1 Samuweli 1 - Mazu Otchena a Mulungu

Baliwa wa Samuweli

¹ Ohokalawo mulombwana mmohi wa nlogo na Efarayimi, akaletcha sidadi ya Ramatayimi-Zofimi, ilambo ya mmwangoni ya Efarayimi, nzina naye aitaniwa Elikana. Babaye ali Jerowawu, Jerowawu ali mwana Eliyu, Eliyu ali mwana Towu eto Towu ali mwana Zufe.

² Mulombwana Elikana anna ahiyana ambinli. Mmohi nzina naye ali Ana, mmohiwa nzina naye ali Penina. Penina ohokana ahima, mbwenye Ana kabala.

³ Va kada yaka mulombwana Elikana okumetcha sidadi yakala liye, liye dowaga sidadi ya Silo ira amutamalele Yehova wa Makuru Matene no velela mukuto. Mwa tempu yenne ilambo ya Silo ule anamakuta a Yehova kalabawo kali ana Eli anno kaitaniwa Hofini na Fineyasi.

⁴ Eto fendo datene mulombwana Elikana avelela liye mukuto wa Yehova, afunaga gawa mukuto ohala, otukuletcha wa vang'ono, nvaha muhiyanaye Penina, mmohiwa avaha ahimaye a anapongwe na anavihiyana.

⁵ Mbwenye zela muhiyanaye Ana, liye anvahetcha fendo mbinli. Tchoira masiki Yehova asakanyileve ira Ana ahabale, Elikana omuziveliwa.

⁶ Evale muwari moira Yehova kamurumelihile bala, mwanamayaye Penina akaleletcha muwongela mazu a ibewe ira nfwaye atakaleliwege.

⁷ Va kada yaka, aliwa kadowaga Nyumba ya Yehova ira kavelelege mikuto, mwanamayaye akaleletchave muwongela mazu abure, fiyeda Ana kukumuwaga mmirimani mwaye, liye hadjaga, so kalelaga nlave bahi.

⁸ Mwa enne Elikana ohonfukaga muhiyanaye Ana, liye ira: <<Kodi weyo unanleletcha nni? Mwasiwa gwa nni we kalelaga nlave eto hafunaga dja? Mwasiwa gwa nni we kalaga okumbanyene mmirimani mwawo? Kodi miyo kadukwakwanne hiyaniha no abala anapongwe kumi?>>

⁹ Siku nimohi akuda Elikana kagavelenle mukuto sidadi ya Silo, kagadjile, kagang'wile, Ana ohovenyaga ira alobele. Ora yenno namakuta Eli afwanyeya ogaratene vakaderani vaye wandamelana va mulango wa Nyumba ya Yehova nnga veretcha liye.

¹⁰ Ana ohodowa Nyumba ya Yehova mosanyeya mwene, liye roma lobela muwari monla wohokala wa masika.

¹¹ Evale muwari monla mule, ohonvepaga Yehova, asakanyaga yolumbela yaye eraga: <<Yehova wa Makuru Matene, miyo nnouvepani ira mudikamihede muwari mwa goyi dinna miyo di, kamudidiwale miyo vano namalaba wenyu, mudivahe mwana. Miyo nnolumbela vamentoni venyu ira na ibaribari mwadivaha mwanapongwe, miyo nnonvelela mmandani mwa nyo Yehova ira aulabegeni mabasinyu kalawo waye watene eto liye kaza asata nsisi naye.>>

¹² Evale Ana alobelaga wa Yehova, namakuta Eli ohoromaga muing'ana milomo daye.

¹³ Mbwenye Eli kawanda vwa yawongaga muhiyanole mwasiwa alobela mmirimani mmirimani. So mbwenye Eli aonaga milomo daye sakwinyeya bahi. Nona Eli agamuonne enne, aumbuwela ira muhiyanola uhulrezelra.

¹⁴ Evale ohomuwongana, liye ira: <<We muhiyana we, unaza uhiye lrezelra alini? Inafwanela uhiye ng'wa vinyu!>>

¹⁵ Evale Ana ohowakulaga eraga: <<Nari mbwiyeni, miyo kading'wile, nne vinyu nne yong'wa indimuwa. Miyo mbwiyeni dinna kumbanya ulukulu mmirimani mwaga. Mwa eno, damuwandela Yehova zela makatamiho dinna miyo.

¹⁶ Eto kamudione miyo namalaba wenyu nnga dili muhiyana ohokana mabasa. Tchoira miyo dikalele eva dilobelaga na mwasa okukumuwa wohokala wa masika no kumbanya undimuwa unafwanyeyana miyo.>>

¹⁷ Mwa enne Eli ohomuwongana Ana, liye ira: <<Venya, udowege mwa murendele. Eto Mulugu wa Izarayeli auvahe yenno ivepile we.>>

¹⁸ Ana eto ohowongaga, liye ira: <<So miyo nnavepa ira mwahala mudifwewele murima miyo namalaba wenyu.>> Nomala enne, Ana ohovenyaga, liye dowaga. Agadowile, ohoroma dja eto kawelenle kala okumbanyene akoka.

¹⁹ Mmetcheloni muwa mulombwana Elikana na atu atene a vande vaye kohobehaga na mabebehene, aliwa kokora vamentoni va Yehova, kamutamalelaga. Kagamanle mutamalela, kohowelelaga waniwa ilambo ya Rama. Kagadowile vande viwa, Elikana ohogona na muhiyanaye Ana. Evale Yehova ohorumelaga yolobela ya Ana.

²⁰ Ana ohofiyeda kana vambani eto siku nobala nagafiyile, ohombala mwanapongwe. Agabanle, ohowonga eraga: <<Mwanola danvepile Yehova, nomala liye divaha.>> Mwa enne ohonvaha mwanole nzina na Samuweli [ku wonga vepa].

²¹ Yaka imohiwa yagafiyile, mulombwana Elikana ohovenyihana na atu atene a vande vaye ira adowe Silo wakoka wene, avelele wa Yehova mukuto wa yaka eto ira akwakwanelihede yolumbela yaye.

²² Mbwenye Ana kadowile. Liye ohowonga na mamunaye ira: <<Nyo tchiyeni. Mwanola ahiya wamwa tchi tempu inafuna miyo mudowana ira danvelele vamentoni va Yehova, akale wewule kalawo waye watene.>>

²³ Evale mamunaye Elikana ohorumelaga eraga: <<Tabo, uirena nnga mwemo munaonela we. Ukale eva fiyeda mwanola ahiye wamwa. Eto Yehova aukamihede ira uwande kwakwaneliheda nipangano neno napanganne we.>> Evale Ana ohalaga, liye muwamwihaga mwanaye ule fiyeda mwanole hiya wamwa.

²⁴ Mwanole agahiyile wamwa, Ana ohotukulaga ng'ombe ya mulombwana ya yaka taru, kilu kumi da utu, raguwa osakanyiwa na tembe na mwanainyama mwemo mwazanle vinyu, vamohi na mwanole, liye venyihana dowaga. Ana ohomudowana mwanole Nyumba ya Yehova ilambo ya Silo. Tempu yenno mwanole afwanyeya agali mwana mung'onong'ono.

²⁵ Mwa enne mwanole ababaye ale kohovelelaga mukuto wa ng'ombe ule, aliwa mutukula mwanole mudowana wa namakuta Eli.

²⁶ Kagamudowilena wa Eli, Ana ohowongaga na namakuta Eli eraga: <<Mbwiyeni, nnowonga vamentoni venyu, miyo dili muhiyana mwadionnege nyo siku nne diza dilobelaga vamentoni va Yehova, mudionaga nnga dali maliba lrezelra.

²⁷ So danvepaga Yehova ira awande divaha mwana. Eto mwa eno Yehova ohovwa yolobela yaga, liye divaha mwanola.

²⁸ Na mwasa wenno miyo peno dihimuzana mwanola ira dinvelele mmandani mwa Yehova. Dizile nvelela ira alabege mabasa a Yehova kalawo waye watene.>> Ana agawongile enne, aliwa kohomutamalelaga Yehova.