1 Samuweli 13 - Mazu Otchena a MulunguSawuli na anyakondwaye kohovenyihana ira kawane na aFilistewu 1 Sawuli agahambihiwe umwene, ohatonga aIzarayeli yaka imohi. Yaka yanembinli yatonga liye, 2 ohasakulramo alombwana okwakwana 3.000 muwari mwa aIzarayeli. Muwari mwa alombwana 3.000 aasakunlre liye ale, ohatukulaga 2.000, liye adowagana ira kakale na liye sidadi ya Mikimasi, yenno inafwanyeya ilambo ya mmwangoni ya Beteli. Alombwana amohiwa 1.000, liye ahiya na mwanaye Jonata sidadi ya Jibeya, ilambo yakala nlogo na Benjami. Atu atene amohiwa ohala ale, liye aruma aliwa dowaga mmavande mwiwa. 3 Siku nimohi Jonata na alombwana anna liye, kohovenyaga, aliwa dowa gondjiha nikuru nimohi na anyakondo a aFilistewu kakala kapamento wewa sidadi ya Jeba. Evale yohovweyaga muwari mwa aFilistewu afwiwa amohiwa. Mwa enne mwene Sawuli oharumaga atwaye ira: <<Kaimbani palraza ira alombwana atene aEberewu kaze!>> 4 Mwa enne aIzarayeli atene kohovwaga ira: <<Eni mwene Sawuli uhugondjiha nikuru na anyakondo a aFilistewu. Eto eni aFilistewu kohotakaleliwa na makalelo abure yenno isakanyile aIzarayeli.>> Mwa enne aIzarayeli atene kohowandeliwaga, aliwa za gumana vamentoni va mwene Sawuli Jiligali. 5 AFilistewu na aliwene eto kohogumanaga ira kadowe kawane na aIzarayeli. Aliwa kohokana aterelado 30.000 a kondoni, na atu 6.000 aliba wendiha kavalo, vamohi na anyakondo ohokala a masika oindjiva nnga miseva da mutcherelani mwa bara. Aliwa kohogundeya dowaga ante Mikimasi, makumelo wa nzuwa wa sidadi ya Bete-Aveni, aliwa kunga misasa diwa wewule ira kawane na aIzarayeli. 6 Mwa enne alombwana a aIzarayeli kagaonne indjiva wa aFilistewu ale, kohorendjeya, aliwa roma ova. Mwa enne amohiwa kohotawaga, aliwa dowaga vitala mmafukweni, mmilihani, mmabweni, mmafukweni mwakoyiwe atu kakwile, na mmatankini mwemo mwahali mahindje. 7 AEberewu amohiwa kohodowa vanalambuwa atu muhindje Jordawu, aliwa lambuwa dowa ilambo ya Gadi na Jileyadi. Mbwenye Sawuli ahanlege Jiligali wewule. Eto atu atene kahanlege na Sawuli kongurumela moova. Yotega ya Sawuli 8 Fwanyeya ira Samuweli ohomuwandelaga Sawuli ira: <<Wadowa, wadidedihe malambo matanu na menli.>> Evale Sawuli ohoroma mudediha Samuweli. Siku nanetanu na mbinli nagakwakwanile, Samuweli alive ahanaze Jiligali ule. Mwa enne atu kohoromaga muhiya mwene Sawuli, aliwa dowaga jiwa. 9 Evale nzuwa nahanavire, mwene Sawuli ohowongaga, liye ira: <<Muzena jovelela ja mukuto otumeya vamohi na jovelela ja murendele.>> Evale aliwa kohozagana, Sawuli liye velela mukuto. 10 Amarihaga velela mukuto otumeya, tchi tempu yafiyaga mulombwana Samuweli nnga mwapanganne liye. Evale Sawuli ohodowaga gumana na liye ira amulondjele. 11 Mbwenye Samuweli ohonfukaga eraga: <<Usakanyile nni?>> Sawuli ohomuwakula, liye ira: <<Miyo daonne atu kadihiyaga, eto na nyenne daona nnga kamunazawo nnga mwemo mwawongele nyo eto ing'ana aFilistewu kohomala gumana ilambo ya Mikimasi. 12 Noira eno, miyo dohoumbuwela ira aFilistewu anoza Jiligali uno tchineneva ira katatamule kondo eto anoza kadifwanye dahananvepe Yehova. Mwa eno, miyo ona ira inafwanela divelele mukuto otumeya.>> 13 Evale Samuweli ohomuwandela eraga: <<Weyo uhusakanya ja uvuruvuru. Kufunile harihamo nlamulo na Yehova Mulugu wehu. Ahakanlege uvwelela nlamulo na Yehova, liye ogouhiya ira weyo vamohi na ahimawo, mwaatongege aIzarayeli malambo a mukalakala. 14 Mbwenye voira we kuharihilemo jaurumile Mulugu, umwene wawo kunakana sogolro. Eniva Yehova uhumusakulra mulombwana mmohiwa unafuna kala mwene. Liye gu mulombwana ofuna jinafuna Yehova. Liye umala musakulra ira akale mwene wa atwaye vamalroni vawo mwasiwa kuwandile vwelela yenno Yehova yaurumile liye.>> 15 Samuweli agamanle wonga jejile, ohokumaga Jiligali wali atu ule, liye dowaga. Evale Sawuli na atu anne kali evale kohowela dowa gumanela na nikuru na anyakondo kahanle evale. Nomala atene kohovenyihana kuma sidadi ya Jiligali wali atu, aliwa dowaga sidadi ya Jibeya muwari mwa ilambo yakala nlogo na Benjami. Nofiya wewule, mwene Sawuli vahanle liye, ohakontarigi alombwana kafwanyeya vamohi na liye. Agaakontarile, atenene kaligi alombwana okwakwana 600. 16 Sawuli na mwanaye Jonata vamohi na alombwanaye, kohokalagave Jeba ilambo ya nlogo na Benjami. Eto aFilistewu kohokunga misasa diwa ilambo ya Mikimasi. 17 Mwa enne anyakondo a aFilistewu, kohogawaneyaga makuru mararu ira kadowe kalabe mabasa a umadjuba. Nikuru nimohi nadowile pandi ya Ofara, ilambo ya Suwali. 18 Nikuru nimohi niwa nadowile Bete-Horoni, nikuru naneraru nadowile pandi ya mwango da Zeboyimi, wandamelana isalesale. 19 Mwa tempu yenne mwilamboni mwa aIzarayeli kamwafwanyeya maliba hana vaparani, nne mmohi. Tchoira aFilistewu kohakondiha aIzarayeli ira: <<Mwilamboni mwa aEberewu, kakalemo maliba hana tawiha ira aEberewu anaze kakayena masupada na mwanango.>> 20 Mwa enne aIzarayeli xaruwa diwa, himba diwa, mbazo diwa, jikwakwa jiwa, vamohi na jokumbuzana ng'ombe, kafunaga sayiha kadowetchana wa aFilistewu, aliwa sayiha. 21 Eto aliwa kasayihaga, koakosa aIzarayeli kobiri idjindji. Para sayiha xaruwa nari himba diwa, kakosa kobiri mbinli da parata. Para sayiha mbazo nari jikwakwa jiwa, kakosa kobiri imohi ya parata. 22 Mwa enne siku nowana kondo nne nagafiyile, muwari mwa aIzarayeli atenene kafwanyeya vamohi na Sawuli vamohi na Jonata, kalivo anna supada nne mwanango. So anna ali mwene Sawuli vamohi na mwanaye Jonata bahi. 23 Eto ora yenno nohokalawo nikuru nimohi na anyakondo a aFilistewu kadowile funga vevo vaviretcha atu wandamelana Mikimasi. |
© 2018 Visão Integral
Global Partners