1 Samuweli 22 - Mazu Otchena a Mulungu

Davi oasogolrelra atu okana makatamiho

¹ Nomala enne, Davi ohovenyaga, liye tawa Gate ule, dowaga nifukweni wa nibwe nafwanyeya wandamelana sidadi ya Adulawu. Mwa enne abalaye vamohi na atu atene a vande va babaye kagavwile ira: <<Eni Davi uli nifukweni wa nibwe tatamo ya Adulawu!>>, kohovenyihanaga, aliwa dowaga wewule ira kangumanena.

² Kohokalawo atu oindjiva kavenyilege amohiwa okana makatamiho, amohiwa okana mangawa, amohiwa aliba takaleliwa, aliwa dowa ira kagumane na mulombwana Davi, kakalege na liye. Malambo anne kohogumaneyaga vali mulombwana Davi vale wandamelana alombwana 400. Kagafiyile wewule, Davi ohokalaga musogolrelri wewa, aliwa roma wenda vamohi.

³ Nomala enne, Davi ohovenyihanaga, liye dowa Mizipa ilambo ya Mowabe. Agadowile wewule, ohonfwanyaga mwene wa wewule, liye nvepa ira: <<Miyo nnouvepani ira mmaga na babaga kaze kakalege wewuno, fiyeda dione Mulugu inadiirele liye!>>

⁴ Mwene ule agarumenle, Davi ohodowa mutukula babaye na mmaye, liye dowa ahiya mwilamboni mwa Mowabe mule ira kakalege mwemule. Evale ababaye ale kohokalagave wewule malambo matene Davi ali liye nimburo nofwanela tawelamo.

⁵ Davi agalive nimburo neno natawenle liye, siku nimohi ohokalaga namafiyiheda mmohi aitaniwa Gadi, avenyilege adowa amuwandela Davi eraga: <<Weyo kukale vevano. Eni inafwanela uvenye udowege ilambo ya Juda, wakalege wewo.>> Davi agavwile mazu anne, ohovenyihanaga vamohi na atu kamuhara, liye dowa kalaga guguru ya Herete muwari mwa ilambo ya Juda.

Piwa wa anamakuta

⁶ Siku nimohi kohokalawo alombwana owambiha kavenyilege kadowa kamuwandela Sawuli ira: <<Davi vamohi na ale anawenda na liye anafwanyeya kokola ya Herete!>> Mwa tempu yenne mwene Sawuli awandeliwaga liye mazu anne, afwanyeyaga ilambo ya Jibeya, agali vamutengoni mmohi eni uneriwa tamarga. Eto mwa tempu yenne afwanyeya ogaratene agahidedile mwanango mmandani mwaye. Asogolrelri aye atenene kafwanyeya vamohi na liye.

⁷ Evale Sawuli ohawandelaga asogolrelri aye kafwanyeya na liye eraga: <<Kavwani nyo alombwana a nlogo na Benjami! Kodi nyo munaumbuwela ira mwana Jese ahamba imwene, liye unouvahani minda doira mulimege, nari unouvahani minda da uva, nari unousakanyani ira mukale asogolrelri a anyakondo 1.000 nari asogolrelri a anyakondo 1.000?

⁸ Kodi mwasiwa gwenno munadipanganela nyo? Tchoira mwanaga Jonata uhusakanya yopangana na mwana Jese eto nyo mwagaonne jejo, kamuzile diwandela. Muwari mwa nyo kalivo unadikumbanyeda. Mwasiwa ahakanlege nyo mudikumbanyedaga, mogoza mudiwandele ira mwanaga umukanyiheda namalaba waga ira adivitalele ira awande dipa nnga jinaireya peno.>>

⁹ Eto siku nenne nawongaga mwene Sawuli eno, muwari mwa anamalaba a Sawuli, ohokalagavo mulombwana Dowege nkuda Edomu. Liye ohoromaga muwandelamo mwene Sawuli eraga: <<Dagali ilambo ya Nobe, miyo dohomuonaga Davi mwana Jese azaga wa namakuta Aimeleki mwana Ayitube.

¹⁰ Evale namakuta ule ohonfuka Yehova ira Davi aiziwe yafuna liye ira eto ohonvahaga pawu eto Aimeleki mmohive ohotukula supada na mulombwana Goliya nFilistewu, liye nvaha Davi.>>

¹¹ Evale Sawuli agavwile enne, oharuma anamalabaye, liye ira: <<Muvenye tchineneva mudowe Nobe, mmudowele mulombwana Aimeleki mwana Ayitube na babayene, vamohi na abali atene a babaye, anno anafwanyeya kagali anamakuta!>>

¹² Mwa enne aliwa kagadoweliwe, kohozaga vamentoni va mwene Sawuli. Evale mwene Sawuli ohonfukaga namakuta Aimeleki ira: <<Aimeleki mwana Ayitube kavuruwana!>> Aimeleki ohowakulaga, liye ira: <<Mbwiyeni kawongagani, miyo nnavuruwana.>>

¹³ Sawuli ohomuwandelaga, liye ira: <<Kodi mwasiwa gwa nni, weyo ugumanaga na mwana Jese, mudipanganelaga? Mwasiwa ali wa nni unvahaga pawu, utukulaga supada unvahaga eto unvepaga Mulugu ira auwandele yafuna liye ira? Eni na mwasa wawo, liye uhuroma diharahara. Liye eto peno unadivitalela ira adipe.>>

¹⁴ Evale Aimeleki ohomuwakulaga mwene Sawuli eraga: <<Kodi muwari mwa anamalabinyu atene, ukalamo mutu ororomeleya omukwaranya Davi? Davi eto kahi nkamwene wenyu? Liye eto gu musogolrelri wa agwarda a ingumi yenyu eto liye unorihediwa na atu atene a vande venyu.

¹⁵ Eto miyo ira dinfuke Mulugu zela yafuna mulombwana Davi ira, kahi fendo yoroma irana. Miyo diromileve irana wanle. Nyo kamudinukedege miyo nne kammunukede mutu mmohiwa wa muibalini mwaga ira nnoupanganelani nyo. Tchoira miyo namalaba wenyu jinawonga nyo jo, kadiiziwile nne vang'onove!>>

¹⁶ Evale mwene Sawuli ohowongaga ira: <<Aimeleki, weyo vamohi na atu atene a vande va babawo munokwa!>>

¹⁷ Nomala eno, ohawandela agwardaye kaligi evale eraga: <<Kavenyani, mwaape anamakuta a Yehova ala. Tchoira na aliwene anomukamiheda mulombwana Davi, aliwa mutawihaga. Tchoira aliwa kagamuonne atawaga, kifunile za diwandela.>> Mbwenye agwarda ale kohokonda apa anamakuta a Yehova na mandiwa.

¹⁸ Agwarda ale vakondilege atu apa anamakuta ale, Sawuli ohomuwandelaga mulombwana Dowege nkuda Edomu ule, liye ira: <<Kavenya weyo, waape anamakuta ala!>> Evale mulombwana Dowege ohovenya dowa apa anamakuta atenene anne kafwanyeya evale, romela mulombwana Aimeleki na abalaye atene. Mwa enne siku nenne kohopiwaga anamakuta 85, atene owara kuleti ya unamakuta.

¹⁹ Mulombwana Dowege agamanle apa anamakuta atene anne, ohoviravira muwari mwa sidadi yatene ya Nobe mwakala anamakuta, liye roma apa na supada atu atene kafwanyeya tatamo yenne. Ohoromaga apa atenene romela ahiyana, alombwana, ahima a mmandani, vamohi na ng'ombe, mabila na aburu.

²⁰ So mbwenye avuluwilege aligi mwana Aimeleki mmohi aitaniwa Abiyatare, muzula wa Ayitube. Evale liye agavuluwile, ohotamangaga, liye tawela ilambo yafwanyeya mulombwana Davi, liye dowa gumana na Davi.

²¹ Aganfwanyile ohomuwandelaga eraga: <<Eni mwene Sawuli uhumala apa anamakuta atenene a Yehova, so uvulumuwile gu miyene meka bahi!>>

²² Davi agavwile enne ohowongaga na Abiyatare, liye ira: <<Miyo dohovayelaga iziwa siku nenne dazilege miyo wa babawo adivahaga pawu. Dohoiziwaga ira podi pii, mulombwana Dowege nkuda Edomu ula adowa, unomuwandela Sawuli zela jatene jionne liye uno. Eno uapihile atu atene a muibalini mwa babawo gu miyo.

²³ Mbwenye voira jili eno, ukale wewuno na miyo eto kuove. Mwasiwa wenno unafuna dipa gu mmohive unafuna joupa weyo. Mbwenye weyo wakala na miyo eni, uhuvuneya.>>