1 Timoteyo 6 - Mazu Otchena a Mulungu

Mawendelo ofwanela zela azari na ambwiyiwa

¹ Inafwanela waawandele azari ira inafwanela kaarihedege ambwiyiwa anafwanyeyana atu ilambwela na makalelo matene, mwasiwa muzari alramwisa jowonga ja mbwiyaye, nzina na Mulugu nnoluluvihiwa eto jinafundjiha hiyo jinoluluvihiwa.

² Eto muzari akana patarawaye omuroromela Yesu, inafwanela ahawande mulramwisa moira: nnalabege vang'ono vang'ono mwasiwa unamulaba miyo gu mbalaga omuroromela Yesu. Mbwenye inafwanela asimbwege mulaba aiziwaga ira: vanalaba miyo va, vakuma yengo, unadja gu mbalaga omuroromela Yesu unamuziveliwa miyo. Wafundjihege eto wakokomezege jatene jinawonga miyo ji.

Makalelo a anamafundjiha onama

³ Wamuona mutu owonga mafundjihelo ohofwalrafwana na jowonga japama ja Nabwiya wehu Yesu Kiristu, na mutu owonga jengo jahanalingana na jowonga jomufundjiha mutu ira airegena japama ja Mulugu,

^4-5 uiziwe ira mutu wenno mmirimani mwaye muzanle vitukulela eto kaiziwile yengo tchivi. So unaziveliwa tatamula madugudugu bahi no wanela mazu na atu ohoumbuwela pama, atu ohokana ibaribari. Muwari mwa madugudugu mule munokuma kalelana nrima, gaweya, nukedana, luluvihana no haraharana. Ilukuluwa so ayaga mwa Mulugu unadowelamo ira arayele. Inafwanela waarambele atu anne.

Makalelo apama oumbuwela zela kobiri

⁶ Ule unairana jofuna ja Mulugu eto agalive oziveliwene zela kana unna liye, mutu wenno mbwenye gunna rayela wa ibaribari.

⁷ Tchoira nizaga mwilamboni ya vati, nibaliwaga, kanibaliwena yengo. Eto nakwaga, kannadowanave yengo.

⁸ Nona nawendaga mwilamboni ya vati, nakana udja, nakana jowara, inafwanela niwande wonga ira kana waga vili miyo va, dihikwakwana.

⁹ Atu anne anafuna kana jorayela ja ilambo ya vati banagwa motegani, banavimangana ngohi, banakana jofuna jabure johokala pama. Jofuna ejo jinoazelana nongeya no tolowa.

¹⁰ Tchoira nipara na jotega jidjindji ku ziveliwa kobiri. Muwari mofuna ja kobiri, kohokalawo atu kahiyile ibaribari zela Yesu, aliwa mala viporotcha, kavivahaga makatamiho madjindji.

Jokokomeza jogomiheda ja Pawulo para Timoteyo

¹¹ Mbwenye weyo voira uli mutu wa Mulugu, inafwanela utawe jabure jatene ejo, uzuzumelege irana jengo japama ejo jinafuna Mulugu, ulimbiheve nroromelo nawo, waazivelegeve afwawo, ukale olimbiheyene, ukayenave fwaseya na atu.

¹² Uwanege kondo yapama yozela irana ja nroromelo. Malambo a mundulrimu Mulugu uitana weyo ira ukayena ingumi yohomala eto weyo wohowanda rumela zela ingumi yenno vamentoni va amboni adjindji. Inafwanela uhidede pama ingumi yenno.

¹³ Miyo dagali Pawulo nnouruma vamentoni va Mulugu wenno unafwanyeya agali namavaha wa ingumi eto nnouruma vamentoni va Yesu Kiristu wenno awongile pama asumeliwaga vamentoni va Ponsiyu Pilatu,

¹⁴ ira uiregena jatene jilrembile miyo ji. Wairagana eji, Nabwiya wehu Yesu Kiristu aza aoneya, unoufwanya wagali wapamene, wahanna imanya.

¹⁵ Oneya waye unoza uireye mofuna mwa Mulugu tempu yakwakwana. Mulugu oteteliwa eka gu Mwinnya otonga Jatene, liye gu Mwene wa amwene, liye gu Nabwiya wa anabwiya.

¹⁶ Mulugu eka gwahanakwa, gunakala muwari mowareya undimuwa wewo wahanawanda fiya mutu. Kalivo umuonne eto kalivo unawanda muona. Inafwanela liye ateteliwe, utongi watene ukale na liye kala no kala. Ame!

¹⁷ Waawandele atu okana jokana jiwa ja mwilamboni ya vati muno ira kahavitukulele eto kaharoromelege jorayela jewa. Mwasiwa jorayela ja ilambo ya vati kajinaroromeleya. Mbwenye mutu orayela amuroromeleve Mulugu wenno unanivaha jengo pwi na manda menli ira niwande ziveliwa.

¹⁸ Inafwanela aliba rayela kairegena japama, kakale orayela zela irana jengo japama, kaavahege atu jengo na manda menli eto kakale okozeyene ira kameyewo jokana jiwa, kaakamihedegena afwiwa.

¹⁹ Kera eno, anakoyela jorayela ira kadowe kafwanye rayela wewa sogolro, kafwanye ingumi yenno ili ingumi ya ibaribari.

²⁰ Nnoukokomeza weyo Timoteyo ira uing'anelege pama ira uiregena mabasa uvahediwe we. Kohokalawo atu amohiwa anawonga jengo jomululuviha Mulugu, jengo jonama, kavionaga nnga: <<Nnawonga ibaribari.>> agali jonama. Wafwanya jowonga jejo, inafwanela urambele.

²¹ Tchoira na mwasa wa jowonga ejo, kohokalawo atu kaperuwile, kahiyile ibaribari yenno inahara hiyo. Sayi da Mulugu dikale na we. Kukala mazu a karta noroma nalrembiwele Timoteyo.