1 Samuweli 26 - Mazu Otchena a Mulungu

Davi ohiya ingumi ya Sawuli fendo yanembinli

¹ Mwa tempu yenne kohokalawo akuda Zife kadowile gumana na Sawuli ilambo ya Jibeya, aliwa ira: <<Eni Davi uvitanle mwango Akila, unafwanyeya sogolro wa Jesimoni.>>

² Evale Sawuli agavwile enne, ohovenyaga na alombwana oiziwa wana pama a Izarayeli okwakwana 3.000, aliwa venyihana kadowaga muisalesaleni mwa Zife mwemo mwafwanyeya mulombwana Davi ira kamuhinde.

³ Sawuli na atwaye kakungile misasa diwa wandamelana ndila ya mwango Akila sogolro wa Jesimoni. Mbwenye tempu yenne Davi vamohi na alombwana aye, kohokalave muisalesaleni. Evale Davi agavwile ira: <<Eni Sawuli unaza muisalesaleni muno ira auhinde!>>,

⁴ oharumaga anamawendelela ira kadowe kaone akala javwa liye jile jali ja ibaribari. Mwa enne anamawendelela ale kagawenlewo,

⁵ Davi ohozembaga na mahiyu, liye dowa vamisasani vafwanyeya Sawuli. Agafiyile evale, ohoonaga nimburo nagonantile mwene Sawuli na Abineri mwana Neri, musogolrelri wa nikuru na anyakondo a mwene Sawuli. Fwanyeya ira Sawuli agonantilege vamisasani vale, atwaye atene anne gonanti momuwerewera. Davi agamanle ona jatene ejile, ohorungunuwaga, liye welela mundulri.

⁶ Evale Davi agazile wa atwaye, ohonfukaga Aimeleki, nkuda Eti, na Abizayi mwana wa murongoliye Zeruwiya wenno eto ali Jowabe mbalaye, liye ira: <<Kodi mwa nyo atu ambinli, unafuna dowa vamohi na miyo vamusasani va Sawuli bani?>> Evale Abizayi gwawakunlege, liye ira: <<Miyo nnodowa na nyo!>>

⁷ Mwa enne mahiyu mamohive anne Davi na Abizayi kohomaruwaga, aliwa dowa fiya vamusasani va anyakondo a Sawuli. Kanfwannyege Sawuli agonaga eto mwanango waye agazoromeyiwe vati wandamelana miruzuni waye ule. Eto Abineri na atu atene kagonantilege kagamuwerewerile mwene Sawuli.

⁸ Evale Abizayi ohomuwandelaga Davi eraga: <<Kaing'anani! Mulugu uhuuvahedani peno mwidani wenyu mmandani mwinyu. Nnouvepani ira mudihiye miyo ira dimulate Sawuli na mwanangwaye dimuwambe vateyani vale fendo imohive. Kahi ira nnomulata fendo mbinli. Fendo imohi bahi inokwakwana.>>

⁹ Davi mbwenye ohomuwakulaga Abizayi eraga: <<Nari, kumpe. Tchoira mutu wenne unatukule ndanda naye ampana mwene wenno Yehova umuhambihile liye, Yehova unomutonga.

¹⁰ Miyo nnawonga vamentoni va Yehova okalawo ira liyene mwinnya unompa, hiya kala miyo. Owu hehi liye podi kwa siku naye nafiya. Owu hehi liye podi kwa kondoni!

¹¹ Miyo mbwenye nnafuna Yehova adihiyihe ira dahampe mutu wenno umuhambihile liye! So mbwenye nafunaga, nidowe natukule mwanango unafwanyeya muruni waye ule na jaro ya mahindje ilivo, nidowege!>>

¹² Evale Davi ohovenya, liye dowa tukula mwanango na jaro, jejo jafwanyeya miruzuni wa Sawuli ule, aliwa dowagana. Kalivo nne mutu mmohi aonilege, nne kalivo aiziwilege, nne kalivo arurumuwilege. Atenene keragave gona, mwasiwa Yehova gwairihilege ira aliwa atene kagone kove dilukulu.

¹³ Davi agatukunle jejile oholambuwaga ndabo, liye dowa kombela ya ule. Liye dowa gwela vazulu va nkuma olapa bure, olapela wene na vamusasani va Sawuli vale.

¹⁴ Evale Davi ohomukuwelaga Abineri mwana Neri vamohi na anyakondo atene a Sawuli eraga: <<Abineri we, kodi unodivwa?>> Mwa enne atenene kohorurumuwaga. Kagavwile itana ule, Abineri ohowongaga, liye ira: <<Kodi weyo unamukuwela mwene uli ani?>>

¹⁵ Davi ohowakulaga eraga: <<Kodi weyo uli mulombwana wapamene, owu kuli mulombwanene? Kodi weyo uli munyakondo wa ibaribari wa aIzarayeli? Nnga mwasiwa gwa nni uza wahawandaga muing'anela mwene wawo? Tchineneva ukala azile vevo ira ampe mwene, musogolrelri wawo. Eto weyo kuwandile muing'anela!

¹⁶ Kulabileve yengo. Miyo nnawonga vamentoni va Yehova okalawo ira nyo atenene mwafwanele mukwe bahi, tchoira kamuwandile muing'anela mwene wenyu, wenno uhambihiwe na Yehova. Kaing'anani, mwanango wa mwene na jaro yaye, jejo jafwanyeya miruzuni waye, jili waani?>>

¹⁷ Evale Sawuli ohoiziwaga ira: <<Nizu neno na Davi naye.>> Mwa enne ohowongaga eraga: <<Mwanaga Davi, kodi nizu neno kahi nawo?>> Liye ohowakulaga, liye ira: <<He, gu miyene mbwiyeni, mwene waga!

¹⁸ Nnga mwasiwa gwa nni nyo mbwiyeni munadiharaharela nyo, miyo namalaba wenyu? Miyo diirile avi? Kodi disakanyile yabure nni?

¹⁹ Mbwiyeni so mwene, muvuruwane inafuna miyo wonga dagali namalaba wenyu. Akala ali Yehova airihile ira nyo mudisanduwele miyo, inafwanela aveleliwe wa Yehova mukuto ira liye awande uhiyihani jejo. Mbwenye akala ba atu amohiwene anautujelani ira nyo mudisakege, aliwa katembelrelreye vamentoni va Yehova. Tchoira aliwa kohofiyeda ditamangiha ira miyo dahawande wenda muwari mwa ilambo Yehova inivahile liye, aliwa ditamangihaga ira didowe ilambo imohiwa ira daatamalelege amilugu amohiwene anafwanyeya wewo!

²⁰ Kamudihiye ira miyo dikwele ilambo yowendela, olapela na Yehova! Mwasiwa gwa nni nyo mwene wa Izarayeli divendaga itutu imohi nnga ha miyene? Kodi mwasiwa gwa nni mukalelaga ditamangiha mundulri mwaga nnga mutu asayaga mbalrame ya mmwangoni.>>

²¹ Evale Sawuli ohowongaga eraga: <<Na ibaribari mwanaga Davi miyo duhutegela! Mwanaga, kawelela vande na miyo! Miyo kadiza duirela yabure ili yatene, mwasiwa weyo uhuwanda koya ingumi yaga mahiyu anna, we kudipile. Miyo dali nnga zimora mwa joira jaga. Na ibaribari miyo dihiviringaniha!>>

²² Nomala enne, Davi ohowongaga, liye ira: <<So mwene mwanango wenyu ula! Mmurume muzombwe mmohi aze atukule!

²³ Yehova unomutambilriha kada mutu zela ipama yaye no roromeleya waye. Liye peno ohodivaheda nyo mmandani mwaga. Mbwenye kavili jowandeya ira miyo dimuirele yabure mutu ohambihiwa na Yehova.

²⁴ Na makalelo mamohive nnga dikoyile miyo ingumi yenyu peno va, Yehova akale wenno unafuna dikoya miyo ingumi yaga eto adikumihemo mmakatamihoni mwatene.>>

²⁵ Evale Sawuli ohowongaga eraga: <<Mwanaga Davi, Mulugu aurelihe! Weyo unerege irana jengo jilukulu eto jatene jinasakanyege we, jinerege kwakwanela!>> Noira eno, Davi ohodowaga jaye eto Sawuli ohowelelaga vande.