1 Samuweli 28 - Mazu Otchena a Mulungu

¹ Mwa malambo anne, aFilistewu kohagumaniha anyakondo ewa ira kadowe kawane na aIzarayeli. Mwa enne Akiji ohomuwandela Davi, liye ira: <<Inafwanela uiziwe ira weyo vamohi na atu atene anafwanyeya na weyo munerege dowa kondoni vamohi na miyo ira mudikamihedege.>>

² Evale Davi ohowakulaga, liye ira: <<Tabo, kavali makani. Eto nyo munafuna muone makalelo anafuna miyo irana dagali namalaba wenyu!>> Eto Akiji ohowongaga, liye ira: <<Miyo nnafuna weyo ukale gwarda odiing'anela miyo kalawo waga watene!>>

Sawuli ohonfuka ng'anga okwima ira amuwandele yenno yafuna liye ira

³ Tempu yenne yali tempu Samuweli agakwile. Eto vakwile liye aIzarayeli kohomunlelaga, nomala aliwa dowa mukoya waniwa sidadi ya Rama. Eto tempu yenno yali Sawuli agamanle atamangihamo mwilamboni mwa Izarayeli mule aliba kuta mukuto wa azimu na aliba tapanya na azimu.

⁴ AFilistewu kohogumanelaga, aliwa dowa kunga misasa diwa wandamelana tatamo ya Sunemi. Eto Sawuli ohagumanihaga aIzarayeli atene, aliwa dowa kunga misasa diwa mwango wa Jilibowa.

⁵ Mwa enne Sawuli agaonne nikuru na anyakondo a aFilistewu, liye ohoroma ova eto murimaye ohonyungulruwa.

⁶ Evale Sawuli ohodowaga nfuka Yehova yafuna liye ira. Mbwenye Yehova kaamuwakunlege, nne muwari moroha, nne muwari mwa Urimi, nne muwari mwa anamafiyiheda.

⁷ Evale Sawuli ohawandelaga anamalabaye, liye ira: <<Mudowe mwanvende muhiyana mmohi owanda wonga na azimu ira miyo didowe danfuke inafuna hiyo ira!>> Anamalabaye ale kohomuwakulaga, aliwa ira: <<Ilambo ya Eni-Dori, uhukalawo maliba wanda wonga na azimu.>>

⁸ Evale mwene Sawuli ohowungula jowara jaye ja umwene, liye wara jowara jimohi jawara atu ira ahaiziweye. Unde wagadibile, ohovenyihanaga vamohi na alombwanaye ambinli ira kadowe kanfwanye muhiyanole. Agafiyile wa muhiyanole, ohowongaga, liye ira: <<Miyo nnafuna mmugwelihe muzimu wa mutu wenno nnafuna miyo muromola ira diwande tapanya na liye!>>

⁹ Muhiyanole ohowakula eraga: <<Na ibaribari weyo uhuiziwa yenno iirile mwene Sawuli. Liye uhatamangihamo mwilamboni mwa Izarayeli aliba kuta mukuto wa azimu na aliba tapanya na azimu atene. Nnga mwasiwa gwa nni weyo funaga dihela mmungohini ira miyo dikwe?>>

¹⁰ Evale mwene Sawuli oholumbelaga na nzina na Yehova eraga: <<Miyo nnawonga vamentoni va Yehova okalawo ira weyo kunakwa na mwasa oirana yenno.>>

¹¹ Evale muhiyanole ohonfukaga, liye ira: <<Nnga weyo unafuna ira miyo dimugwelihe muzimu waani?>> Liye ohowakulaga, liye ira: <<Nnafuna umugwelihe muzimu wa Samuweli!>>

¹² Evale muhiyanole agamuonne Samuweli, ohoroma kuwa morendjeya. Agakuwile, ohowonga ira: <<Kodi mudinyengele nni? Nyo muli mwene Sawuli!>>

¹³ Mwene Sawuli ohowakulaga, liye ira: <<Kuove! Kodi unaona nni?>> Liye ohowakulaga ira: <<Nnamuona muzimu mmohi akumaga vati, agwelaga.>>

¹⁴ Nomala enne, Sawuli ohonfuka muhiyanole, liye ira: <<Muzimu unamuona we uyo, unna makalelo bavi?>> Liye ohowakula ira: <<Liye gu mundimuwa uwarile kapa eto unagwela!>> Mwa enne Sawuli ohovayelaga iziwa ira: <<Podi pii, wenno gu Samuweli!>> Mwa enne ohokokorelaga kove yaye vati, momuriheda.

¹⁵ Evale Samuweli ohonfukaga Sawuli, liye ira: <<Katchiye, kodi weyo unadikukumulela nni udigwelihaga?>> Sawuli ohowakulaga, liye ira: <<Miyo dugweliheleni mwasiwa dire kala mmakatamihoni! AFilistewu anafuna jowana na miyo eto Mulugu uhudihiya. Danfuka, kanadiwakula, nne muwari mwa namafiyiheda nne muwari moroha. Nona duitanagani nyo ira mudiwandele inafuna miyo ira!>>

¹⁶ Samuweli ohowakulaga, liye kwi: <<Kodi mwasiwa gwa nni uza udifukaga miyo, agali Yehova umala uhiya, gu mwidanawo?

¹⁷ Yehova umala uirela yenno yawongile liye muwari mwa miyo. Tchoira liye uhuuwaka umwene wawo ira anvahe mutu mmohiwa, wenno unafwanyeya agali Davi.

¹⁸ Tchoira weyo kufunile nvwelela Yehova, kufunile abwanyula aAmaleki atene vamohi na jatene janna atu molingana na uwali wohokala wa masika wanna Yehova. Nona Yehova asakanya jejo na weyo peno va.

¹⁹ Vamohive vevo liye unouvaheda weyo vamohi na mulogo watene wa aIzarayeli mmandani mwa aFilistewu. Metchelo weyo vamohi na ahimawo munomala piwa, muze mukale vamohi na miyo wewuno. Eto Yehova unoavaheda nikuru na anyakondo a aIzarayeli mmandani mwa aFilistewu.>>

²⁰ Evale Sawuli agavwile jatene jawongilege Samuweli jile, ohogwelaga vati ozongowene na mwasa oova jatene ejile. Eto ohowaheyaga na mwasa oira ohomalaga siku nompumbula ntana watene na mahiyu atene ahadjileve yengo.

²¹ Muhiyanole ohozaga valigi Sawuli vale, agamuonne ira ohokukumuwaga, ohomuwandelaga, liye ira: <<Miyo namalaba wenyu duhuvwelelani. Dohovilevela ingumi yaga, miyo irana yovepa yenyu.

²² Miyo nnouvepani ira muirena yenno inafuna miyo vepa. Nnouvepani ira mudihiye didowele yodja ing'onong'onove, mudje mulimbe kopolo ira muwandege wenda ulrendo wenyu pama.>>

²³ Muhiyanole agawongile mazu anne, Sawuli ohorunihaga eraga: <<Miyo kannafuna dja yengo ili yatene!>> Mbwenye anamalabaye aazilegena liye vamohi na muhiyanole kohomukanyihedagave ira adje. Mwa enne ohorumelaga. Liye venya valigi liye vale, liye dowa garati vakamani.

²⁴ Fwanyeya ira muhiyanole vande vaye ohokana mwana ng'ombe yoruva. Ohodowaga pa mwana ng'ombe ile mobaranya. Liye tukula utu wa vang'onove, sakanyana pawu dohosakanyiwana leverina.

²⁵ Evale ohozagana jodja jile valigi Sawuli vamohi na anamalabaye ambinli annaga liye ale, aliwa dja. Kagamanle dja enne, mahiyu mamohive anne kohovenyihana, aliwa tukula ndiliwa dowaga.