1 Samuweli 3 - Mazu Otchena a Mulungu

Yehova ohomutwanyuwela Samuweli

¹ Tempu yenne muzombwe Samuweli alabetcha mabasa a Yehova muwari mosogolrelriwa na namakuta Eli. Mwa tempu yenne Yehova kawongetcha na atu burebure eto kaaonihetcha jengo burebure atu mmuruni mwiwa.

² Siku nimohi na mahiyu mulombwana Eli ohodowaga gonanti kwartuni waye wagonetcha liye. Mwa tempu yenne mulombwana Eli meso aye kaona vang'ono bahi.

³ Siku nenne muzombwe Samuweli agonnege muwari mwa Nyumba ya Yehova mwemo mwafwanyeya Kaxa ya Mulugu. Eto ora yenno panti ya Mulugu yalive yohindene.

⁴ Evale Yehova ohomuitanaga Samuweli. Liye ohorumelaga eraga: <<Miyo vano!>>

⁵ Mwa enne Samuweli ohovenyaga, liye tamanga dowa wa mulombwana Eli eraga: <<Dihiza mwasiwa dihivwa mudiitanaga.>> Evale Eli ohowakulaga, liye ira: <<Nari, miyo kaduitanne! Dowaga wagonanti.>> Samuweli ohovenyaga, liye dowa gonanti.

⁶ Agagonantile, Yehova ohomuitanaga akoka, eraga: <<Samuweli!>> Liye ohovenyaga, liye dowa wa namakuta Eli, liye ira: <<Dihiza mwasiwa dihivwa mudiitanaga.>> Eli ohowakulaga, liye ira: <<Nari mwanaga, miyo kaduitanne. Venya udowe wagonanti jawo.>> Liye venya dowa gonanti.

⁷ Tempu yenne Samuweli ali ahanaiziwe nizu na Yehova aitanaga, mwasiwa Yehova ali ahanarome wonga na liye.

⁸ Nomala enne, Yehova ohomuitanaga muzombwe Samuweli akoka fendo yaneraru. Evale Samuweli ohovenya dowa wa Eli wakoka wene, liye ira: <<Dihiza mwasiwa dihivwa mudiitanaga.>> Evale Eli paonenlregemo liye ira unamuitana gu Yehova.

⁹ Mwa enne Eli ohomuwakulaga Samuweli ira: <<Miyo kaduitanne. Dowaga wagonanti! Mbwenye wavwa itana akoka, kuvenye uza uno, so mbwenye urumele wire: <Yehova kawongani. Miyo namalaba wenyu dili vano, nnavuruwana!> >> Mwa enne Samuweli ohovenyaga, liye dowa gonanti vakoka vene.

¹⁰ Samuweli agadowile gonanti, Yehova ohozaga liye imela, roma muitana akoka eraga: <<Samuweli! Samuweli!>> Liye ohowakulaga eraga: <<Kawongani Yehova! Miyo namalaba wenyu dili vano, nnavuruwana!>>

¹¹ Evale Yehova ohoromaga muwandela Samuweli eraga: <<Miyo nnafuna disakanye yengo yotikiniha muwari mwa aIzarayeli. Yengo inafuna miyo sakanya, mutu wenne unavwe zela ubure unafuna miyo irana, unokala waheyo.

¹² Siku niwa naza nifiya, miyo nnafuna disakanye jotikiniha jatene jene jimuwandenle miyo mulombwana Eli zela makalelo anafuna miyo tonga vande vaye.

¹³ Miyo dihimala muwandela mulombwana Eli ira nnafuna daatonge atu a muibalini mwaye kala no kala. Mwasiwa ahimaye kohodiluluviha miyo vano eto babiwa Eli agaiziwileve ira miyo nnoatonga, kafunne ahiyiha.

¹⁴ Eto miyo nnolumbela vamentoni va akuda Eli ira masiki aliwa kavelele mukuto ohokala wa masika na jovelela jimohi jiwa, kadiza dilevelela jotakala jewa.>>

¹⁵ Samuweli agamanle wandeliwa mazu matene anne na Yehova, ohokala vakamani vaye evale fiyeda unde tcha. Unde wagatchile, ohovenyaga, liye hula milango datene da Nyumba ya Yehova. Eto liye ohoova muwandela mulombwana Eli jatene jamuwandenle Yehova mahiyu anne muwari momuoniha jengo mmuruni mwaye. Na mwasa wenne, ohomiyalagana jaye.

¹⁶ Mbwenye Eli ohomuitanaga Samuweli, liye ira: <<Mwanaga Samuweli!>> Liye ohomurumelaga, liye ira: <<Gu miyo vano.>>

¹⁷ Evale Eli ohonfuka ira: <<Kodi Yehova uuwandenle nni mahiyu? Inafwanela udiwandelemo jatene juuwandenle liye tchoira wadikuwa yengo imohi wahadiwandela, Mulugu autonge na makalelo anafuna liye!>>

¹⁸ Noira enne, Samuweli ohomuwandelagamo jatene jamuwandenlege Yehova, kamukuwilege nne yengo imohi. Evale Eli agavwile jatene jawongilege Samuweli, ohowongaga, liye ira: <<Liye gu Yehova! Airena malringana munaonele liye!>>

¹⁹ Evale muzombwe Samuweli ohoulukula. Eto Yehova ali na liye. Jatene jene Samuweli jawonga liye joireya.

²⁰ Mwa enne aIzarayeli atene kuma ilambo ya Dani fiyeda ilambo ya Beriseba kohomala iziwa ira Samuweli gu namafiyiheda wa Yehova.

²¹ Noira eno, Yehova omutwanyuweletchave mulombwana Samuweli ilambo ya Silo yakaletcha liye ile. Mwa enne Yehova owonga jengo na Samuweli, Samuweli dowa awandelaga aIzarayeli atene.