1 Samuweli 6 - Mazu Otchena a Mulungu

AFilistewu kohaweliheda aIzarayeli Kaxa ya Yopangana

¹ Mwa enne Kaxa ya Yopangana ya Yehova ile yohomala medi mitanu na minli yagali mwilamboni mwa aFilistewu emule.

² Evale aFilistewu kohaitanihaga anamakuta ewa na aliba wombeza. Evale kagazile, kohafukaga, aliwa ira: <<Hiyo nnafuna nitukule Kaxa ila ira nivelele wa annya mwasiwa inosimbwa nizuzumiha. Kodi makalelo bavi anafuna hiyo velela Kaxa ya Yehova ila?>>

³ Aliwa kagavwile, kohawelruzaga aFilistewu ale keraga: <<Mwafunaga jovelela Kaxa ya Mulugu wa aIzarayeli, kamudowena Kaxa ve oka nari! Inafwanela mudowena vamohi na mukuto ira mudowe mwanvahe Mulugu wa aIzarayeli ira akale mukuto omaliha mulandu wehu. Mwera eno, munovulumuwa eto munoiziwa mwasiwa unautolotchelani liye.>>

⁴ Evale aFilistewu ale kohafukagave, aliwa ira: <<Nnga mukuto ofwanela nnafune hiyo velela ira akale mukuto omaliha mulandu wehu, akale mukuto nni?>> Aliwa kohowakula, atu kwi: <<Inafwanela musakanye vizimbela tanu da oru eto musakanye mitoro mitanu da oru molingana na numero na amwene a mwilamboni muno. Mwasiwa urenda unafwanyeyana nyo gu mmohive ukwakwanile muwari mwa amwene atene a mwilamboni muno.

⁵ Musakanye jofwalrafwaniha ja vizimbela na mitoro dedo nnanonga jalo ilambwihu ila, munvahe Mulugu wa Izarayeli momutamalela. Mwera eno, afwase Mulugu podi ukumihanimo mmakatamihoni munafwanyeya nyo vamohi na amilugu enyu, vamohi na ilambwinyu!

⁶ Mbwenye mwera mukale ovitukulela nnga jairile mwene Farawu na akuda Ijipitu afwaye, munotongiwa na makalelo abure kwaranya jionne nyo. Nyo kamudiwale ira Mulugu agaatongile aIjipitu, kohofiyeda ahiya aIzarayeli, aliwa dowaga.>>

⁷ <<Inafwanela musakanye aterelado muxa, mutukule ng'ombe mbinli dokana ahima owamwa, dedo dili dahanababihe tutumula aterelado. Mumangelele ng'ombe dambinli dene edile na aterelado ule. Mbwenye ahimiwale mwaatukule, mudowe mwaavolotchihe mukolrani mwiwa.

⁸ Mutukule Kaxa ya Yehova, mugwelihe muatereladoni. Mugwelihe eto mmambalo kaxa imohiwa yokanamo jengo jinafuna nyo sakanya ja oru jile ira jikale mukuto omaliha mulandu wehu. Mwagamanle irana jatene jejo, mutapule ng'ombe dile ira Kaxa ile idowege uiziwile atu.

⁹ Muing'anege pandi unafuna dowaga kaxa ile. Mwaona iharaga ndila inadowa umohi uwa wene, nnowanda iziwa ira marenda nanna hiyo ala, azihile kaali Mulugu, so kazile okave, aliwa lingana na tempu yazile Kaxa ile. Mbwenye mwaona iharaga ndila yodowa sidadi ya Bete-Semeji muwari mwa ilambo ya aIzarayeli, nnovayela iziwa ira na ibaribari urendola arumihile ali Mulugu wa aIzarayeli.>>

¹⁰ Nomala enne, aFilistewu ale kohoiragana nnga mwemo mwawandeliwele atu. Aliwa kohotukulaga ng'ombe mbinli dokana ahima, aliwa mangelela aterelado. Nomala aliwa atukula ahima a ng'ombe dile, dowa ahela mukolrani.

¹¹ Nomala eno, kohotukulaga Kaxa ya Yopangana ya Yehova ile vamohi na kaxa ya jofwalrafwaniha ja oru jasakanyile atu ja vizimbela tanu vamohi na mitoro mitanu dile, aliwa hela muatereladoni mule. Nomala enne, kohiyaga ng'ombe dile ira didowege wafuna atu.

¹² Ng'ombe dile kagahiyile, daharilege ndila yodowa Bete-Semeji. Dowenda dinlaga mofwaseya, diharaga ndila imohive yenne, aliwa dowaga jiwa sogolrove, nne peruwa muwononi odjana nne muwononi oromana. Eto amwene atanu a aFilistewu ale kohoromaga hara ng'ombe dile wayaga atu ante aliwa dowa fiya wandamelana sidadi ya Bete-Semeji.

¹³ Evale tempu ng'ombe dile dafiya atu sidadi ya Bete-Semeji ule, kohokalawo atu kaligi mudaboni karendaga tirigu. Evale akuda Bete-Semeji ale morurumutcha kohoonaga Kaxa ile izaga. Kagaonne, kohagalalaga valukulu.

^14-15 Ng'ombe dile dohodowaga imeliha aterelado ule wandamelana nibwe nlukulu mmundani mwa mulombwana mmohi eriwa Jozuwe. Mwa enne kohokalawo aLevi kazile, aliwa tukula Kaxa ya Yehova ile na kaxa mwemo mwafwanyeyaga josakanya ja oru jile, aliwa titihamo, dowa goromeya vazulu va nibwe nlukulu nne. Akuda Bete-Semeji, kohokarakasula aterelado ule ira dikale kuni, aliwa tukula ng'ombe dile, aliwa pa, velela mukuto otumeya wa Yehova. Siku nimohive nenne akuda Bete-Semeji ale kohozagana mikuto dimohi diwa, aliwa velela momutamalela Yehova.

¹⁶ Eto amwene atanu a aFilistewu ale kagaonne jatene jaireyile, kohorungunuwaga siku nimohive nenne, aliwa welela waniwa Ekoromi.

^17-18 Fwanyeya ira aFilistewu kohokana amwene atanu katonga mwilamboni mwiwa mule. Kada musogolrelri atonga sidadi imohi yawerewerihiwile muru mulukulu na tatamo dimohi dawandamenle sidadile. Sidadi tanu datongiwa na asogolrelri atanu a aFilistewu ale ti di: Ajidode, Gaza, Ajikelomi, Gate, Ekoromi. Evale aFilistewu kavelelaga wa Yehova vizimbela tanu na mitoro mitanu da oru dile, kabanlre ira kada sidadi ivelelege izimbela imohi na mutoro mmohi ira jikale mukuto omaliha mulandu. Fwanyeya ira nibwe nlukulu neno vahiyilege aLevi Kaxa ya Yopangana mmundani mwa mulombwana Jozuwe wenno ali nkuda Bete-Semeji, fiyeda peno nibwe nne nnafwanyeyave evale nnga umboni zela jejo jaireyile.

Fiya wa Kaxa ya Yopangana ilambo ya Kiriyati-Jeyarimi

¹⁹ Mwilamboni mwa Bete-Semeji mule mohovenyaga alombwana, aliwa dowa patamela muwari mwa Kaxa ya Yopangana ya Yehova ile. Kagapatamenlemo, Yehova ohapaga alombwana 70. Evale na mwasa wa atu anne kakwile, atu kohonlaga valukulu zela atu adjindji anno aapile Yehova.

²⁰ Evale akuda Bete-Semeji kohowongaga keraga: <<Unawanda kalawo vamentoni va Yehova wenno uli Mulugu Otchena bani? Nidowe nahiye waani Kaxela ira ikale olapela wene na hiyo?>>

²¹ Mwa enne koharumaga atu angasi angasi ira: <<Muvenye mudowe mwaawandele atu anafwanyeya sidadi ya Kiriyati-Jeyarimi muire: <Kaxa ya Yopangana ya Yehova yenno yatukunle aFilistewu ile, kohoiweliha inafwanyeya uno! Muvenye, muze mutukule, ikale na nyo!> >>