1 Samuweli 12 - Mazu Otchena a Mulungu

Samuweli ohawelruza aIzarayeli makalelo owenda na mwene

¹ Samuweli ohowongaga na aIzarayeli atene eraga: <<Miyo dihivwa yovepa yenyu, mudivepaga ira: <Nnanfuna mwene.> Dagavwile, duhuvahani mwene.

² Eni kuma peno mwene dimuhambihile miyo gunakalege sogolro wenyu. Tchoira miyo dihiulula eto nnga munadionela nyo eni dihimala kana mbwi eto ahimaga kali vamohi na nyo. Miyo eto gwausogolrelrani romela uzombweni waga fiyeda peno.

³ Miyo peno dili vamentoni venyu. Akala dihisakanya yengo yabure, muwari mwa utongi waga watene, muwonge tchineneva vamentoni va Yehova na vamentoni va mwene wenno umuhambihile liye. Muwonge akala miyo dilabaga mabasaga matene dihitukula ng'ombe nari buru wa mwinnya nari akala miyo dohomudjelra mutu nari akala dihibabiha muharahara mutu. Akala dohowatchela kunya ya mutu ira dimutongele milandu daye pama, muwonge. Akala miyo dihiirana mwa jengo jatene jiwongile miyo ji, muwonge ira diwelihe.>>

⁴ Evale aIzarayeli atene kohowakulaga keraga: <<Nyo kamunidjenlre, nne kamuniharaharile, nne kamutukunle yengo ya mutu.>>

⁵ Evale Samuweli ohowongaga eraga: <<Yehova vamohi na mwene wenno umuhambihile liye, peno va anowanda hidedela umboni ira nyo peno kamudifwanyilena yengo yabure iirile miyo.>> Evale aliwa kohowakulaga, aliwa ira: <<He, na ibaribari Yehova gunahidedela umboni.>>

⁶ Samuweli ohokalelagave wonga eraga: <<Yehova gunahidedela umboni, tchoira liye gwamusakunlre Mozeji na Arawu eto ohakumihamo makolo enyu ilambo ya Ijipitu.

⁷ Miyo eto nnafuna ira nyo atenene mukale veva vili nyo va ira duwumbutchedeni jengo japama Yehova jauireleni liye nyo vamohi na makolo enyu.

⁸ Mulombwana Jako vamohi na atwaye atene kagadowile ilambo ya Ijipitu, akuda Ijipitu kohasakanya azari. Evale makolo enyu ale kohonla wa Yehova ira aakamihede. Kagavepile enne, Yehova ohomuruma mulombwana Mozeji na Arawu ira kadowe kaakamihede. Aliwa baakumihilemo ababinyu ilambo ya Ijipitu, aliwa aziha ira kakale muwari mwa ilambo yenna.

⁹ Mbwenye makolo enyu ale kagazile ilambo yenna, kohomudiwala Yehova Mulugu wewa. Na mwasa wenno Yehova ohatukula makolo enyu avaheda mmandani mwa Sizera, wenno ali mundimuwa wa nikuru na anyakondo a ilambo ya Azori. Mulugu eto ohavaheda mmandani mwa aFilistewu na mmandani mwa mwene wa Mowabe. Atu anne kohoza wana na makolo enyu.

¹⁰ Aliwa kagagondjihiwe, kohokuwaga kanvepaga Yehova keraga: <Yehova hiyo nuhutegelani, tchoira nuhuhiyani, hiyo roma tamalela amilugu amohiwa aBaali na aAxitaroti. Mbwenye peno hiyo nnauvepani ira munivunele mmandani mwa amwidanihu eto kuma peno dowa sogolro hiyo nnerege uharani.>

¹¹ Mwa enne Yehova agavwile yovepa yewa, ohomuruma mulombwana Jerubaali, Baraki, Jefite na miyo Samuweli. Hiyo dowa agondjiha amwidaninyu atene, nyo roma wendaga na murendele.

¹² Eto mwagamuonne mulombwana Nasi mwene wa aAmoni afunaga za ira awane na nyo, nyo mohodiwongana ira: <Ii, nari. Hiyo nnafuna munivendele mwene ira anitongege!> Agali tempu yenno mwene wenyu autongani ali Yehova Mulugu wenyu.>>

¹³ <<Mwene mwamusakunlre nyo ula. Nyo mohonvepa Yehova eto eni uhuuvahani mwene ira autongegeni.

¹⁴ Nyo mwakala atu omuova Yehova, mwamulabagave liyene bahi, mwavwelela jinawonga liye, mwarumela malamulo aye, nyo vamohi na mwene wenyu unautongani mwamuhara Yehova Mulugu wenyu, jatene jinouwendelani pama.

¹⁵ Mbwenye mwakala atu ohonvwelela Yehova eto mulramwisaga jofuna jaye, liye unouonihani goyi na makalelo nnga aaonihile liye goyi makolo enyu.>>

¹⁶ <<Nona mukaleve veva vinafwanyeya nyo va, muone yengo yotikiniha inafuna irana Yehova vamentoni venyu.

¹⁷ Tempu ili hiyo ila tchi tempu yohorumbwa muzongwe eto tirigu unarendiwa! Mwa eno, miyo nnafuna dilobele wa Yehova ira arumbwihe muzongwe na ndari ira nyo muiziwe ira muhusakanya yotega ilukulu vamentoni va Yehova munvepaga ira auvaheni mwene.>>

¹⁸ Evale Samuweli oholobela, liye nvepa Yehova. Siku nimohive nenne ohorumbwaga muzongwe ohokala wa masika wa ndari. Noira eno, atu atenene kohoroma muova Yehova, vamohi na mulombwana Samuweli.

¹⁹ Atu atene kohowongaga na Samuweli, aliwa ira: <<Nnouvepani ira munilobelele wa Yehova Mulugu wenyu ira hiyo anamalabinyu nahakwe. Tchoira hiya jotega jatene jaira hiyo wanle, nihiwendjeda yotega yoira nohonvepa mwene ira anitongege!>>

²⁰ Evale Samuweli ohawakulaga eraga: <<Kamuove! Masiki mwagasakanyileve yengo yabure, kamuhiye muhara Yehova, mbwenye mmulabege Yehova na mmirimani mwinyu mwatene.

²¹ Kamwaaharege amilugu ohokana mabasa. Aliwa kinaukamihedani nne kinauvunelani, mwasiwa aliwa kahi a ibaribari.

²² Tchoira Yehova kanaahiya atwaye na mwasa wa nzina naye nindimuwa. Tchoira liye gufunne ira nyo mukale atwaye.

²³ Eto zela miyo, kannafuna mutegela Yehova ira nnohiya ulobelelani nyo. Eto miyo nneregeve ufundjihani ndila yapama, ya ibaribari.

²⁴ So inafwanela mmuove Yehova eto mmulabegeve liyene, mmuroromelaga na mmirimani mwinyu mwatene. Tchoira nyo muhumala ona jengo jilukulu jilukulu juireleni liye.

²⁵ Mbwenye nyo mwawelela iraganave jabure, na ibaribari Yehova unoudimelihani mwilamboni muno romela nyo vamohi na mwene wenyu wenno ira mwahafwanyeyegemo.>>