1 Timoteyo 3 - Mazu Otchena a Mulungu

Makalelo ofwanela para mulombwana akale bixpu

¹ Yengo imohiwa inafuna miyo dukokomeze tchi ila. Wamuona mutu ofuna kala bixpu, uiziwe ira mutule unafuna mabasa apama.

² Nona ira mutu akale bixpu, inafwanela akale mulombwana ohokana imanya, mulombwana umutenle muhiyana mmohi bahi, mutu okana muru wapama, owanda viwendiha pama, mulombwana orihediwa, mutu owanda awatchela alendo, mulombwana owanda afundjiha atu.

³ Kakale maliba lrezelra nne kakale maliba waniha. Mbwenye akale mutu owenda na afwaye mofwaseya, hiya kala mutu okangana owu mutu oziveliwa kobiri.

⁴ Akale mutu owendiha pama vande vaye. Ahimaye kakale ahima okana respeto, onvwelela babiwa pama.

⁵ Tchoira wamuona mutu ahanawanda sasanyeda vande vaye na ahimaye, uiziwe ira liye atukula nikuru na Mulugu, kanawanda wendiha pama.

⁶ Vamohive vevo kakale mutu umuroromenle Yesu tchineneva tawiha ira unadowege liye, unerege vitukulela moviona ira kahi wa masika. Aira eno, ugwana mulandu mmohive Diyabo agwilena liye.

⁷ Vamohive vevo eto mutu unafuna we musakulra ira akale mundimuwa, akale mutu oiziweya na atu a unde ira ukana makalelo apama. Tawiha ira unanyaswihiwe, aze amange ngohi unareya Diyabo.

Makalelo ofwanela para mulombwana akale diyankoni

⁸ Sawasawa nnga makalelo anakana mutu ira akale bixpu, mutu ira akale diyankoni, inafwanela akale mutu okana makalelo ofwanela, owonga ibaribari. Diyankoni kakale mutu olrezelra, nne maliba funa kana jorayela pwi, aabelaga afwaye na malrango, hehi.

⁹ Akale mutu ohideda pama ibaribari inahara hiyo mohokana yowanganyeda mmirimani mwaye zela joira jaye.

¹⁰ Vamohive vevo wafuna nvaha mutu udiyankoni, urome muxixana mabasa a vang'ono. Wamuona ira unowanda pama mohokana imanya, unvahe wenno udiyankoni.

^11-12 Diyankoni akale mulombwana umutenle muhiyana mmohi bahi. Eto akale mulombwana owanda asogolrelra ahimaye na vande vaye pama. Eto muhiyanaye akale muhiyana wa makalelo ofwanela, muhiyana okana muru wapama eto ororomeleya mwa jatene, hiya kala muhiyana owamba.

¹³ Tchoira mutu alabaga pama mabasa a udiyankoni, na atwene kamuona anamuonege ira mutula unoirana upama. Eto unowanda wonga ibaribari inahara hiyo zela Yesu Kiristu mohokayikela.

Pawulo ohomulrembela Timoteyo ira atu omuroromela Yesu kawendege pama

¹⁴ Miyo nnafuna nnga tchineneva difiye uli we wo. Mbwenye eji nnalrembela ira

¹⁵ kalekale uno didodomewo. Jatene jinaulrembela miyo ji jinauwandela mawendelo ofwanela para ahima anafwanyeya vande va Mulugu, anno anafwanyeya kagali Nikuru na Mulugu Okalawo. Nikuru na Mulugu akala nnga ha yengo, gu aliserisi eto gu muzati ohideda ibaribari.

¹⁶ Hiyo nnowanda rumelela mohokayikela ibaribari yenno yahaiziweyile wanle zela mutu otchena Yesu ira: Liye ohoza, ohooniwa agawarile maningo. Munemba Otchena ohomuhidedela umboni. Angelro kohomuona. Liye oholaleyiwa muwari mwa malogo madjindji. Kohokala atu kamuroromenle mwilamboni muno. Liye eto ohotukuleliwa zulu na undimuwa wohokala wa masika.