ Mbwenye akuda Mowabe ale kagafiyile vamisasani va aIzarayeli vale, aIzarayeli kohamarulaga, aliwa roma apa, fiyeda akuda Mowabe ale aliwa roma tawa. Evale aIzarayeli ale kohofiyeda avolowela akuda Mowabe ale mwilamboni mwewa, aliwa apagave.

²⁵ Eto kohogudjulaga sidadi da akuda Mowabe ale eto kada mutu otukulaga nibwe naye naye, aliwa vokelaga minda dapama da akuda Mowabe ale eto kohovuhelelaga visime diwa da mahindje eto kohogwihaga mitengo datene dapama dapama. So mbwenye sidadi yahabwanyunle atu, ali sidadi yaitaniwa Kiri-Harezeti. Evale aliba voka mabwe ale a amwene araru ale, kohoirindjaga sidadile, aliwa roma wanaga ira kagondjihe.

²⁶ Mwa enne mwene wa Mowabe agaonne ira: <<Eni nnagondjihiwa!>>, ohagumanihaga alombwana 700 okana masupada ira kadowe kawane na mwene wa Edomu evo vafwanyeya liye ira kawande ona tempu yotawa. Mbwenye tchawandile.

²⁷ Mwa enne liye ohomutukulaga mwanaye oroma wa mwanapongwe, wenno afuna hala vamalroni vaye liye agakwile, liye mpa, musakanya mukuto otumeya vamuruni va sidadile. AIzarayeli kagaonne ejile, kohokagana kukumuwa ulukulu zela jejo jairile mwene wa Mowabe ule. Na mwasa wenne, aIzarayeli kohomaruwaga, aliwa welelaga waniwa.