2 Amwene 2 - Mazu Otchena a Mulungu

Eliya ohotukuleliwa zulu

¹ Yehova afunaga mudowana mulombwana Eliya zulu muwari mwa nalripembezu, jaireyilege eni. Mulombwana Eliya na Elizewu kohomaruwaga Jiligali.

² Aliwa kavenyihanaga, Eliya ohomuwandela Elizewu, liye ira: <<Urome kala eva, mwasiwa Yehova udirumile ira didowe Beteli.>> Mbwenye Elizewu ohowakulaga eraga: <<Miyo nnawonga vamentoni va Yehova na vamentoni venyu ira miyo kannauhiyani!>> Mwa enne kohodowaga Beteli vamohi.

³ Mwa enne kagafiyile Beteli, asempuru a anamafiyiheda kafwanyeya wewule, kohozaga wa Elizewu, aliwa muwandela ira: <<Kodi weyo uhuiziwa? Eni peno Yehova unomutukula mbwiyawo Eliya amugwelihe zulu?>> Evale liye ohowakula eraga: <<Kamiyalani, na miyene dihimala iziwa pama jejo!>>

⁴ Noira enne, Eliya ohomuwandelaga Elizewu eraga: <<Urome kala eva. Tchoira Yehova udirumile ira didowe Jeriko!>> Mbwenye liye ohowakula eraga: <<Miyo nnawonga vamentoni va Yehova na vamentoni venyu ira miyo kannauhiyani.>> Mwa enne kohodowaga vamohi Jeriko.

⁵ Evale asempuru a anamafiyiheda kafwanyeya Jeriko ule kohomususela Elizewu, kamuwandelaga ira: <<Kodi weyo uhuiziwa? Eni peno Yehova unomutukula mbwiyawo Eliya amugwelihe zulu!>> Evale liye ohowakula eraga: <<Kamiyalani, na miyene dihimala iziwa pama jejo!>>

⁶ Noira enne, Eliya ohomuwandelaga Elizewu eraga: <<Urome kala eva. Tchoira Yehova udirumile ira didowe Jordawu.>> Mbwenye liye ohowakula eraga: <<Miyo nnawonga vamentoni va Yehova na vamentoni venyu ira miyo kannauhiyani.>> Noira enne, kohodowaga Jordawu vamohi.

⁷ Eto wohokala asempuru a anamafiyiheda 50 kadowilege vamohi na aliwa. Kagafiyile Jordawu ule, asempuru ale kohokalaga olapela wene, aliwa ing'anaga jatene jaireyaga. Mbwenye Elizewu na Eliya kaimenlege wandamelana mwiko mwa Jordawu.

⁸ Mwa enne mulombwana Eliya ohowungulaga kapaye, liye mala vinda pama. Noira enne, ohokomana mmahindjeni mule. Agakomilena mmahindjeni mule, mahindjale kohomwalaneya, aliwa gaweya pandi mbinli. Mwa enne, ambinlene kohoviraga vari vale, vateyani voumma.

⁹ Mwa enne aliwa kagalambuwile, Eliya ohomuwandelaga Elizewu eraga: <<Kadivepe yenno inafuna we ira miyo duirele dahanakumihiwevo vari vawo.>> Evale Elizewu ohowongaga eraga: <<Miyo nnauvepani ira dikayena fendo mbinli da munemba wenno munna nyo.>>

¹⁰ Evale Eliya ohowongaga eraga: <<Ivepile we tchi yengo yorutcha bure. So inafuna miyo uwandela tchoira miyo tempu inatukuliwege miyo vari vawo, wadiona, inowanda ireya. Mbwenye datukuliwaga wahadione, kinaireya.>>

¹¹ Noira enne, kadowagave eto katapanyaga, wohokala aterelado wa kondo agali wa munlo azilege aganna kavalo da munlo. Aterelado ule agazile, ohamwalanihaga, Eliya kala waye wene eto Elizewu liye kala waye wene. Mwa enne Eliya ohogwelaga zulu muwari mwa nalripembezu.

¹² Evale mulombwana Elizewu agaonne enne, ohomukuwelaga eraga: <<Babani, babani. Nyo mwali nnga aaterelado a kondoni a aIzarayeli vamohi na aliba wendiha kavalo.>> Noira enne, kamuonileve akoka. Evale Elizewu ohotukulaga jowara jaye, liye kawula vari.

Elizewu ohala vamalroni va Eliya

¹³ Eto ohotukulaga kapa yenno Eliya yammorihedile liye, liye wela dowa tcherela ya muhindje Jordawu.

¹⁴ Evale ohotukulaga kapa ya Eliya yenno yammorenle ile, liye komana mahindje ale eraga: <<Kodi Yehova Mulugu wa Eliya uli waani?>> Agakomile mahindje ale, kohomwalaneya, aliwa gaweya pandi mbinli wu na wu. Mwa enne Elizewu ohoviraga vari, vateyani voumma.

¹⁵ Evale asempuru a anamafiyiheda okumela Jeriko kafwanyeya olapela wene kombela ya muhindje ule. Kagaonne enne, kohowongaga keraga: <<Munemba wa Eliya unafwanyeya na Elizewu.>> Mwa enne kohozaga wa liye, aliwa mukokorela kaoramihaga miru diwa ante fiyiha vati.

¹⁶ Eto kohomuwongagana keraga: <<Hiyo anamalaba enyu nihikana alombwana 50 a kopolo. Kaarumeliheni aliwa kadowe kanvende mbwiyinyu. Tchoira afwase Munemba wa Yehova wire mutukula dowa muhiya vamwangoni, owu nimburo nimohi niwa nene notita.>> Mbwenye liye ohawakulaga eraga: <<Nari kamwarume!>>

¹⁷ Mbwenye aliwa kohomukalelagave ntindi, fiyeda muwaheyiha. Mwa enne ohawandelaga eraga: <<Kaarumeni kadowe!>> Evale aliwa koharumaga alombwana 50, aliwa mala malambo mararu kanvendaga Eliya. Mbwenye tchamuonilege.

¹⁸ Noira enne, kohowelelaga wa Elizewu, Jeriko wewo wahanlege liye. Evale liye ohawandela eraga: <<Kodi miyo kadauwandenleni vale ira kamudowe?>>

Elizewu ohokaliha pama mahindje a Jeriko

¹⁹ Noira enne, atu a Jeriko ule kohomuwandelaga Elizewu keraga: <<Sidadila inafwanyeya vapama, nnga mwemo munaonela nyo. Mbwenye mahindje a sidadila kahi apama eto teyiwa tchi teya yohobaliha jengo.>>

²⁰ Mwa enne Elizewu ohawandelaga eraga: <<Kadowelani mwinnyu, muhele mutijelani nixa, muzena uno!>> Noira enne, kohomuzelagana.

²¹ Noira enne, ohovenyaga, liye dowa pandi ya wewo wakumela mahindje, liye vokeda mwinnyu mmahindjeni mule, liye wonga eraga: <<Yehova unawonga ira: <Miyo dihimala akaliha pama mahindje ala. Mahindjala kinatatamulege ukwa uli watene eto teya inerege baliha jengo.> >>

²² Mwa enne mahindjale kohokalaga pama, fiyeda siku na peno, mokwakwanela na mazu anno awongilege Elizewu.

Ahima 42 kohokwa na mwasa ompeta Elizewu

²³ Noira enne, ohomaruwaga adowaga Beteli. Evale agali mundila adowagave, kohokalawo ana azombwe kakumilege musidadi mule, aliwa roma muteya keraga: <<We naivanda we, kadowaga! We naivanda we, kadowaga!>>

²⁴ Evale liye agarungunuwile, againg'anne mundulri, ohaonaga. Mwa enne ohatembelrelraga mwa nzina na Yehova. Noira enne, kohokalawo aurusu ambinli a ahiyana kakumilege muguguruni, aliwa za apa ahima 42.

²⁵ Noira enne, ohokumaga evale adowaga mwango Karimelo. Nokuma Karimelo ule, ohowelelaga Samariya.