1 Timoteyo 1 - Mazu Otchena a Mulungu

Pawulo unamulondjela Timoteyo

¹ Unalremba gu miyo Pawulo, namarumiwa wa Yesu Kiristu, nnafwanyeya dagali mutu urumiwe na Mulugu Nvulusi wehu vamohi na Yesu Kiristu wenno unamuroromela hiyo.

² Nnoulrembela we Timoteyo, mwanaga wa ibaribari muwari mwa nroromelo. Malondjelo anaurumiheda miyo ba ala. Difunne ira sayi na tangaranga na murendele unna Mulugu Babihu na Nabwiya wehu Yesu Kiristu, jatene ejo jikale na we.

Pawulo ohomuwandela Timoteyo ira aarunihe anamalaleya onama

³ Miyo dahanakume sidadi ya Efezo uli we wo ira didowe porovinsiya ya Masedoniya, dohouhiya muEfezo mwasiwa wewo kohokalawo atu anawonga ja Mulugu, kafundjihaga jewa jene. Daurumile ira uwandege ahiyiha atu anno ira kahafundjihegeve ejo,

⁴ eto ira kahabalrege anatchitwa ohokana mabasa nari mazina oindjiva ohomala a atu kakwile wanle. Tchoira ejo jinazana kayikelana hiya irana mabasa anafuna Mulugu anno anakumela muwari mwa nroromelo.

⁵ Ira miyo durume ira waahiyihe atwale jonama jiwa, ili ira atu kakale ozivelana mokana mirima dotchena eto mokala atu ohokana wanganyeda mmirimani mwewa eto mokala atu okana nroromelo na ibaribari.

⁶ Kohokalawo atu kahiyile ejo, aliwa mabasiwa so ku wonga jengo johokana mabasa.

⁷ Aliwa anofuna jovikaliha anamafundjiha malamulo, mbwenye kinaonelramo jejo jinawonga atu nne jejo jinarumelela atu.

Pawulo ohowonga zela mabasa a malamulo

⁸ Hiyo nihiiziwa ira malamulo a Mulugu bapama, malringana mutu aiziwe pama labana uwa.

⁹ Tchoira hiyo nihiiziwa ira malamulo tchaazenle atu apama mbwenye kaazenle atu anairana jabure, atu ohovwelela, aliba runiha ja Mulugu, aliba tega, aliba irana jotakala, aliba apa ababiwa, aliba apa afwiwa,

¹⁰ atu anne anararuwa, ale anafuna joagoniha alombwana afwiwa, atu anne anaahinda afwiwa ira kakale azari, atu anne ananama, ale anaanukeda afwiwa vamentoni va anamatonga. Malamulo kaazele atu atene anaruniha mafundjihelo apama a Mulugu.

¹¹ Mafundjihelo apama a Mulugu anaruniha atu abure, banno anafwanyeya muwari mwa Muselu Wapama Mulugu udivahedile liye ira dilaleye, muselu wenno unaniwandela zela undimuwa unna Mulugu oteteliwa.

Pawulo ohomutamalela Mulugu zela vulusiwa waye

¹² Miyo nnomutamalela Nabwiya wehu Yesu Kiristu wenno unadivaha kopolo dowanda labana mabasaye, mwasiwa liye odiona kala ororomeleya, liye dihambiha ira dilabe mabasaye

¹³ agali wanle dali mutu oluluviha nzina na Yesu, dali mutu oaharahara atu omuroromela Yesu, dali mutu ofuna nnga nzina na Yesu nimale. Mbwenye dihiwanda watchela tangaranga mwasiwa jabure jile dairana mohomuroromela, mohoiziwa jaira miyo.

¹⁴ Sayi dilukulu da Nabwiya dilabile ira diwande muroromela eto diwande kana zivela wewo unafwanyeya muwari mwa Yesu Kiristu.

¹⁵ Inafwanela atu atene omuroromela Yesu kagarati, kawande iziwa ibaribari ira: <<Yesu Kiristu para kuma zulu, za mwilamboni ya vati ila, uzele aavunele atu otega.>> Eto muwari mwa atu otega, otabwetchetcha tega gu miyo.

¹⁶ Mulugu udiwendela tangaranga miyene mutu akwarannye tega ira muwari mwa miyo Yesu Kiristu awande oniha vilela ulukulu unna liye vamentoni va ale kafuna muroromela ira kakayena ingumi yohomala.

¹⁷ Mulugu Mwene wa tempu datene, wenno ahanawanda kwa, ahanawanda oneya na meso, Mulugu mmohive uliwo, ateteliwe eto undimuwa waye uoneye kuma peno dowa sogolro kala no kala. Ame.

Pawulo ohomukokomeza Timoteyo ira akaleve olimbene na nroromelo naye

¹⁸ Miyo nnouruma we mwanaga Timoteyo ira uwane pama kondo. Tchoira malambo a mundulrimu kohokala atu kagumanne na weyo, aliwa uwandela mazu ofiyihediwa zela mabasa wafuna we laba. Inafwanela utukule mazwale ira uwanena kondo

¹⁹ wagahidedile pama nroromelo nawo eto mohowanganyeda yengo. Tchoira kohokalawo atu amohiwa kahiyile ibaribari, aliwa mala pupuruwela olapela wene na nroromelo niwa.

²⁰ Muwari mwa atu anno, mmohi gu mulombwana Imenewu, mmohiwa gu mulombwana Alexandiri. Miyo mbwenye, atu anno dihimala avaheda mmandani mwa Satana ira adowe aalange, kaiziwe ira kahi pama mutu mululuviha Mulugu.