1 Samuweli 2 - Mazu Otchena a Mulungu

Mazu a Ana omutamalela Mulugu

¹ Evale Ana ohomutamalelaga Yehova eraga: <<Mmirimani mwaga dihikana hagalala muwari mwa Yehova. Kopolo daga dihilimbihiwa muwari mwa Yehova. Mulomo waga unowanda aluluviha amwidani aga mwasiwa miyo nnohagalala zela vulusa wenyu.

² Kalivo mutu mmohiwa otchena olingana na Yehova. Kalivo mulugu mmohiwa ahali nyo. Eto kaniliwo nibwe nimohi niwa nnabarela nolingana na nyo Mulugu wehu.

³ Kuwongegeve mazu ovitukulela. Mmulomoni mwawo kamukale mazu ovitetela mwasiwa Yehova gu Mulugu oiziwa jatene. Liye gunapima joira jatene.

⁴ Maurwa a atu a kopolo kohomala kotowa, mbwenye atu anne kali ovuta, peno bawandile kana kopolo dowanda gondjiha.

⁵ Ale karumbanle voroma vene, peno ira kawande kana yodja analimela. Mbwenye ale kanna ndala, peno banarumbala. Muhiyana wenno ali ngomwa, peno uhukana ahima atanu na ambinli. Mbwenye ule anna ahima adjindji, peno uhumala waheya.

⁶ Yehova gunanvaha mutu ingumi eto gunamuwaka. Liye gunamutitiheda mutu Nimburo na Anokwa eto liyene gunamuvenyiha mokwani.

⁷ Yehova gunasakanya ira atu amohiwa kakale orayela, amohiwa kasimele. Eto liyene gunaagweliha amohiwa, amohiwa atitihaga.

⁸ Liye gunaakumihawo atu osimela tumbulruni uli atu eto liyene gunaakumiha atu vazunguni vili atu, liye dowa agaratihaga mamburo apama a umwene. Tchoira mwinnya wa mambozo ohideda ilambo yatene gu Yehova. Liye ohotukula ilambo ya vati, liye goromeyavo.

⁹ Liye unokoya vingumi da atwaye anne anamuroromela. Mbwenye atu abure unoahiya ira kadimele muisini, tchoira kalivo unawanda gondjiha muwari mwa kopolo daye ekave.

¹⁰ Yehova unoza aabwanyule amwidanaye. Eto unoza aamorihede ndari dilukulu. Yehova unotonga ilambo yatene ya vati. Eto unoza anvahe kopolo mwene waye eto unoza avweyihe kopolo da wenno Yehova umuhambihile liye.>>

¹¹ Noira eno, mulombwana Elikana na muhiyanaye Ana kohovenyihanaga, aliwa dowa waniwa ilambo ya Rama. Mbwenye mwanole Samuweli komuhiya Silo wewule, liye roma labaga mabasa a Yehova vamentoni va namakuta Eli.

Yotega ya ahima a namakuta Eli

¹² Mulombwana Eli ahimaye kali atu ohokana mabasa, nne Yehova tchambalra.

¹³ Aliwa nne tchahara nlamulo na Yehova. Kohokana makalelo amohiwa abure kalemenle atu. Makaleluwa kairetcha eni. Mutu aza velela mukuto, yapiyiwa nyama yazilena liye ile, yagalive veko evale itanuwaga, evale namakuta ule omurumetcha nkamihedi waye na garfu nlukulu nokana meno mararu.

¹⁴ Liye afiya wewule, obwiniha garfu nlukulu nne mwemo mwapiya liye, kaya ali panela, kaya bati, kaya muno, kaya ndjabi. Tempu yakumihamo liye garfu nne mpanelani mule, nyama yatene yakamelela garfuni ule yakala ya namakuta. Yenno yali yengo yabure yalemelele anamakuta irana fendo datene muIzarayeli adowa velela mukuto sidadi ya Silo.

¹⁵ Yabure imohiwa yaira atu tchi ila. Jonuna ja nyamele jahanatumeyiweve eto kahanarome piya nyamele, anamakutale komuruma nkamihedi ira adowe, awonge na maliba velela mukuto ira: <<Mudimeyelewo nyama ira namakuta awotche. Tchoira liye mwamuzelana nyama yopiyiwa bahi, kanarumela. Nona munvahe nyama ititene.>>

¹⁶ Evale maliba velela mukuto ule awonga ira: <<Nari. Inafwanela anamakuta karome tumeya jonuna, amala munotukula jatene jinafuna nyo>>, nkamihedi wa namakuta ule owakula ira: <<Nari! Kadivahe nyamela. Walimbana, miyo nnowana na weyo, duwake na kopolo.>>

¹⁷ Mwa enne yotega ya azombwale vamentoni va Yehova yali ilukulu, tchoira aliwa kolramwisa mikuto dedo daveleliwa wa Yehova.

Samuweli ababaye kodowetcha mpanda

¹⁸ Mbwenye muzombwe Samuweli akaletchave wewule, alabaga mabasa a Yehova. Ora yenno liye owaretcha kuleti ya unamakuta yosakanyiwa na nguwo yapama.

¹⁹ Evale mmaye va kada yaka, adowaga na mamunaye ira kavelele mukuto wa yaka, osakanya kapa ing'onong'ono, liye tukula, dowa nvaha mwanaye Samuweli.

²⁰ Evale namakuta Eli omurelihetcha Elikana na muhiyanaye eraga: <<Yehova auvaheni ahima amohiwa na muhiyaninyu Ana ula ira kakale vamalroni va mwana wenna munvelenle nyo wa Yehova.>> Kamala enne, kovenya aliwa welela waniwa wakoka wene.

²¹ Mwa enne Yehova ohomureliha Ana, liye fiyeda abala ahima amohiwa, anapongwe araru na ahiyana ambinli. Eto muzombwe Samuweli ohoulukula alabagave vamentoni va Yehova Silo wali liye ule.

Ana Eli tchavwile sumulula wa babiwa

²² Mulombwana Eli ohomala ulula. Liye owandeliwetcha jabure jatene jaira ahimaye kaairelaga aIzarayeli. Eto owandeliwetcha zela makalelo kairetcha ahimaye agonihaga anamwali kalaba va mulango va Musasa Ogumanamo.

²³ Nomala eno, ohafuka ahimaye ale eraga: <<Kodi nyo anaga munairela nni jabure jeji? Eni atu atene anakalela diwongave na mwasa wa jabure jinaira nyo.

²⁴ Anaga inafwanela muhiye jabure jinaira nyo! Miyo dihivwa atu a Yehova aye anno anafwanyeya kagali aIzarayeli, kawongaga jengo johokala ja masika zela nyo.

²⁵ Eto muiziwe ira mutu amutegela mutu nfwaye, Mulugu unowanda nvunela. Nnga mutu amutegela Mulugu, unafuna nvunela bani?>> Eli agawongile eno, ahimaye ale tchafunne vwelela jawonga babiwa mwasiwa ali yofuna ya Yehova ira aape ahimale.

²⁶ Samuweli mbwenye oulukula pama eto oziveliwiwa na atu atene vamohi na Yehova.

Mulugu ohowonga zela goma wa unamakuta wa Eli

²⁷ Siku nimohi ohokala mutu mmohi wa Mulugu adowile muwandela mulombwana Eli mazu. Liye ohowonga ira: <<Yehova unawonga ira: <Miyo gumukumihile nikolo nawo Arawu vamohi na abalaye atene muIjipitu mwemo mwafwanyeya atu kagali azari mmandani mwa Farawu.

²⁸ Dohomusakulra liye muwari mwa malogo matene a Izarayeli ira akale namakuta waga, alabege vaibuwani, atumeyege jonukela eto ira awarege kuleti ya unamakuta alabaga mabasaga. Eto dohonvaha babawo Arawu ira liye na ahimaye kadjege johala jatene ja mikuto dotumeya vaibuwani, jejo jinavelela Ana Izarayeli.

²⁹ Nnga mwasiwa gwa nni nyo luluvihaga mikuto daga na jovelela jejo jaurumileni miyo ira muirena, mufunaga nnga jikale jenyu? We mulombwana Eli, kodi mwasiwa gwa nni we atetelaga ahimawo dikwaranya miyo? Kodi mwasiwa gwa nni we viruvihaga vamohi na ahimawo muwari modja japama japama ja mikuto datene nnavelela atwaga aIzarayeli?> >>

³⁰ <<Nona Yehova Mulugu wa Izarayeli gunawonga ira: <Miyo dohosakulra ziza nawo na ziza na babawo Arawu ira mukale anamakuta vamentoni vaga kala no kala. Mbwenye peno miyo dagali Yehova nnawonga ira nyo kamunakalegeve anamakuta aga mwasiwa miyo nnoariheda atu anne anadiriheda eto nnoalramwisa anne anadilramwisa.

³¹ Kaing'ana! Tempuwa inoza ifiye yenno inafuna miyo daape abali atene a babawo vamohi na abalawo atene eto muibalini mwawo kanakalamo unafune ulula nne mmohi.

³² Jaireya eno, weyo unokala mmakatamihoni ante ufiyedege silrilra japama jejo jinafuna miyo avaha aIzarayeli eto muibalini mwawo kanakalamo mundimuwa unafune ulukula ante afiyede ulula.

³³ So mbwenye munlogoni mwawo nnamuhiyamo mutu mmohi wenno unafuna kala namakuta olaba vaibuwani. Liye gunafuna hala ahakwe ira awande nla no kana kumbanya wohokala wa masika zela abalaye. Mbwenye afwaye anno kabaliwe munlogoni mwawo, atenene anofiyeda mala piwa na supada.

³⁴ Ira we ukayena ibaribari ira jatene jene jinawonga miyo ji ti jengo ja ibaribari, ionihedo inafuna we ona tchi ila. Ahimawo ambinlene Hofini na Fineyasi anokwa siku nimohive. Waona eno, pa evo vanafuna we kana ibaribari ira jatene jawongile miyo jinoza jiireye.

³⁵ Eto nnomusakulra mutu mmohiwa ahali wa muibalini mwawo ira akale namakuta ororomeleya. Damusakulra, liye unerege irana jili mmirimani mwaga eto unerege irana jofuna jaga. Miyo eto nnoareliha ahimaye ira kalabege mabasaga a unamakuta vamentoni va mwene wenno unafuna miyo muhambiha kala no kala.

³⁶ Era eno ahimawo a vang'onove anno anafuna hala, anoza kanfwanye mwenole unafuna hambihiwa, kaze kamukokorelege kanvepaga kobiri owu hehi jodja, kamuwongagana ira: <<Nnavepa munihiye nilabe mabasa a unamakuta ira niwande pata yodja ya vang'onove ira nidje.>> > >>