1 Timoteyo 4 - Mazu Otchena a Mulungu

Zela atu owonga jonama na nzina na Mulugu

¹ Munemba Otchena unoniwandela mohokayikela ira matempu ogomiheda, kohokalamo anafuna kapupuruwe, kahiye ibaribari inahara hiyo, kahare minemba donyenga na jonama jinafundjiha minemba dabure.

² Anerege wonga jonama johofwanela jile muwari moanyenga atu eto keraga eno mmirimani mwiwa kinakayegena kumbanya zela jabure jinaira atu.

³ Muwari monama anawongege makalelo ofuna ahiyiha atu ira kahatelane eto anerege wonga makalelo oahiyiha atu zela jodja jejo jipandutchile Mulugu ira hiyo atu omuroromela eto oiziwa ibaribari nidjege muwari momutamalela.

⁴ Tchoira jatene Mulugu jipandutchile liye ti jengo japama. Akala hiyo nnowanda dja yengo muwari momutamalelana Mulugu, kilivo yodja inafuna hiyo konda.

⁵ Tchoira jodja jihimala tchenihiwa na mwasa wa mazu a Mulugu vamohi no lobela.

Jokokomeza Pawulo anvahile liye Timoteyo

⁶ Watukula jatene jinauwandela miyo ji, waafundjiha abalihu, weyo unokala namalaba wapama wa Yesu Kiristu ovilemeliheda mazu a ibaribari nnahara hiyo na mafundjihelo a ibaribari anno anahara we.

⁷ Kuharege anatchitwa ohokana mabasa anno anamululuviha Mulugu. Mbwenye inafwanela uterenari zela irana jofuna ja Mulugu.

⁸ Atu katerenarihaga maningwiwa, kahi ira terenariha maningo kunna mabasa. Ukana mabasa, so mabasiwa kinasusa. Mbwenye we uterenari zela irana japama ja Mulugu. Tchoira terenari wewo unonilabela yengo tempu ili hiyo ila eto unonilabela yengo tempu inafuna za sogolro.

⁹ Mazu anawonga miyo ala ba a ibaribari eto bofwanela rumeliwa mohokayikela.

¹⁰ Tchoira nnorumela laba no onihiwa goyi mwasiwa hiyo yoing'anela yehu inafwanyeya muwari mwa Mulugu Okalawo wenno uli Nvulusi wa atu atene makamaka ale anamuroromela Yesu.

¹¹ Jatene jinawonga miyo ji, inafwanela waafundjihege afwawo eto waarumege.

¹² Kwahiye atu ulramwisa na mwasa oira weyo kunna idadi yapama. So inafwanela ukale mutu owonga jowonga japama, ukale oirana joira jofwanela, ukale mutu oaziveliwa afwawo, ukale wa nroromelo, ukale mutu ohofwanyeyana yabure ili yatene ira afwawo kausazihege weyo.

¹³ Dahanaze wewo, inafwanela weyo ukale mutu oailerela afwawo mazu a Mulugu vatando vene eto inafwanela waakokomezege eto waafundjihege.

¹⁴ Malambo a mundulrimu aansiyawu kagagumanne, kohouhela manda eto kohowonga mazu ofiyiheda a Mulugu zela weyo. Muwari mwa emule, weyo ukana ivahiwe we. Kulramwisege yenno ivahediwe we.

¹⁵ Jatene jinauwandela miyo ji, inafwanela uzuzumelege ira uiregena na mmirimani mwawo mwatene ira atu atene kauona, kawandege ona ira muroromela Yesu wawo unadowave sogolro.

¹⁶ Eto inafwanela uing'anege pama mawendelo awo eto uing'anege pama mazu analaleya we. Ukaleleve irana jejo. Tchoira wairagana eno unowanda vivulusa weyo wa mwinnya vamohi na atu anne anavuruwana jofundjiha jawo.