1 Samuweli 29 - Mazu Otchena a Mulungu

AFilistewu kohomukayikela mulombwana Davi

¹ Ora yenno aFilistewu kafwanyeya kagaagumanihile makuru ewa a anyakondo ilambo ya Afeki. Eto aIzarayeli na aliwene kohodowaga, aliwa kunga misasa diwa wandamelana isime yafwanyeya ndabo na Jezereli.

² Evale amwene a aFilistewu kadowaga kondoni, kohoroma atanda anyakondo ewa, muwari mwa makuru a 1.000 na makuru a 100. Eto mwa tempu yenne mulombwana Davi vamohi na atwaye ale na mwene Akiji, koaharaga mundulri mwiwa.

³ Mwa enne asogolrelri a aFilistewu kagamuonne mulombwana Davi vamohi na atwaye ale kaaharaga mundulri mwiwa, kohonfukaga mwene Akiji keraga: <<Kodi aEberewu ala, wewuno anahindawo nni?>> Evale Akiji ohawakulaga asogolrelri a aFilistewu ale, liye ira: <<Ula gu Davi. Liye wanle ali munyakondo wa Sawuli mwene wa aIzarayeli. Mbwenye eniva liye umala malambo oindjivene agali na miyo. Eto kakalevo unafuna muwanganyedana yengo ili yatene, tchoira romela siku nilupile liye aza wa miyo, fiyeda peno kanasakanye yengo yabure.>>

⁴ Evale asogolrelri a aFilistewu ale kohomutakaleliwaga mwene Akiji. Na mwasa wenne, kohomuwandelaga keraga: <<Kamuweliheni mulombwana Davi, adowege sidadi yenno invahile nyo. Kavali wandeya ira liye adowe kondoni vamohi na hiyo. Tawiha ira tempu yowana, liye podi za nirungunuwela jaye. Tchoira liye anipa hiyo, Sawuli yomutakaleliwa ile inommalela, arungunuwe, arome muziveliwa.

⁵ Eto mulombwanoyo gwenno ahiyana kamuimbetcha atu kainaga keraga: <Sawuli uhapa atu tchikwi mbwenye Davi uhapa atu matchikwi na matchikwi!> >>

⁶ Evale mulombwana Akiji ohomuitanaga Davi amuwandelaga eraga: <<Miyo nnawonga vamentoni va Yehova okalawo ira miyo kaduonnena yabure eto miyo dohofuna ira weyo udikamihedege mukondoni. Miyo romela siku nazilege we fiyeda peno kadufwannyena yabure. Mbwenye amwene afwaga anauwanganyeda.

⁷ Mwa eno, weyo uvenye, udowege vande mwa murendele tawiha ira unaatakaleliwihe amwene afwagale.>>

⁸ Evale Davi ohowakulaga, liye ira: <<Kodi yabure nni isakanyile miyo? Kuma siku nizile miyo fiyeda peno, mudionnena yabure nni? Mwasiwa gwa nni dahanadowele miyo eto mwasiwa gwa nni dahanawanele miyo na amwidani enyu mbwiyeni so mwene?>>

⁹ Akiji ohowakula, liye ira: <<Miyo dihiiziwa jejo eto nnouona kala ororomeleya nnga mungelro wa Mulugu. Mbwenye asogolrelri a anyakondo afwaga bawongile ira: <Hiyo kannanfuna Davi ira adowe vamohi na hiyo kondoni.>

¹⁰ Mwa eno, metchelo na mabebehene muvenye, weyo vamohi na alombwanawo, mugundeye na mabebehene unde watchaga, mudowege vande.>>

¹¹ Evale mmetcheloni muwa na mabebehene, Davi na atwaye ale kohovenyihanaga ira kawelele ilambo ya aFilistewu. Eto aFilistewu kohodowaga musogolro kondoni ule ilambo ya Jezereli ira kadowe kawane na aIzarayeli.