1 Timoteyo 2 - Mazu Otchena a Mulungu

Inafwanela atu omuroromela Yesu kaalobelelege atu atene

¹ Yengo yoroma nnafuna miyo ukokomezani pama pama tchoira inafwanela munvepege Mulugu zela atu atene. Mwaalobelelege eto munvepege Mulugu zela aliwa eto mmutamalelege Mulugu zela jatene jinaira liye muwari mwa aliwa atene.

² Eto muwandege alobelela amwene na anamatonga atene okana izo ira kawandege nivaha tempu ira niwendege mwilamboni ya vati pama na murendele, mopwaseya, moirana jofuna ja Mulugu, mokana makalelo ofwanela muwari mwa jatene.

³ Alobelela atu tchi yengo ili yapama vamentoni va Mulugu Nvulusi wehu.

⁴ Tchoira Mulugu unafuna ira atu atene kavulusiwe eto kawande iziwa ibaribari yatene.

⁵ Uliwo Mulugu mmohive bahi eto uliwo maliba niwandaniha mmohive bahi vari va hiyo atu na Mulugu, wenno unafwanyeya agali mutu, Yesu Kiristu.

⁶ Tempu yafunne Mulugu yagakwakwanne, Yesu guvivelenle ira aawombole atu atene ira akale umboni zela vulusiwa.

⁷ Miyo dihambihiwe ira dikale namalaleya eto namarumiwa na namafundjiha wa atu ohokala aJudewu ibaribari zela vulusiwa muwari mwa nroromelo. Inawonga miyo kannawonga yonama mbwenye nnawonga mwa ibaribari.

Makalelo ofwanela para atu omuroromela Yesu kalobele kagagumanne vamohi

⁸ Miyo nnafuna ira alombwana kalobelege nimburo nili natene kagavenyihedile manda otchena zulu. Eto kilobelege muwari mojamo, nne muwari mokangana.

⁹ Eto zela pandi ya ahiyana, inafwanela muhiyana aware jowara japama, avikunelena jowara jofwanela, aganna makalelo oviwendiha pama, hiya luwa nsisi naye, wara ja oru na mabwe ofuneyetchetcha na ja peresu yokwima.

¹⁰ Mbwenye muhiyana unawonga ira unafuna ja Mulugu, inafwanela aoniwena joira japama.

¹¹ Inafwanela mwagumana, muhiyana unakalavo afundje bahi agali omiyalene, aavwelelege alombwana anne anasogolrelra bahi.

¹² Mbwenye kannaurumelihani ira muhiyana aafundjihe alombwana nari aasogolrelra alombwana. So mbwenye inafwanela akale omiyalene.

¹³ Mwasiwa oroma pandutchiwa ali mulombwana Adawu, vogomiheda ali muhiyanaye Eva.

¹⁴ Eto tempu yategile atu, anyengiwile kaali Adawu, mbwenye muhiyana gwanyengiwe, liye gwa motegani.

¹⁵ Masiki eno, liye unovulumuwa muwari moabala ahima, malringana muhiyana alimbihe nroromelo naye, awende na makalelo oaziveliwa afwaye na makalelo oirana jengo jotchena muwari moviwendiha pama.