1 Peduru 5 - Mazu Otchena a Mulungu

Mazu oalanga aansiyawu na azombwe

¹ Va miyo nnafuna daawelruze aansiyawu anno anafwanyeya muwari mwa nyo. Tchoira na miyene eto nnafwanyeya dagali ansiyawu nnga aliwa eto nnafwanyeya dagali mutu ohidedela umboni zela goyi da Kiristu eto dihikana pandi na undimuwa wenno unafuna za oneyihiwa.

² Inafuna miyo ukokomezani tchoira inafwanela mukumbuzege eto muing'anelege pama nikuru na mabila a Mulugu neno nnawendana nyo. Kamusogolrelrege muwari mokanyihediwa, nari. Mbwenye musogolrelrege mofuna mwenyu nnga mwemo munafunela Mulugu. Kamulabege ira muvahiwe kobiri, mbwenye mulabege movivelela mofuna kumbuza.

³ Eto nne kamuvendege jovikaliha annya zela atu a Mulugu anno muhiyediwe nyo ira mwaasogolrelrege. Mbwenye inafwanela mwaasogolrelrege na makalelo apama ira mabila kawandege usazihani makalelo apama munna nyo.

⁴ Era eno, Namakumbuza Mundimuwa aza, munoza muwatchele tchapowa wa undimuwa wohokana goma uwa.

⁵ Na nyenne eto azombwe inafwanela mwaavwelelege andimuwa. Eto inafwanela muwendege moviyeviha mmohi na nfwaye. Tchoira Mulugu unoatakaleliwa aliba vitukulela mbwenye unoairela sayi atu anne anaviyeviha.

⁶ Nona inafwanela mukale oviyeviha vati va ndanda na Mulugu na kopolo ira autukuleleni yafiya tempu inafuna liye.

⁷ Muvelele makatamiho enyu matene wa Mulugu, na mwasa oira liye unoukukumuwelani.

⁸ Inafwanela mukale tchendjewa eto muing'anelege mwasiwa mwidani wenyu Diyabo unawendawenda aurungunuwagani nnga podogoma unanla amusayelaga mutu ira amutakune.

⁹ Mulimbe na nroromelo nenyu ira mmurunihe liye jofuna jaye moiziwa ira abalinyu a mwilamboni mwatene anofwanyeyana goyi imohive yenno inna nyo.

¹⁰ Nyo mwagamanle onihiwa goyi tempu ya vang'ono, Mulugu wa sayi datene, wenno uuitanileni muwari mwa Yesu Kiristu ira muvolowe muwari mwa undimuwa waye ohomala, liyene unoukalihani okwakwanelene, unouvahani kopolo, unoulimbihani no uimelihani pama.

¹¹ Utongi watene ukale waye kala no kala. Ame!

Mazu ogomiheda

¹² Miyo nnoulrembelani karta ning'onong'onove ni muwari mokamihediwa na mbalaga unamuona miyo nnga mutu ororomeleya wenno unaitaniwa Sila. Miyo dilrembele mazwala ira dulimbiheni eto ira dihidedele umboni ira muiziwe sayi da ibaribari da Mulugu. Inafwanela mukale olimbene muwari mwa sayi da Mulugu dedi.

¹³ Nikuru na atu omuroromela Yesu nosakulriwa nnga musakulriwe nyo nnafwanyeya Babiloniya nnoulondjelani. Eto mwanaga Markuji na liyene unoulondjelani.

¹⁴ Mulondjelane na beju dozivelana, mmohi na nfwaye. Murendele akale na nyo atene munafwanyeya muwari mwa Kiristu. Kukala mazu a karta noroma nilrembiwe na Peduru.