1 Samuweli 16 - Mazu Otchena a Mulungu

Mulugu ohomusakulra Davi ira akale mwene wa aIzarayeli

¹ Evale Yehova ohowongaga na Samuweli eraga: <<Kodi unaza uhiye mukumbanya Sawuli alini, agali miyo dihimala munyanyala ira liye ahakale mwene wa mulogo wa Izarayeli akoka? Uvenye utukule nnyanga, uzalihemo makura, umaruwe udowe sidadi ya Beleme. Wafiya wewo, udowe vande va mulombwana mmohi unaitaniwa Jese. Liye uhumukana mwanaye mmohi wenno dimusakunlre miyo ira akale mwene.>>

² Mbwenye Samuweli ohomuwakula Yehova, liye ira: <<Nnga nnairena ejo avi, agali mulombwana Sawuli uhukalawove? Tchoira liye avwa, unodipa.>> Yehova ohomuwakula, liye ira: <<Nari, so weyo wadowaga, utukule mwana ng'ombe ya muhiyana, wafiya wewule, wawonge ira: <Miyo dazela velela mukuto wa Yehova.>

³ Wamala eno, umuitanele Jese mukutoni. Mwagadowile wewule, miyo nnouwandela yenno inafuna we ira. Mutu wenne unafune miyo utonyiheda, weyo unomuhambiha muwari momukutulela makura.>>

⁴ Samuweli agavwile mazu anne, ohoiragana nnga mwemo mwamurumele Yehova. Liye venyihana, dowaga ilambo ya Beleme. Agafiyile wewule, andimuwa a wewule kagamuonne, kohorendjeyaga, aliwa dowa nfuka kangurumelaga, aliwa ira: <<Kodi za wenyu kwa murendele?>>

⁵ Liye ohawakula, liye ira: <<He, za waga kwa murendele. Miyo dazela velela mukuto wa Yehova. Nnafuna muvitchenihe ira mudihare mukutoni unaya miyo.>> Nomala eno, Samuweli ohomutchenihaga mulombwana Jese vamohi na ahimayene anno kafwanyeya kagali anapongwe. Agamanle atcheniha, ohomuitana mulombwana Jese na ahimaye ira kamuharege mukutoni.

⁶ Akuda Jese kagazile, Samuweli ohomuona mwana Jese mmohi aitaniwa Eliyabe. Agamuonne wenne aumbuwela ira: <<Mwana wenna na ibaribari gwenno Yehova umusakunlre liye ira ahambihiwe umwene.>>

⁷ Mbwenye Yehova ohowongaga na Samuweli eraga: <<Weyo kuing'ane baleya wa mutu, nne ulukula wa mutu. Miyo wenno kadinfunile mwasiwa miyo kannaing'ana nnga makalelo anaing'ana atu. Tchoira atu anaing'ana makalelo a mutu, mbwenye miyo dagali Yehova nnaing'ana mmirimani mwa mutu.>>

⁸ Noira eno, Jese ohomuitanaga mwanaye Abinadabe, liye mudowana wa Samuweli. Mbwenye Samuweli ohowongaga, liye ira: <<Nari. Yehova umusakunlre liye kahi wenna.>>

⁹ Noira eno, Jese ohomuzagana mwanaye Sama. Eto Samuweli ohowongaga, liye ira: <<Nari. Yehova umusakunlre liye kahi wenna.>>

¹⁰ Mwa enne Jese ohazagana ahimaye atanu na ambinli. Mbwenye Samuweli ohomuwandela ira: <<Nari, mwa ahimawo atene anna, usakulriwe na Yehova kalivo.>>

¹¹ Evale Samuweli ohonfuka Jese, liye ira: <<Kodi weyo ahima a anapongwe awo anna we banna bahi, kunna mwana mmohiwa ahalivo?>> Jese ohowakulaga, liye ira: <<Ahalivo eva gwa ng'onong'onuwa. Liye eto unadjiha mabila.>> Evale Samuweli ohowonga, liye ira: <<Kadowani mwamuitane aze. Tchoira hiyo kannaroma dja liye ahanaze.>>

¹² Evale Jese oharuma atu, aliwa mudowela. Fwanyeya ira liye ali muzombwe oriya, okana maningo apama eto meso aye kong'asimela. Evale Yehova ohomuwandela mulombwana Samuweli, liye ira: <<Mutu dimusakunlre miyo gwenno, umuhambihe na makura.>>

¹³ Evale Samuweli ohotukulaga nnyanga neno mwafwanyeya makura, liye mukutulela Davi vamentoni va abalaye atene. Evale Munemba wa Yehova ohomuzelaga kala na liye roma siku nenne ante dowaga sogolro. Nomala eno, Samuweli ohowelelaga waniwa wakoka wene ilambo ya Rama.

Davi amulabaga Sawuli

¹⁴ Noira eno, Munemba wa Yehova afwanyeya na mwene Sawuli ohokumamo, evale munemba mmohiwa wabure orumiwa na Yehova ohoza roma muzuzumihaga Sawuli.

¹⁵ Evale anamalaba a Sawuli kohomuwongana, aliwa ira: <<Mbwiyeni hiyo nihiiziwa ira munemba wabure orumiwa na Mulugu, uhuza, uzuzumihagani.

¹⁶ Yapamiwa inafwanela munirume hiyo anamalabinyu, nidowe namusake maliba imba arpa aze. Aza, tempu inafuna nyo hindiwa na munemba wabure orumiwa na Mulugu, maliba imba ule aimbaga arpa waye, nyo munerege kala pama akoka.>>

¹⁷ Evale Sawuli ohawakulaga anamalabaye ira: <<Ihikala pama! Dowani mwamusake mutu unawanda imba arpa pama, mmuzena wa miyo.>>

¹⁸ Evale namalaba mmohi ohowongaga eraga: <<Sidadi ya Beleme uhukalawo mulombwana mmohi uneriwa Jese. Liye uhumukana mwanaye mmohi unawanda imba pama arpa. Liye eto gu mutu olimba murima, mutu owanda wana, owanda wonga pama, mutu oriya eto liye gosogolrelriwa na Yehova.>>

¹⁹ Evale Sawuli oharuma atu ira: <<Muvenye mudowe wa Jese, mwawonge ira: <Sawuli unirumile ira mmurumihede mwaninyu Davi wenno unadjiha mabila.> >>

²⁰ Evale Jese agavwile milanyo darumihile mwene Sawuli, ohomuruma mwanaye Davi anvahaga pawu na tembe mwazanle vinyu na mwana mbuzi eni, liye gweliha vaburuni ira anvahe mwene Sawuli.

²¹ Evale Davi ohodowaga, liye roma mulaba mwene Sawuli. Mwa enne Sawuli ohomuziveliwa simbwa fiyeda liye musakulra ira atukulege jowanana jaye kadowaga kondoni.

²² Noira eno, ohorumiha milanyo wa mulombwana Jese doira: <<Miyo dihimuziveliwa mwanawo Davi. Na mwasa wenno nnouwandela weyo ira umuhiye akale wewuno alabege mabasa vamohi na miyo.>>

²³ Kuma evo dowa sogolro, munemba wabure orumiwa na Mulugu, fendo datene amuhinda liye mwene Sawuli, Davi otukula arpa, liye roma imba. Davi aimbaga enne, munemba wabure ule okumamo mwa mwene Sawuli, liye vulumuwaga, kalaga pama nnga mwakalele liye.