1 Samuweli 4 - Mazu Otchena a Mulungu

AFilistewu kohotukula Kaxa ya Yopangana ya Nabwiya

¹ Mwa malambo anne aIzarayeli kohovenyaga ira kadowe kawane na aFilistewu. AIzarayeli misasa diwa kohomangaga Ebenezeri, aFilistewu misasa dewa aliwa manga Afeki.

² Mwa enne kohoromaga wana. Kawanaga, aFilistewu ale kohagondjihaga aIzarayeli, aIzarayeli aliwa roma porotchiwa na makalelo ohokala a masika fiyeda aliwa kwa alombwana okwakwana 4.000.

³ Mwa enne anyakondo a aIzarayeli kagawelenle vamisasani viwa, andimuwa a aIzarayeli kagavwile jaireyile, kohowongaga, aliwa ira: <<Kodi mwasiwa gwa nni Yehova anihiya peno ira nigondjihiwe na aFilistewu?>> Mwa enne kohelavo zelru keraga: <<Naarumeni atu kadowe ilambo ya Silo, katukule Kaxa ya Yopangana ya Yehova ira nizena wewuno, ize ikale vari vehu eto inivunele mmandani mwa amwidanihu.>>

⁴ Mwa enne koharumaga atu Silo ira kadowele Kaxa ya Yopangana ya Yehova wa Makuru Matene, wenno unakala vari va akerubi ambinli. Ora yenno, mulombwana Hofini na mbalaye Fineyasi anno kali ana Eli kohokalavo kavelelaga kaxele kadowagana wafwanyeya aIzarayeli.

⁵ Evale alombwanale kagatukunle Kaxa ya Yopangana ya Yehova ile kazagana, aIzarayeli vaonne atu Kaxa ile izaga, kohokuwaga moteyela na makalelo ohokala a masika fiyeda teya tekenyeya.

⁶ Evale aFilistewu ale kagavwile kuwa wa aIzarayeli, kohowonga keraga: <<Kuwa undimuwa unavweya misasani wa aEberewu unatapulela nni?>> Mwa enne kagaiziwile ira aIzarayeli kakuwela na mwasa oira Kaxa ya Yehova yohoza,

⁷ kohoromaga ova kawongaga keraga: <<Nihikwa hiyo! Alombwana, akala gu mulugu mmohi uzile wa aIzarayeli ule, hiyo nihimala gondjihiwa. Tchoira kajinababihe ireya jokala ha jeji.

⁸ Nihikwa hiyo! Nnga unafuna nivunela wa amilugu andimuwa anno bani? Tchoira amilugu anno banne kaapile aIjipitu na jionihedo jabure johiyana hiyana muisalesaleni!>>

⁹ Eto kohoromaga limbihana keraga: <<Alombwana a aFilistewu, inafwanela nikale atu olimba murima, niwaneni nnga alombwana tawiha ira anoza kanigondjihe, kanitukule ira nidowe nakale azari a aEberewu nnga jaairilena hiyo, naatukula, kakala azari ehu wanle! Nona inafwanela nikale alombwana, niwane mwa kopolo!>>

¹⁰ Kagairile enne, aFilistewu kohovenyaga, aliwa dowa roma wana kondo akoka na aIzarayeli. Mwa enne tempu yawana atu, aFilistewu ale kohofiyeda mwezo oagondjiha aIzarayeli. Evale kada mutu otawelaga vande vaye eto kohopiwaga anyakondo a aIzarayeli ohokala a masika okwakwana 30.000 owenda na mendo.

¹¹ Noira enne, aFilistewu ale kohotukulaga Kaxa ya Mulugu ile, aliwa dowagana jiwa. Eto ana Eli ambinlene Hofini vamohi na Fineyasi kohokwaga siku nimohive nenne.

Kwa wa Namakuta Eli

¹² Mwa enne ohokalawo mulombwana mmohi wa nlogo na Benjami avuluwilege kondoni ule. Siku nimohive nenne, liye ohotamanga ante dowa fiya ilambo ya Silo. Afiyaga, afiyile agamanle kawula jowara jaye eto aganna teya mmuruni mwaye muwari motonyiheda kumbanya waye.

¹³ Mwa enne tempu yafiyaga liye musidadi mule, mulombwana Eli agaratilege vakaderani vaye wandamelana mundila, aing'anaga ndila. Tchoira liye ohokana kumbanya ulukulu zela Kaxa ya Mulugu yatukunle atu ile. Mwa enne mulombwanole agafiyile, ababihilege volowa musidadi mule, liye roma awandelamo atu atene zela jejo jaireyile. Atwale kagavwile mazu anne, kohoromaga nla dugu dugu dugu.

¹⁴ Mwa enne namakuta Eli agavwile kuwa zela nla wanlaga atu ule, ohotikinaga eraga: <<Kodi kuwa uwa wo kwa nni?>> Mohodibeliwa pazaga eto mulombwanole ira amuwandelemo Eli jatene jaireyile.

¹⁵ Mwa tempu yenne mulombwana Eli anna yaka 98 eto meso aye kohogoma fiyeda liye haonaga.

¹⁶ Mwa enne mulombwanole ohofiyaga valigi namakuta Eli, liye roma muwandelamo eraga: <<Miyo eni ditawile kondoni eto peno eva miyo tamangaga ante za fiya uno eni.>> Eli ohonfuka, liye ira: <<Kodi iireyile nni mwanaga?>>

¹⁷ Evale liye ohomuwandelagamo eraga: <<Mulogo wa aIzarayeli kohatawa aFilistewu. AIzarayeli kohomala gondjihiwa na makalelo ohokala a masika. Eto hiya ejove bahi, ahiminyu ambinlene Hofini na Fineyasi kohopiwa eto aFilistewu kohotukula Kaxa ya Mulugu, kohodowana.>>

¹⁸ Mwa enne mulombwana Eli agavwile ira: <<Kaxa ya Mulugu ihitukuliwa!>>, liye ohovivoka vakaderani vagaratilege liye vale wandamelana va mulango vale, liye gwela unduli waye na igogori. Muwari moira liye ali mulombwana oruva eto ohomala ulula, gwa wagwile liye, nikohi naye nohokotowaga ante liye fiyeda kwa ora imohive yenne. Eli aasogolrenlre aIzarayeli yaka 40.

Kwa wa mwadi marafula Fineyasi

^19-20 Eli ohomukana nijaliye wenno ali Fineyasi muhiyanaye. Tempu yenno nijaliye ule afwanyeya aganna vambani eto tempu yaye yobala yagamukwivenle. Mwa enne liye agavwile ira: <<Kaxa ya Mulugu ihitukuliwa eto nijalawo vamohi na mamunawo kohokwa!>>, mbani mwaye mohotatamuwaga, liye roma ona upa. Muwari mwa upa waonaga liye, ohofwanyeyagana bulela wohokala wa masika, halaga vang'onove ira akwe. Mbwenye ahanakwe, agahanle vang'ono, ohombalaga mwana wa mwanapongwe. Evale ahiyana afwaye kambalihaga kohomuwandelaga, aliwa ira: <<Kukatamiheye tchoira weyo eni uhumbala mwanapongwe!>> Mbwenye liye mwa jatene jawongaga atu jile kabalraga nne kawakunlegeve yengo.

²¹ So wonga uwa, liye anvahile mwanole nzina na Ikabu [ku wonga kavali undimuwa], liye ira: <<Undimuwa wawenda na hiyo aIzarayeli peno uhunitawa.>> Liye awongele eno na mwasa oira Kaxa ya Mulugu yawendetchana atu yohotukuliwa na aFilistewu eto na mwasa oira mamunaye vamohi na nijaliye kohokwa.

²² Amariheyaga, ohowonga akoka, liye ira: <<Voira Kaxa ya Mulugu ihitukuliwa na amwidanihu, undimuwa wawenda na hiyo aIzarayeli uhumala nitawa.>>