1 Samuweli 18 - Mazu Otchena a Mulungu

Wandana wa Davi na Jonata mwana Sawuli

¹ Mwene Sawuli agamanle tapanya na Davi, mwana Sawuli wenno aitaniwa Jonata ohoroma wandana na Davi ule. Eto Jonata omuziveliwetchetcha Davi nnga mwaziveliwela liye ingumi yaye.

² Roma siku nenne dowaga sogolro mwene Sawuli kamuhiyile Davi ira awelele wa babaye. Ohomutukulaga Davi dowa kalaga vande vaye.

³ Evale Jonata ohosakanya yopangana yowandana na Davi, mwasiwa liye omuziveliwa bure Davi nnga mwaziveliwela liye ingumi yaye.

⁴ Mwa enne muwari momuziveliwa mule, Jonata ohowungulaga kapaye yenno awaretcha liye, nvaha Davi eto ohonvaha jowara jaye ja kondoni vamohi na supada naye na urwa naye na sintu naye.

⁵ Mwa enne Davi odowetcha mwatene mwene mwamurumetcha mwene Sawuli eto mwatene mwavira liye ogondjiha. Evale Sawuli ohomuhambiha Davi ira akale musogolrelri wa nikuru nimohi na anyakondo aye. Andimuwa atene, vamohi na alombwana atenene a Izarayeli kagaonne ira Sawuli umuhambiha Davi undimuwa, atene kohoziveliwaga valukulu.

Sawuli ohoroma muharahara Davi

⁶ Fwanyeya ira Davi agampile nFilistewu Goliya, evale anyakondo a Izarayeli kadowaga mmavande mwiwa, ahiyana a sidadi datene da Izarayeli kohovenyaga ira kadowe kangumanena mwene Sawuli. Aliwa kagamaruwile kadowaga wa Sawuli ule, koimbaga nyumbo dohagalala, eto koimbaga makotcho na joimbana jimohi, aliwa inaga.

⁷ Evale aliwa kainagave kadowaga, koimbaga keraga: <<Sawuli uhapa atu tchikwi, mbwenye Davi uhapa atu matchikwi na matchikwi!>>

⁸ Evale Sawuli agavwile ahiyanale kaimbaga enne, ohokukumuwaga valukulu. Eto ohotakaleliwaga, aumbuwelaga mmirimani mwaye ira: <<Aa, ahiyanala zela miyo anawonga ira daapile atu tchikwi eto zela Davi ani uhapa atu matchikwi na matchikwi! Eno ihanle para liye ku vahiwa umwene bahi.>>

⁹ Evale kuma siku nenne dowaga sogolro, mwene Sawuli ohoroma mukalela sandje Davi.

¹⁰ Mmetcheloni muwa, munemba wabure okumela wa Mulugu ule, ohomuzelaga mwene Sawuli. Evale liye ohoromaga sakanya jengo ja mihala mmba mwaye. Mwa enne Davi ohoroma imba arpa waye nnga molemelela. Tempu yenne Sawuli ohokana mwanango mmandani mwaye.

¹¹ Evale Sawuli ohoumbuwelaga ira: <<Miyo nnafuna dimuwambe Davi vantchihini!>> Nomala eno, Sawuli ohonvokaga Davi na mwanango ule. Mbwenye Davi ohorambaga, liye vonya. Noira enne, Sawuli ohonvokagana akoka. Eto Davi ohorambaga akoka, liye vonya.

¹² Yehova ohiya musogolrelra Sawuli, liye roma dowa kalaga na Davi. Na mwasa wenne, mwene Sawuli omuova Davi.

¹³ Evale Sawuli ohonvenyihagavo vamentoni vaye eto ohonvaha ira akale musogolrelri wa nikuru na anyakondo 1.000. Evale mulombwana Davi oasogolrelretcha anyakondwale mukondoni.

¹⁴ Jatene jasakanya Davi jokwakwanela mwasiwa Yehova ali na liye.

¹⁵ Mwa enne Sawuli agaonne joira ja Davi jimuwendelaga pama, muova waye wohowendjedeya.

¹⁶ Mbwenye aIzarayeli atene na akuda Juda atene komuziveliwa Davi mwasiwa liye gwaasogolrelretcha mukondoni mwiwa mwatene.

Davi ohomutela mwana Sawuli

¹⁷ Nomala eno, mwene Sawuli ohowonga na Davi, liye ira: <<Miyo nnafuna duvahe mwanaga wa mulukulu Merabe ula ira umutele. So ira miyo duvahe ira umutele, nnafuna ira weyo urome dilaba nnga munyakondo wapama ororomeleya eto uwanege kondo da Yehova.>> Sawuli airaga enne aumbuwela ira: <<Miyo nnafuna diirena eni ira Davi adowe apiwe kondoni na aFilistewu hiya ira dimpe miyo.>>

¹⁸ Evale Davi ohowakulaga, liye ira: <<Kodi miyo dili ani ira dimutele mwaninyu ira dikale nkamwene wa mwene? Tchoira hiyo munlogoni mwehu nili atu ohokana mabasa vamentoni va atu a Izarayeli!>>

¹⁹ Mbwenye fwanyeya ira Sawuli agamanle pangana ira anvahe Davi mwanaye, kanvahile. Tempuwa yagafiyile yafuna atu nnga kamutukule Merabe kanvahe mulombwana Davi ira amutele, aliwa kohomuteliha muhiyanole na mulombwana mmohiwa aitaniwa Adiriyeli wa sidadi ya Meyola.

²⁰ Mwa enne Sawuli ohomukana mwanaye wa muhiyana mmohiwa aitaniwa Mikali. Mikali ule ohomuziveliwa Davi nnga amutele. Mwa enne mwene Sawuli agavwile jejile ohoziveliwaga.

²¹ Evale ohowongaga eraga: <<Nnafuna dimusakanye mwanaga nnga ratuwero, dimutelihe na Davi ira tempu inafunege liye dilaba nnga munafunela miyo, apiwe na aFilistewu.>> Evale Sawuli ohomuwongana Davi fendo yowelela, liye ira: <<Peno unafuna ukale nkamwenaga.>>

²² Noira eno, Sawuli oharumaga anamalabaye ira: <<Mudowe mwamuwandele mulombwana Davi agali vaye vene, muire: <Eni mwene vamohi na anamalaba atene anouziveliwa weyo. Inafwanela weyo urumele mutela mwanaye ule, ukale nkamwenaye.> >>

²³ Anamalaba ale kohomaruwaga, aliwa dowa nfwanya Davi, aliwa muwandela mazwale. Kagawongile na Davi mazu anne, liye ohowakulaga eraga: <<Kodi nyo kamunaumbuwela ira tela vande va mwene wagali mutu osimela eto wagali mutu ohokana mabasa nnga miyo tchi yengo irutchile?>>

²⁴ Evale aliwa kagavenyile, funa dowa muwandela Sawuli jatene jawongile Davi,

²⁵ liye ohowongaga ira: <<Mudowe mwamuwandele Davi ira: <Mwene pete inafuna liye ira umutelena mwanaye, liye kanafuna kobiri, so unafuna udowe waape aFilistewu okwakwana 100, amala waagwade tembe nnakala sogolro wa yano ya ilombwana, jogwada jiwa uzena uno. Liye unafuna airena eno ira aawelihede kunyakunya aFilistewu.> >> Sawuli airaga jatene jejile, yobalra yaye yali yoira: <<Miyo nnafuna diirena eni ira mulombwana Davi tempu inadowege liye wana, adowe apiwe na aFilistewu kondoni.>>

²⁶ Evale aliwa kagadowile muwandela akoka Davi mazu anne, liye ohoziveliwa na mwasa ofuna tela vande va mwene. Siku na matelo nne nahanafiye,

²⁷ mulombwana Davi na alombwana aye kohovenyaga, aliwa dowa apa aFilistewu 200. Mwa enne liye ohagwadagawo jafuna mwene jile, nomala eno ohotukulaga jatene, liye dowa nvaheda mwene Sawuli ira atele. Evale Sawuli ohonvaheda mwanaye Mikali, liye mutela.

²⁸ Mwa enne Sawuli ohoona ira: <<Yehova ulive na Davi eto mwanaga Mikali unomuziveliwa.>>

²⁹ Na mwasa wenne, omuova mulombwana Davi valukulu vene eto ohofiyeda kala mwidani waye kalawo waye watene.

³⁰ Fwanyeya ira fendo datene andimuwa a aFilistewu vavenya atu ira kadowe kawane, Davi oagondjiha aFilistewu adjindji hiyaniha na andimuwa a anyakondo amohiwa a mwene Sawuli. Na mwasa wenne, Davi ohovweya bure.