1 Samuweli 10 - Mazu Otchena a Mulungu

¹ Tempu yenne Samuweli ohotukulaga garafwa mwemo mwali makura, liye mukutulela mulombwana Sawuli vamuru, liye mbejari. Eto ohomuwandelaga, liye ira: <<Yehova gunauhambiha weyo peno va ira ukale mwene wa atwaye Ana Izarayeli. Weyo unerege atonga atu a Yehova eto unerege avunela mmandani mwa amwidaniwa atene. Jikalawo jitonyihedo taru jinafuna we ona jooniheda ira Yehova uhuuhambiha ira ukale mwene wa atwaye.

² Yoroma peno eni namwalana veva, weyo wadowaga vande, unoafwanya alombwana ambinli wandamelana vevo vakoyiwe Rakeli, muwari mwa ilambo ya Benjami, sidadi ya Zeliza. Waafwanya, aliwa anouwandela weyo ira: <Aburu anno waasaka we kohomala oneya. Eniva babawo kanakukumuwa zela aburu kadimenle, mbwenye unakukumuwa eto zela weyo ira: <<Dire avi ira dingumanena mwanaga?>> >

³ Jagamanle ireya eno, ionihedo yowelela, wagadowile sogolro, wafiya vamutengoni va karvaliyo unafwanyeya ilambo ya Tabori, unoafwanya alombwana araru anno anadowa ilambo ya Beteli ira kavelele mukuto wa Mulugu. Mulombwana mmohi utukunle mbuzi taru ding'onong'ono, mulombwana mmohiwa utukunle pawu taru, mulombwana waneraru utukunle tembe munafwanyeya vinyu.

⁴ Waafwanya, aliwa anoulondjela eto anouvaha pawu mbinli. Eto kauvaha, inafwanela uwatchele pawu dile.

⁵ Jaireya eno, ionihedo yogomiheda, weyo uvenye udowe mwango wenno unaitaniwa Jibeya wa Mulugu, wewo unafwanyeya misasa da anyakondo a aFilistewu. Wavolowaga musidadi mule, unofwanya nikuru na anamafiyiheda katitelaga nimburo notama na mukuto, kakumaga ibuwani. Unaafwanya kaimbaga joimbana jiwa jinafwanyeya jagali lira, makotcho, mafalauta na arpa. Eto tempu yenno aliwa anerege wonga ja Mulugu.

⁶ Era eno mobaranya Munemba wa Yehova unokala na weyo, evale unoroma kana makalelo a namafiyiheda vamohi na aliwa eto weyo mwa tempu yenne unotchindjeya ira ukale nnga mutu muxa.

⁷ Waona ira jionihedo jatene jiwongile miyo ji jihimala ireya, usakanye jatene jinafune we, tchoira Mulugu unakalege na weyo.

⁸ Usogolre wakale Jiligali. Wadowa, wadidedihege wewo malambo matanu na menli ira dize. Miyo nnoza digumane na weyo ira divelele mukuto otumeya, vamohi na jovelela ja murendele. Era eno, miyo nnouwandela inafuna we ira.>>

⁹ Tempu yenne Sawuli alanyana liye na Samuweli, Mulugu ohotchindja murima wa mulombwana Sawuli. Eto siku nenne kadowaga sogolro, jionihedo jatene jene Samuweli jamuwandenle liye johoireya.

¹⁰ Sawuli na namalabaye ule kagafiyile ilambo ya Jibeya, kohogumanana nikuru na anamafiyiheda. Evale liye agagumanne na anamafiyiheda ale, Munemba wa Mulugu ohovolowaga mwa liye. Noira enne na liyene ohovolowaga kala na aliwa, liye roma wongaga ja Mulugu.

¹¹ Evale atu kamuiziwile wanle kagamuonne enne, kohoroma wonga keraga: <<Kodi ipanduwile nni na Sawuli mwana Kixi ula? Kodi liye wire sanduwa kala namafiyiheda wa Mulugu?>>

¹² Eto mulombwana mmohiwa akala wewule ohowongaga, liye ira: <<Aa, nnga anamafiyiheda amohiwala? Kodi aliwa ira kakale anamafiyiheda, ababiwa kere kala anamafiyiheda?!>> Evale paromile wongiwa imariya yoira: <<Kodi na Sawuli wenne gu namafiyiheda?>>

¹³ Evale Sawuli agamanle wonga ja Mulugu, ohovenyaga, liye dowaga gwela nimburo notama na mikuto nne.

¹⁴ Agafiyile wewule, ohonfwanya titiyu waye. Evale Sawuli titiyu waye ule ohonfuka Sawuli na namalabole, liye ira: <<Kodi nyo mwali waani?>> Sawuli ohowakulaga, liye ira: <<Hiyo naasaka aburu eto kanaaonne. Nomala eno, hiyo dowa nfuka Samuweli ira aniwandele wali atu.>>

¹⁵ Evale titiyu waye ule ohonfuka, liye ira: <<Nnafuna mudiwandele, mwaganfwannye Samuweli, uuwandenleni avi?>>

¹⁶ Sawuli ohowakula, liye ira: <<Liye uniwandenle mwa ibaribari ira: <Aburu enyu kohooneya.> >> Mbwenye joira Samuweli ohomuhambiha ira akale mwene, Sawuli kamuwandenle.

Sawuli ohambihiwa vamentoni va anamwindji

¹⁷ Mwa tempu yenne Samuweli ohaitanihaga Ana Izarayeli ira kagumane ilambo ya Mizipa vamentoni va Yehova.

¹⁸ Kagagumanne Mizipa ule, ohawandela eraga: <<Yehova Mulugu wa aIzarayeli unawonga ira: Miyo duhukumanani nyo ilambo ya Ijipitu eto duhuwombolani mmandani mwa aIjipitu na mmandani mwa maumwene matene kauzuzumihani.

¹⁹ Mbwenye nyo peno muhumuruna Mulugu wenyu mmohive wenno unauwombolani muwari mwa makani enyu matene na makatamiho enyu matene. Muruna uwa, nyo muhuwonga na Mulugu ira: <Hiyo nnafuna munivahe mwene.> Tempu tchenna ira mugumane nyo mwatene vamentoni va Yehova. Mwazaga, mukale ogaweya malogo malogo eto kada nlogo nizege nikuru nikuru.>>

²⁰ Noira eno, Samuweli ohaitanaga malogo matene ira kaze vevale. Kagazile, kohosakanyaga jogu ya ngari. Evale ngari yagwenle nlogo na Benjami.

²¹ Noira eno, Samuweli ohosakanyaga jogu ya ngari muwari mwa nlogo na Benjami. Mwa enne agweliwe ngari ali ziza na Matiri. Noira eno, kohosakanyaga jogu ya ngari muwari mwa alombwana a muibalini mwa Matiri. Evale agweliwe ngari ali mulombwana Sawuli mwana Kixi. Mbwenye funa nvenda Sawuli evale, tchamuonnegevo.

²² Noira enne, kohonfuka Yehova, aliwa ira: <<Kodi mutu usakulriwe uli veva?>> Yehova ohowakula, liye ira: <<He uli veva. Eni uvikoyile ule unafwanyeya mitolro ule.>>

²³ Evale aliwa kohotamangaga, aliwa dowa mulanda mulombwana Sawuli, aliwa muzana. Fwanyeya ira liye ali mulombwana olapa bure akwaranya atenene. Liye aimela, atenene kamugomela mmafudini.

²⁴ Mwa enne Samuweli ohowonga na atu atene eraga: <<Wenna gu mulombwana wenno Yehova umusakunlre liye! Muwari mwa hiyo kalimo mulombwana okwakwanela na liye.>> Evale atu atene kohokuwaga keraga: <<Mwene oye! Oye!>>

²⁵ Nomala eno, Samuweli ohawandelagamo jatene jafuna atu muirelaga mwene na jejo mwene jafuna liye airelaga aliwa. Nomala oholrembaga jatene ejo mulivuruni, liye tukula livuru nne dowa hela vamentoni va Yehova. Noira eno, Samuweli ohabalaletcha atu atene, aliwa dowaga mmavande mwiwa.

²⁶ Eto mulombwana Sawuli ohovenya, adowaga waniwa ilambo ya Jibeya. Liye adowaga, ohoveleliwaga na alombwana amohiwa anno Mulugu aasakwinyile liye mmirimani mwiwa.

²⁷ Mbwenye alombwana amohiwa otakala mirima, kohowongaga keraga: <<Iyaa, kodi Sawuli okala ha wenne unowanda niwombola mmandani mwa amwidani?>> Aliwa eto kohomulramwisa Sawuli fiyeda hanvaha mivaho nnga dedo danvaha atu amohiwa. Mbwenye Sawuli ohomiyalaga jaye nne kawongilegeve yengo.