1 Samuweli 8 - Mazu Otchena a Mulungu

AIzarayeli kohonvepa Samuweli mwene

¹ Samuweli agaulunle, ohatukula ahimaye a anapongwe, liye ahambiha ira kaatongege aIzarayeli.

² Murandji baliwa aitaniwa Joweli, wanembinliwa aitaniwa Abiya. Ambinlene katonga ilambo ya Beriseba.

³ Evale ahimaye ale kagaromile atonga aIzarayeli, aliwa tchatonga na makalelo nnga atonga babiwa Samuweli. Aliwa katongaga, kaziveliwa kobiri. Aliwa kafunetcha watchela kunya bahi eto tchatonga muibaribarini muwa.

⁴ Mwa enne andimuwa a aIzarayeli kohogumana, aliwa dowa wa mulombwana Samuweli ilambo ya Rama.

⁵ Kaganfwanyile, kohomuwandela keraga: <<Kaing'anani! Nyo eni muhumala ulula eto ahiminyu kinawenda na ndila dapama dawendetchana nyo. Na mwasa wenno hiyo nnafuna ira munivendele mwene ira anitongege na makalelo nnga jinaireya vilambo dimohi diwa da afwihu.>>

⁶ Mbwenye aliwa kagawongile ira: <<Nnafuna munivendele mwene ira anitongege!>>, Samuweli kaziveliwile yovepa yewa. Mwa enne ohonvepa Yehova zelru tivi afuna liye iranavo.

⁷ Aganvepile, Yehova ohomuwakula Samuweli, liye ira: <<Karumela yovepa ya atwayo. Mwasiwa eno aliwa kinaukonda weyo, mbwenye anadikonda miyo ira dahakaleve mwene wewa.

⁸ Tchoira romela siku daatukunle miyo Ijipitu, aliwa annanave dihiya dowa akokorelaga amilugu amohiwa. Eto peno anauirela weyo yengo imohive yenno inadiirela atu miyo.

⁹ Mwa eno, weyo inafwanela uvwelele jatene jinauvepe atu. So mbwenye inafwanela uvayele awandela makalelo orutcha anafuna tongaga mwene wenno unafuna atongaga.>>

¹⁰ Noira eno, Samuweli ohodowaga awandela atu atene mazu matene awongile Yehova zela matongelo a mwene wenno kanvepile atu.

¹¹ Ohawandelaga eraga: <<Makalelo anafunege utongani mwene, ba ala. Liye unoatukula ahiminyu a anapongwe ira kakale anyakondo aye. Unoagawamo amohiwa kakale anyakondo ogwela aaterelado, amohiwa kakale aliba wendiha kavalo, amohiwa kakale anyakondo otamanga na mendo sogolro wa aaterelado ale.

¹² Amohiwa unoahela ira kakale asogolrelri a anyakondo 1.000. Amohiwa asogolrelri a anyakondo 50. Amohiwa unoaruma ira kadowe kalimege, kahandege mmindani mwaye. Eto amohiwa anerege sakanya fwaramento dowanana kondoni na jofuneya jatene ja aaterelado a kondoni.

¹³ Mwene eto unerege asokela ahiminyu a ahiyana. Aliwa anerege kana mabasa omusakanyela mwene maperefume eto kamupiyelege jodja jaye vamohi no muwotchela pawu daye.

¹⁴ Liye unerege uwakani minda dinyu dapama dolimamo jalo nari minda dinyu da uva ante minda da mitengo da azeti. Unotukula jatene jejo aavahege anamalabaye.

¹⁵ Liye unerege tukula janekumi ja mmundani na johanda ja uva, aavahege asogolrelri aye na anamalabaye.

¹⁶ Liye eto unerege uwakani anamalaba enyu a alombwana vamohi na a ahiyana na azombwe enyu apama na aburu enyu apama, adowe alabegena.

¹⁷ Liye unerege tukula yanekumi ya mabila enyu eto nyo munakala azari aye.

¹⁸ Jaireya eno, nyo munoza munle ira muvuneliwe na mwasa wa mwene wenno mmusakunlre nyo. Mbwenye Yehova kaza avwa yovepa yenyu.>>

¹⁹ Evale atwale kagavwile jawonga Samuweli jile, aliwa tchabanlre. Mofutukula kohowakula, aliwa ira: <<Nari! Hiyo nnafuna nimukayena mwene.

²⁰ Hiyo nnafuna nikale nnga atu a vilambo dimohi diwa. Mwene wenno nnafuna hiyo mukana gunanitongege, anisogolrelrege mukondoni eto awanege na amwidanihu.>>

²¹ Samuweli agavwile jatene jawongile atu, ohodowa muwandelamo Yehova.

²² Evale Yehova ohomuwakula, liye ira: <<Usakanye nnga mwemo munafunela atu. Waavahe mwene.>> Noira enne, Samuweli ohavepa alombwana atenene a Ana Izarayeli ira: <<Jatene ejo jihimala vweya. Nyo mubabihe welela mmavande mwinyu.>>