1 Samuweli 25 - Mazu Otchena a Mulungu

Kwa wa Samuweli

¹ Mundimuwa Samuweli ohokwaga. Agakwile, Ana Izarayeli atenene kohogumanaga, aliwa roma kumbanyaga ukwa waye, aliwa mukoya waniwa, sidadi ya Rama. Nomala eno, mulombwana Davi ohovenyihanaga, liye dowa kalaga isalesale ya Parani.

Davi na Abigayeli

^2-3 Wandamelana isalesale ya Parawu wali Davi ule, ohokalawo mulombwana mmohi eni orayela eriwa Nabali, akaletcha ilambo ya Maome. Liye ohokana mabila okwakwana 3.000 na mbuzi dokwakwana 1.000. Agali liye akaletcha ilambo ya Maome, jifuwo jaye jile jafwanyeya wandamelana ilambo ya Karimelo. Muhiyanaye aitaniwa Abigayeli. Abigayeli ali muhiyana wa toto eto oriyetchetcha. Mbwenye mamunaye Nabali ule ali orutcha bure, okana makalelo madjindji abure. Liye eto ali nkuda Kalebi. Mwa tempu yenne Nabali afwanyeya ilambo ya Karimelo, asataga mawoya a mabilaye.

⁴ Evale mulombwana Davi agalive muisalesaleni emule, ohovwaga ira: <<Mulombwana Nabali unasata mawoya a mabilaye.>>

⁵ Agavwile mazu anne, oharuma alombwanaye kumi, liye awandela ira: <<Mudowe Karimelo mwanfwanye mulombwana Nabali, mmulondjele na nzina naga.

⁶ Mwamuwandele ira: <Nfwinyu Davi unorumiha malondjelo ira murendele akale na nyo eto murendele akale na abalinyu atene eto murendele akale na jengo jenyu jatene munna nyo!

⁷ Davi uhuvwa ira nyo munasata mawoya a mabila enyu. Anamakumbuza enyu vazile atu wa hiyo, kadjihaga mabila enyu, hiyo nohatambilra na makalelo apama eto nne tempu yatene yali atu Karimelo kilivo yengo yewa ili yatene idimenle.

⁸ Mwaafuke anamakumbuza enyu, aliwa anouwandelanimo. Mwa eno, Davi unavepa ira munifwewele murima, mwasiwa hiyo nizile uno tempu ya pwando. So nnouvepani ira munvahe mwaninyu Davi vamohi na hiyo anamalabaye malringana yenno munanifunana nyo!> >>

⁹ Alombwanale kagadowile, kohomuwandela jatene jejile mulombwana Nabali na nzina na Davi. Aliwa dedihaga ira kawakuliwe.

¹⁰ Nabali agavwile mazu anne ohowakulaga eraga: <<Kodi Davi bani? Kodi mwana Jese bani? Miyo mutu wenno kadimuiziwile! Malambwala anamalaba adjindji anoatawa apatarawu ewa.

¹¹ Miyo pawu daga na mahindje aga vamohi na anavinyama daapile miyo, disakanyile ira daavahe anamalabaga anasata mabila. Mbwenye kavili jowandeya ira miyo nnorungunutcha, daavahe atu amohiwa anno kakumile wahaiziwile miyo.>>

¹² Evale anamalaba ale kagavwile mazu awakunle mulombwana Nabali, kohodowaga muwandelamo mulombwana Davi jatene jawongile Nabali.

¹³ Evale Davi agavwile enne ohawandelaga atwaye ale eraga: <<Bahi, kamangelelani masupada enyu mmwinini mwinyu.>> Davi agawongile enne, na liyene ohotukulaga supada naye, liye mangelela mmwinini. Evale ohovenyihana na alombwana 400, amohiwa 200 aliwa hala ira kaing'anelege mitolro diwa.

¹⁴ Ora imohive yenne, muwari mwa anamalaba a mulombwana Nabali ale, ohokalavo mmohi avenyilege, liye dowa nfwanya sinyoraye mwadi Nabali wenno aitaniwa Abigayeli. Aganfwanyile, ohomuwandelagamo eraga: <<Sinyora kodi muhuiziwa jiireyile? Davi oharuma alombwanaye kumela muisalesaleni mwali hiyo ira kamulondjele patarawihu. Mbwenye liye wire aruwana, liye atamangiha!

¹⁵ Mbwenye hiyo nikumbuzaga mabila, nihimala tempu ilukulu nikalaga na alombwana a Davi. Aliwa kerave niirela upama. Hiyo kaniireliwe yabure. Eto niwendaga na aliwa, kilivo yengo yehu idimenle.

¹⁶ Aliwa banibarela ntana na mahiyu nnga muru wa sidadi, tempu yatene yamanle hiyo vamohi na aliwa. Aliwa kakaletchave na hiyo nikumbuzaga mabila.

¹⁷ Muumbuwele pama jejo ira muone kodi yengo tchivi inafuna nyo iranavo. Mwasiwa yenno inomuzelana patarawihu makatamiho, vamohi na abalaye. Tchoira patarawihu gu mutu wabure, kalivo unawanda muwongana yengo.>>

¹⁸ Abigayeli agavwile mazu anne, mobaranya ohotukula pawu 200, makantilu menli osakanyiwa na matembe a anavinyama mwagazanle vinyu, mabila matanu owotchiwa, na kilu 17 da tirigu owaringa, vitazi 100 da uva oumma, mabolu 200 osakanyiwa na jovaha ja mufigera jagali joumma. Jatene jejile ohogwelihaga vaburuni.

¹⁹ Liye awandela anamalabaye ale eraga: <<Tukulani musogolregena. Miyo nnerege uharani mundulri mwinyu.>> Muhiyanole airagana enne, kamuwandenle mamunaye.

²⁰ Evale liye ohovenyihanaga, liye gwela vaburuni vaye roma aharaga. Mbwenye adowagave agali vanipedini va mwango, ohogumanaga na mulombwana Davi vakuruvani azaga vamohi na atwaye.

²¹ Mbwenye Davi za waye ali woira: <<Miyo dihimala tempu ilukulu dikoyaga jorayela ja Nabali muisalesaleni vasayi vene. Kilivo yengo ili yatene yaye idimenle. Eto peno zela jatene japama jalabile hiyo, liye udiwelihedile ubure!

²² Unde wafiyeda tcha miyo dahaapile alombwana atene a Nabali, Mulugu aditonge na makalelo anafuna liye.>>

²³ Evale Abigayeli agamuonne Davi azelaga ha wewule, ohotitaga vaburuni vale mobaranya, liye dowa mukokorela mulombwana Davi afiyihaga kove yaye vati.

²⁴ Evale Abigayeli ohokokoraga vamanyaloni vaye amuwandelaga eraga: <<Mbwiyeni, zela jatene jiireyile, unafuna rumelela gu miyene. Nnouvepani mudihiye miyo namalaba wenyu ira diwonge eto muvwe yenno inafuna miyo wonga.

²⁵ Yoroma mbwiyeni inafwanela jatene jiwongile mulombwana Nabali mudiwale. Tchoira Nabali gu mulombwana wabure. Liye na ibaribari makalelo aye analinganave na nzina naye neno. Mwasiwa nzina na Nabali nnatapulela uzimora eto liye gu zimora. Mbwenye alombwana anno mwaarumile nyo kagazile, miyo namalaba wenyu kadaaonne.

²⁶ Dizaga eni mbwiyeni, ilukuluwa inafwanela muiziwe ira gu Yehova udirumile malro ouhiyihani ira nyo mbwiyeni mwahawande aweliheda kunyakunya amwidaninyu, nne mwahavuvihe sangiri newa. Mbwenye miyo peno nnawonga vamentoni venyu vamohi na vamentoni va Yehova ira miyo nnafuna nnga amwidaninyu vamohi na atu atene anafuna jouirelani ubure, katongiwe na makalelo nnga anafuna tongiwa Nabali.

²⁷ <<Nnouvepani ira nyo mbwiyeni muwatchele yovaha dizilena miyo namalaba wenyu, mudowe mwaavahe atwinyu anouharani nyo mbwiyeni ira kadje.

²⁸ Nnouvepani ira mudikurumuwele yabure isakanyile miyo namalaba wenyu mwasiwa vasogolro Yehova unosakanya ira nyo mbwiyeni mukale mwene vamohi na ahima munaabalege nyo. Jatene ejo Yehova unoirana mwasiwa nyo mbwiyeni munowana mukondoni mwatene munaurumani Yehova. Kalawo wenyu watene, kamuza mufwanyeyana yabure ili yatene.

²⁹ Masiki atu amohi kauharaharegeni ira kaupeni, Yehova Mulugu wenyu unoukoyani nyo mbwiyeni mutumbani mwaye muli atu okalawo. Eto unoavokeda amwidani enyu olapela wene na atu okalawo nnga jinaira mutu avokaga mabwe na yovokana.

³⁰ Muwari mohoirana yabure peno, tempu Yehova inafuna liye kwakwaneliheda jatene japama jejo jiwongile liye ira auvaheni nyo mbwiyeni eto mwaza mukala musogolrelri wa aIzarayeli,

³¹ nyo mbwiyeni kamunakayegena kumbanya, nne kamunakukumuwege ira: <Diirele nni jokala ha jejile, ditatilaga sangiri vasayi muwari moaweliheda amwidanaga kunyakunya?> Eto yengo imohiwa inafuna miyo wonga tchi ila. Yafiya tempu Yehova inafuna liye za uirelani nyo mbwiyeni upama watene wenno, kamudidiwale miyo namalaba wenyu.>>

³² Evale Davi ohomuwongana Abigayeli ule eraga: <<Otamaleliwa akale Yehova Mulugu wa aIzarayeli wenno uurumile weyo peno va ira uze ugumane na miyo!

³³ Mulugu aurelihe na mwasa wa zelru dawo datene disakanyile we peno va. Tchoira ahakalaga weyo, miyo peno dafuna dasakanye yabure, ditatile sangiri na atu vasayi vene. Dafuna didowe dawelihe kunyakunya miyo damwinnya.

³⁴ Ahakala weyo ubaranya uza ugumana na miyo, nnawonga vamentoni va Yehova Mulugu Okalawo wa aIzarayeli wenno udihiyihile peno sakanya yabure zela nyo ira fiyeda metchelo unde watchege atu nizagawo nzuwa, kalivo afuna hala muwari mwa alombwana atene a mulombwana Nabali.>>

³⁵ Nomala enne, Davi ohowatchelaga jodja jazilegena muhiyanole. Eto ohomuwandela eraga: <<Wela udowege vande na murendele. Miyo dihimala vwa jatene jiwongile we eto dihimala rumela jatene jivepile we.>>

³⁶ Abigayeli ohovenyihanaga, liye dowa wa mamunaye Nabali. Siku nenne anfwannyege Nabali ahagalalaga eto ohomala lrezelra. Mwasiwa siku nenne vaniwa vohokalaga pwando nnga pwando inadja mwene. Voira ohomala lrezelra, Abigayeli kamuwandenle mamunaye ule siku nenne, fiyeda mmetcheloni muwa.

³⁷ Mbwenye unde wagatchile, Nabali agali wapamene, lrezelra waye ule wagatotowile, muhiyanaye ohoromaga muwandelamo jatene jaireyile. Mwa enne tempu yamuwandelagamo liye, Nabali ohileyaga, liye kala oummene nnga nibwe.

³⁸ Mwa enne vagamanle wandamelana malambo kumi, Yehova ohomporotchaga mulombwana Nabali, liye fiyeda kwa.

³⁹ Evale Davi agavwile ira Nabali uhukwa, ohowongaga eraga: <<Yehova atamaleliwe! Mwasiwa liye uhumuweliheda kunyakunya mulombwana Nabali na mwasa odiruwana miyo. Eto Yehova atamaleliwe na mwasa oira odihiyiha miyo ira dahamuirele yabure Nabali, mbwenye liye mwinnya uhumpa na mwasa wa yabure yasakanyile liye.>> Nomala enne, Davi oharuma atu eraga: <<Mudowe mwamuwandele Abigayeli ira: <Davi unafuna ira autele.> >>

⁴⁰ Evale aliba rumiwa ale kagafiyile vande va Abigayeli ilambo ya Karimelo, kohomuwandelaga keraga: <<Davi gunirumile ira: <Mudowe mwamuwandele aze ira akale muhiyanaga.> >>

⁴¹ Evale Abigayeli ohovenya, liye kokora afiyihaga kove yaye vati eraga: <<Miyo kadinna makani. Nnofuna ira didowe dahuwege manyalo a anamalaba a mbwiyaga.>>

⁴² Mwa enne Abigayeli ohovenyaga mobaranya, liye dowa gwela vaburuni vaye. Eto ohatukulaga anamwali aye kamulaba, liye adowagana. Kohogundeya vamohi na anamalaba a Davi ale, liye dowa kala mwadi Davi.

⁴³ Davi tempu yamutela liye Abigayeli, agannave muhiyana mmohiwa aitaniwa Ainowa wa ilambo ya Jezereli. Mwa enne ambinlene aliwa kala ahiyanayeve.

⁴⁴ Tchoira tempu yenne Sawuli amutukunle mwanaye Mikali wenno ababihile kala mwadi Davi, liye nvaha mulombwana Paliti mwana Layiji, wa sidadi ya Galimi, liye mutela.