1 Timoteyo 5 - Mazu Otchena a Mulungu

Makalelo afuna Timoteyo wenda na atu muwari molaba mabasaye

¹ Wafunaga muwandela mundimuwa wa idadi mazu, kumuwandele muwari momusumulula, mbwenye umukokomeze nnga babawo. Eto zela azombwe, inafwanela waawongena nnga abalawo.

² Eto waafwanya ahiyana a idadi, waawongena nnga ammawo. Eto waafwanya anamwali, waawongena nnga arongoliyo moviing'ana pama tawiha ira unagwe motegani.

Makalelo ira atu omuroromela Yesu kaakamihedege amakwele a ahiyana

³ Inafwanela mmukamihedege makwele wa muhiyana uli eka mwa ibaribari.

^4-5 Makwele wa ibaribari gwenno uli eka, unagarati so amuumbuwelaga Mulugu. Ntana na mahiyu alobelaga, anvepaga Mulugu ira amukamihede. Mbwenye makwele unna ahimaye na azuliye, inafwanela mubabihe ahiya aliwa kafundje makalelo oirana ja Mulugu moakamiheda atu anafwanyeya vande viwa ira kapagalri mangawa anno kaireliwa atu na ababiwa tempu kaleliwa atu kagali ahima. Tchoira yenno tchi yengo yofwanela vamentoni va Mulugu.

⁶ Mbwenye mwamuona makwele ira jofuna jaye jihiindjiva, na liyene mmuhiye. Tchoira liye masiki agaliwove, unawenda okwene.

⁷ Miyo nnafuna we Timoteyo waarume ira kairegena jatene jinawonga miyo ji ira kawendaga, kahafwanyeyena imanya.

⁸ Mbwenye mutu wenno unakonda mukamiheda mutu osegedeya uli muibalini mwaye, simbwasimbwa amakwele a muibalini mwaye osegedeya, mutu wenno umala hiya ibaribari inahara hiyo eto ubure waye uhumukwaranya mutu wenne ahanamuroromela Yesu.

⁹ Makwele unafuna lrembiwa valistani inafwanela akale ofwanyeyana yaka 60 para sogolro eto akale wenno ababihile teliwa na mulombwana mmohi bahi,

¹⁰ akale mutu oiziweya ira unoiretchana japama, akale oalela pama ahimaye, oawatchela pama alendo, okana respeto pama ira atu otchenihiwa kazaga vaniwa, oahuwetcha manyalo eto akale oakamiheda atu osegedeya. Akala jatene jene oirana, makwele wenno alrembiwe valistani.

¹¹ Mbwenye kumulrembe makwele wenne unna idadi ya vang'ono tawiha ira sogolro unerege funa joteliwa akoka hiya hindaga ja Kiristu.

¹² Evale unokana mulandu mwasiwa liye uhiya mmambalo yopangana yaye yoira alabege mabasa a Kiristu bahi.

¹³ Ubure umohiwa, makwele okana idadi ya vang'ono aroma tambilra kobiri, kanahinda yengo, so unoroma wendaga mmavande awalredege jaye. Muwari mohohinda yengo, munokuma jowamba, urambwe, aliwa wongaga jengo johofwanela.

¹⁴ Nona miyo nnaona ira yapamiwa, makwele uli ahanaulule, ateliwe, aabale ahimaye, asapege jaye vande vaye. Kairana eno, ale ananiida kinakana makalelo ofuna ninukeda yengo.

¹⁵ Nnawonga eno mwasiwa kohokala amakwele kahateliwe akoka, kaperuwile, aliwa roma hara ndila ya Satana.

¹⁶ Inafwanela kada muhiyana omuroromela Yesu awande mukamiheda makwele unafwanyeya muwari mwa ibali inna liye ira nikuru na atu omuroromela Yesu nahasimbwe kana mabasa oakamiheda amakwele adjindjene, so mbwenye kakayena mabasa oakamiheda amakwele ogomeliwa.

Mazu amohiwa zela aansiyawu

¹⁷ Inafwanela atu omuroromela Yesu kaakamihedege aansiyawu ewa. Makamaka ansiyawu olaba mabasa olaleya eto ofundjiha, wenno arihediwe. Muwari morihediwa inafwanela ansiyawu wenno akamihediwe.

¹⁸ Mwasiwa ilrembiwa mMazuni ira: <<Kakalevo unafuna imanga ng'ombe wanoni, amala adugudiha udja.>> Eto mMazuni mwakoka mwene mulrembiwa mazu oira: <<Mutu wenno unalaba mabasa, inafwanela atambilre zela mabasa analaba liye.>>

¹⁹ Wanvwa mutu mmohi unamunukeda ansiyawu yengo, kubaranyede dowa nfuka. Mbwenye waavwa atu ambinli owu hehi araru kawongaga imohive, tchi tempu inafuna we venya dowa nfwanya ansiyawule.

²⁰ Wamuona ira kanawanda hiya jotega jaye, umusumulule vatando vene vamentoni va atu atene ira aansiyawu afwaye kaovege.

²¹ Miyo nnouruma vamentoni va Mulugu na Yesu Kiristu na angelro anno Mulugu aasakunlre liye, ira mangano matene anawonga miyo ala, uharihegemo mohokana nfwawo, mohokana nsakulro.

²² Weyo kukayena marulu zela muhela mutu mandawo eto kurumelele jotega ja atu amohiwa. Uwendegeve na makalelo apama.

²³ Kung'wege mahindje bahi, nari. Mbwenye ung'wege vinyu vang'ono, ira ukamihediwe zela urenda wa mbani nari maurenda amohiwa anakayetchana we.

²⁴ Uumbuwele ira kokala atu amohiwa jotega jiwa jinavayela oneya vatando vene, tempu yewa yotongiwa yahanafiye. Mbwenye kohokalawo atu amohiwa kahanabaranyeda oneyana jotega jiwa.

²⁵ Na makalelo amohive, akala mutu unoirana japama, joira jaye japama jinooneya vatando. Masiki joira japama jikoyeye, jinoza jioneye.