1 Samuweli 23 - Mazu Otchena a Mulungu

Davi ohavunela atu a sidadi ya Keyila

¹ Siku nimohi mulombwana Davi ohowandeliwaga ira: <<Eni anyakondo a aFilistewu anawana na akuda Keyila. Eni anaawaka akuda Keyila jodja jejo jinafwanyeya mamburo obubudavo jalo.>>

² Evale Davi agavwile enne, ohonfukaga Yehova eraga: <<Yehova, kodi didowe dawane na aFilistewu?>> Evale Yehova ohomuwakulaga eraga: <<He, kadowa wawane na aFilistewu. Waavunele akuda Keyila!>>

³ Mbwenye Davi agaawandenle alombwana kawendetcha na liye, aliwa kohowongaga keraga: <<Ii, hiyo mwilamboni mwihu mwa Juda nili hiyo mu nnoova. Eto ira nidowe Keyila, nawanege na makuru a anyakondo a aFilistewu, hiyo ova wehu unotabwa!>>

⁴ Noira enne, Davi ohonfukaga Yehova akoka, liye ira: <<Yehova, na ibaribari nidowe nawane na aFilistewu?>> Evale Yehova ohomuwakulaga akoka, liye ira: <<Kavenya, udowe Keyila. Tchoira miyo nnouvaheda aFilistewu mmandani mwawo ira waagondjihe!>>

⁵ Nomala enne, Davi ohovenyihanaga na atu anne kawendetcha na liye, aliwa dowa Keyila, aliwa roma wana na aFilistewu, aliwa mala atolotcha, awaka ng'ombe diwa. Mwa enne mulombwana Davi ohavunelaga akuda Keyila.

⁶ Fwanyeya ira Abiyatare mwana Aimeleki tempu yavuluwile liye atawelaga wali Davi sidadi ya Keyila, ohodowagana kuleti ya unamakuta.

⁷ Sawuli agavwile ira: <<Davi unafwanyeya sidadi ya Keyila>>, ohowongaga eraga: <<Mulugu uhudivaheda Davi mmandani mwaga. Tchoira Davi udowile volowa sidadi iwerewerihiwe muru mulukulu eto milango diwa dihikana misuwo dokana kunya. Eno liye uhumorela muratuweroni.>>

⁸ Nomala enne, mwene Sawuli ohagumanihaga alombwanaye atene ira kadowe kamurindje mulombwana Davi vamohi na atu kafwanyeya na liye sidadi ya Keyila.

⁹ Eto na Davi wenne ohovwaga ira: <<Eniva mwene Sawuli unafuna aze awane na nyo!>> Davi agavwile enne, ohomuwandela namakuta Abiyatare mwana Aimeleki ule, liye ira: <<Kazana uno kuleti ya unamakuta ira ninfukena Yehova inafuna hiyo ira.>>

¹⁰ Evale Davi ohonfukaga Mulugu eraga: <<Nyo Yehova Mulugu wa aIzarayeli, miyo namalaba wenyu Davi dihivwa ira Sawuli unapanganela na alombwanaye ira aze abwanyule sidadi ya Keyila inafwanyeya miyo ila na mwasa waga.

¹¹ Yehova kodi na ibaribari Sawuli unoza nnga mwemo munavwela miyo? Nnga liye agazile, akuda Keyila uno anodivelela mmandani mwaye? Yehova Mulugu wa aIzarayeli, miyo nnouvepani ira mudiwandele!>> Yehova ohomuwakula, liye ira: <<He, na ibaribari Sawuli unoza!>>

¹² Davi ohowelelave nfuka akoka, liye ira: <<Yehova, kodi na ibaribari Sawuli agazile, atu a Keyila ala anodivelela miyo vamohi na atu atene anakala na miyo mmandani mwa Sawuli?>> Yehova ohomuwakula, liye ira: <<He, na ibaribari anouvelela mmandani mwaye!>>

¹³ Evale mulombwana Davi ohomaruwaga na atwaye 600 anno aawendetchana liye, aliwa kuma musidadi mule kawendaga kadowaga waiziwile atu. Evale Sawuli agawandeliwe ira: <<Davi uhukumamo musidadi ya Keyila, uhutawa.>> kadowilewo.

Mulugu ohomukoya Davi ira Sawuli ahawande mpa

¹⁴ Davi agatawile musidadi mule, adowile kalaga mamburo ofwanela tawelamo kafwanyeya ilambo ya mmwangoni muisalesaleni mwa Zife. Eto malambo matene mwene Sawuli omusaketchave Davi ira ampe. Mbwenye Mulugu ohosakanya ira Sawuli amusakaga Davi, ahawande muona.

¹⁵ Mwa enne Davi agaonne ira: <<Eniva Sawuli unnanave disaka ira adipe>>, ohogarati pandi ya Oreza yafwanyeya muisalesaleni mwa Zife mmohive mwemule.

¹⁶ Jonata mwana Sawuli ohomaruwaga, liye dowa nfwanya mwango wa Oreza. Aganfwanyile ohoromaga mulimbiha ira amuroromelegeve Mulugu.

¹⁷ Jonata ohowonga na Davi eraga: <<Eni weyo wagarati, kuovege. Tchoira babaga Sawuli kanaupa! Eni weyo unofiyeda kala mwene wa Izarayeli eto miyo nnokala mutu wanembinli muwari mwa utongi wawo. Eto eni babaga uhumala iziwa jatene jejo!>>

¹⁸ Nomala eno, kohosakanya yopangana yowandana vamentoni va Yehova ira wandana wewa udowegeve musogolro. Kagamanle enne, mulombwana Davi ohala Oreza ule eto Jonata ohodowaga waniwa wakoka wene.

¹⁹ Evale kohokala akuda Zife kamuonne Davi, aliwa maruwa, dowa muwandela Sawuli ilambo ya Jibeya yafwanyeya liye, aliwa kwi: <<Eniva mulombwana Davi utawenle mwilamboni mwihu. Uvitanle mamburo ofwanela tawelamo anafwanyeya pandi ya Oreza, mmabweni a Akila, pandi ya suli ya Jesimoni!

²⁰ So mwene hiyo nihiiziwa ira eni munafuna ira mumpe. Nona mwafuna ira mmuhinde, muniharege hiyene ira nidowe nauvahedeni mmandani mwenyu.>>

²¹ Sawuli agavwile enne, ohowakulaga, liye ira: <<Yehova aureliheni na mwasa odiwendela tangaranga.

²² Nyo sogolrani, mudowe mwamuwendelelege pama nimburo neno vimuonile nyo. Eto mwaafukede atu kamuonne wewo tchineneva ira kauwandeleni vili liye tchoira dihivwa ira liye uhusimbwa xanga.

²³ Mudowe mwawendelele pama pama mamburo munavitaletcha liye. Mwamala wendelela, muze mudiwandele ira nidowe vamohi, damuhinde. Na ibaribari liye akala wewo, masiki akuda Juda kaindjive, nnonfwanya.>>

²⁴ Evale alombwanale kohomaruwaga, aliwa sogolra kadowaga ante ilambo ya Zife wakoka wene. Ora yenno Davi vamohi na atu kakaletcha na liye mwa tempu yenne kafwanyeya kagali isalesale ya Maome, ilambo yotandeleya inafwanyeya pandi ya suli wa Jesimoni. Nomala enne, kohomaruwaga, aliwa dowa muwandela mwene Sawuli.

²⁵ Evale Sawuli ohomaruwaga na alombwanaye ira kadowe kamusake mulombwana Davi. Mbwenye Davi ohovwaga ira: <<Eni anauvenda.>> Mwa enne ohodowagave sogolro ante liye fiya pandi wafwanyeya mabwe muisalesaleni mwa Maome, liye kala wewule. Evale Sawuli agavwile, ohomuharagave adowaga muisalesaleni mwa Maome mwemule.

²⁶ Mwa enne Sawuli anvendagave Davi, yohofiyeda mwezo Davi liye kala ikukuru imohi ya mwango eto Sawuli vamohi na alombwanaye, aliwa kala ikukuru ya wu ya mwango mmohive wenne. Noira enne, Davi na atwaye kohotamangaga, aliwa funaga jomutawa Sawuli. Evale Sawuli vamohi na alombwanaye anno kazaga ira kamurindje, kamukwivelaga Davi, tempu yafuna atu ira kamuhinde,

²⁷ ohokalaga eto mutu mmohiwa azilege muwandela mwene Sawuli eraga: <<Muwelele mundulri mobaranya! Mwasiwa aFilistewu annana bwanyula ilambwihu!>>

²⁸ Mwa enne mwene Sawuli ohiyaga muhara Davi, liye wela, dowa roma wana na aFilistewu. Nona fiyeda peno nimburo nenne nnaitaniwa Nibwe Notawela.

²⁹ Nomala enne, Davi ohokumaga nimburo nenne, liye dowa kalaga mamburo olimba ofwanela tawelamo anafwanyeya Eni-Jedi.