2 Amwene 12 - Mazu Otchena a Mulungu

Jowasi ohosakanya Nyumba ya Yehova akoka

¹ Mwene Jewu agamanle yaka tanu na mbinli aatongaga aIzarayeli, tchi tempu Jowasi aromile liye atonga aJuda. Fwanyeya ira liye atongile muJeruzalemu yaka 40. Mmaye ali nkuda Beriseba aitaniwa Zibiya.

² Mulombwana Jowasi ohosakanya jafuna Yehova malambo matene asogolrelriwa liye na namakuta Joyada.

³ So mbwenye liye kagumunle mamburo otama ovelela mikuto wa amilugu. Atu kodowetchave sakanyaga mikuto diwa eto tumeyaga jonukela mamburo otama ale.

⁴ Mwene Jowasi ohawandelaga anamakuta eraga: <<Mugumanihe kobiri ya jovelela jatene jotchenihiwa jinaveleliwa muNyumbani mwa Yehova, romela jovelela ja musoko wa kada mutu na jovelela ja mikuto, na kobiri yatene yenno inavelela mutu mofuna mwaye.

⁵ Kada namakuta awatchelege jatene jinazegena atwaye ira jiwande gumanihiwa jatene ira isakanyediwe Nyumba ya Yehova mwatene mwemo munongeyile.>>

⁶ Mbwenye kohofiyedaga yaka 23 da umwene wa Jowasi, anamakuta ale kahanasakanyedeve Nyumba ya Yehova nnga mwafunele mwene ule.

⁷ Na mwasa wenne, mwene Jowasi ule ohomuitanihaga namakuta Joyada vamohi na anamakuta amohiwa, liye afuka eraga: <<Kodi mwasiwa gwa nni evale na vano nyo hafunaga sakanyeda Nyumba ya Yehova? Kuma peno eni dowa sogolro, kobiri inawatchelege nyo kikalege na nyo. Inafwanela mwaavahedege aliba koya ira Nyumba ya Yehova isakanyediwe.>>

⁸ Mwa enne anamakuta ale kohorumelela ira kahawatchelegeve jovelela ja atu jile eto nne ira kahakale aliba sogolrelra mabasa osakanyeda Nyumba ya Yehova ile.

⁹ Evale namakuta Joyada ohotukula kaxa eni, liye povola vatampani va kaxa ile. Liye dowa ihela kaxa ile wandamelana ibuwani, ikukuru ya muwononi odjana ya mutu uli watene avolowa va Nyumbani va Yehova vale. Mwa enne anamakuta oing'anela va mulango vovolowela vale, kozana kobiri yatene yavelela atu va Nyumbani va Yehova, aliwa vokedaga mukaxani mule.

¹⁰ Mwa enne kaona ira mukaxani mule muhukala kobiri idjindji, namalremba wa mwene ovenya vamohi na mundimuwa wa anamakuta, aliwa dowa tukulamo kobiri yatene yafwanyeya muNyumbani mwa Yehova, aliwa kontari. Amala eno aliwa ihela mmasakwini.

¹¹ Kobirile yamala kontariwa, kotukula, aliwa dowa avaheda andimuwa kawendiha mabasa osakanyeda Nyumbele. Mwa enne aliwa kotukula, atambilrihaga anamasema na aliba sakanyeda Nyumba ya Yehova ile,

¹² vamohi na aliba manga, vamohi na aliba gwada mabwe. Eto kotukula, aliwa gulagana matabwa vamohi na mabwe mamohiwa ira kawande sakanyedana Nyumba ya Yehova, vamohi na yengo ili yatene yafuneya para sakanyedana Nyumba ya Yehova.

¹³ Mbwenye kobiri yatene yaveleliwa vaNyumbani va Yehova vale, tchaguliwana kopo da parata, nne jotimihana panti, nne mabasiya, nne palraza, nne yengo ili yatene ya oru nari ya parata ira kalabena Nyumba ya Yehova.

¹⁴ Tchoira kobiri yatene aliwa kaatambilriha aliba laba mabasa osakanyeda Nyumba ya Yehova ile no gulana jofuneya ja vamabasani vale.

¹⁵ Eto nne anamakuta ale tchakana afuka uwa aliba atambilriha kobiri anamalaba ale zela makalelo oatambilriha atu kobiri vamohi na kobiri yatene yahalavo, mwasiwa aliwa kali atu olaba na makalelo ororomeleya.

¹⁶ Mbwenye anamakuta pandi yewa ali kobiri ya mikuto domaliha milandu na mikuto dokurumuwela jotega. Kobiri dedo mbwenye kadaveleliwa para mabasa osakanyedana Nyumba ya Yehova.

¹⁷ Mwa tempu yenne mulombwana Hazayeli, mwene wa Siriya, ohovenyaga dowa wana na akuda Gate, liye agondjiha. Eto noira eno, Hazayeli ohoumbuwelaga eraga: <<Nnafuna didowe dawane na sidadi ya Jeruzalemu.>>

¹⁸ Mbwenye Jowasi mwene wa Juda agavwile enne, ohotukulaga jengo jatene javelenle liye wa Nabwiya vamohi na jengo jatene javelenle makolo aye Jozafa na Jeyorawu na Akaziya anno kafwanyeya kagali amwene a Juda. Eto ohotukulaga vamohi na oru afwanyeya nyumba yokoyamo ja Yehova, vamohi na nyumba ya mwene. Ohotukulaga jatene ejile liye murumiheda Hazayeli mwene wa Siriya ule. Mwa enne mulombwana Hazayeli ohiyaga sidadi ya Jeruzalemu ile.

¹⁹ Joira jimohi jiwa ja mwene Jowasi, vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Juda.

²⁰ Kohokalawo anamalabaye a muumweneni mwaye kampanganenle, aliwa mpa nyumba yafwanyeya nimburo naitaniwa Milu, ndila inadowa Sila.

²¹ Anamalabaye kampile ali Jozakari mwana Simeyati na Jozabade mwana Someri. Evale agakwile, ohokoyiwa vamohi na makolo aye sidadi ya Davi. Noira enne, mwanaye Amaziya gwahambile umwene vamalroni vaye.