1 Samuweli 5 - Mazu Otchena a Mulungu

Kaxa ya Yopangana yagali mwilamboni mwa aFilistewu

¹ AFilistewu ale kohotukulaga Kaxa ya Mulugu ile kakumagana Ebenezeri waawakile atu aIzarayeli ule, aliwa idowana sidadi ya Ajidode.

² Evale aFilistewu ale kagatukunle Kaxa ya Mulugu ile, kadowile ihela munyumbani mwa mulugu wewa aitaniwa Dagomi, aliwa wandameliha na ikwamutu yosema ya Dagomi.

³ Mwa enne mmetcheloni muwa akuda Ajidode kagavenyile na mabebehene, funa volowa mmba mule, kanfwanyile mulugu wewa Dagomi ule uhugwa vasogolro va Kaxa ya Yopangana ya Yehova ile, muru aing'anaga vati kalaga nnga unaikokorela Kaxa ile. Mwa enne kohoivenyihaga, aliwa imetcha vakoka vene, aliwa dowa gona.

⁴ Mbwenye mmetcheloni muwa na mabebehene, funa ira kawelelemo, kafwanyile Dagomi uhugwa nnga unaikokorela Kaxa ya Yehova akoka. Muwari mogwa mule, muruwa na miwono diwa daminli dene johogwadeyagawo, aliwa dowa morela va mulango kanyingala atu kavolowaga mmba mule. So mbwenye yosema ile yahanlegena maningove bahi.

⁵ Na mwasa wenno anamakuta a Dagomi anafwanyeya Ajidode vamohi na atu atenene anamulobela Dagomi ule, fiyeda siku na peno kafunaga volowa mmba mule, analupavo vamulangoni vale.

⁶ Jagaireyile enne, Yehova ohovenyihaga ndanda naye wa kopolo, liye roma arendjetchaga akuda Ajidode, liye azelihedaga urenda wa vizimbela, roma akuda Ajidode fiyeda atu atene kawandamenle ilambo yenne.

⁷ Mwa enne vaonne atu urenda waavahile Mulugu ule, kohowongaga, aliwa ira: <<Mulugu wa aIzarayeli unitonga hiyo atenene vamohi na mulugu wehu Dagomi. Yapamiwa Kaxa ya Mulugu wa aIzarayeli ivenyemo mwilamboni mwehu muno.>>

⁸ Evale koharuma atu ira kaagumanihe amwene atanu a aFilistewu. Evale andimuwa kagagumanne, akuda Ajidode kohofuka ira: <<Niireni avi na Kaxa ya Mulugu wa aIzarayeli?>> Evale aliwa kohowakula ira: <<Yapamiwa Kaxa ya Mulugu wa aIzarayeli ila ivire, idowe yakale sidadi ya Gate!>> Mwa enne kagavwile zelru yenne, aliwa kohotukula Kaxa ya Mulugu wa aIzarayeli ile, ivirana, aliwa idowana sidadi ya Gate.

⁹ Eto mwa enne vadowilena atu Kaxa ile sidadi ya Gate, Yehova ohorungunuwa, liye arumiheda makatamiho malukulu akuda Gate. Na aliwene Yehova ohavaha urenda wewa wohokala wa masika wa vizimbela, roma ahima ante vamohi na andimuwa atenene.

¹⁰ Evale na aliwene kohotukulaga Kaxa ya Mulugu ile, aliwa dowa ihiya sidadi ya Ekoromi. Mwa enne akuda Ekoromi vaonne atu Kaxa ya Mulugu ile ifiyaga waniwa, kohowongaga monla keraga: <<Ii, akuda Gate kazelana Kaxa ya Mulugu wa aIzarayeli ira kanipe hiyo na atwihu atene!>>

¹¹ Evale na aliwene kohagumaniha amwene atene a aFilistewu akoka, aliwa kwi: <<Hiyo nnafuna mutukule Kaxa ya Mulugu wa aIzarayeli ile, mudowe mwahiye wakoka wene wali atu ilambo ya aIzarayeli. Mwasiwa mwahiya wewuno, inomala nipa hiyo na atwihu.>> Kawongela eno mwasiwa musidadi mwatene mohokwa atu adjindji na jonongeya jidjindji na mwasa wa makalelo abure Mulugu aatongile liye na ndanda naye na kopolo.

¹² Eto atu anne kahakwile koonihiwa goyi na vilonda da vizimbela fiyeda nla wa atu atene a sidadile gwelaga zulu.