1 Peduru 4 - Mazu Otchena a Mulungu

Jofuna ja Mulugu para atwaye

¹ Nona nnga Kiristu ohoonihiwa goyi mwa maningo, na nyenne inafwanela mukale okozeyene ira muonihiwe goyi, muumbuwelaga iriwana jimohive jejo jairiwena liye. Tchoira mutu wenne unarumela zuzumihiwa wa maningo, liye unohiya yotega ira

² malambo matene anamale liye mwilamboni ya vati muno avendege irana jofuna ja Mulugu, hiya iragana jofuna ja maningo.

³ Tchoira nyo muhumala iziwa ira muhunonga tempu idjindji musakanyaga jengo jinaziveliwa atu ohombalra Mulugu. Tempu yenno nyo mwawenda na jofuna ja maningo, iluveluve yoirana jotega, lrezelra, dowaga vamainelo nari vamang'welo, ante mofiyedetcha labagana vikwamutu josema jejo nnakondihiwa mmalamuloni.

⁴ Mbwenye peno atu a unde annana kukumuwa na mwasa oira muhatawa, aliwa katamangaga ira kairegena jabure jatene johokala ja masika jinairana atu nyo kamuli na aliwa. Nona peno aliwa anouwambani.

⁵ Aliwa mbwenye vasogolro anoza karumelele jatene jejo vamentoni va wenno uli okozeyene ira aatonge aliba kalawo na atu okwa.

⁶ Nona Muselu Wapama alaleyiwa wa atu anne kakwile ira masiki katongiwe zela maningo nnga vinafuna iriwana atu atene, aliwa kakalewo mwa Munemba nnga munafunela Mulugu.

⁷ Magomelo wa jengo jatene uhuwandamela. Na mwasa wenno inafwanela muviwendihe pama eto mukayena muru wapama ira muwande lobela.

⁸ Eto kwaranya jatene, mukayena zivelana ulukulu mmohi na nfwaye. Mwasiwa mwakana zivela, munowanda levelela jotega jidjindji jene.

⁹ Inafwanela mukale atu owatchelana mmavande mwinyu mohonong'onana.

Kada mutu alabegena yolemelela yenno invahile Mulugu

¹⁰ Inafwanela kada mutu awandege labana yolemelela yenno Mulugu invahile liye mwa sayi ira aalimbihegena afwaye. Mukale atu ovahediwa, olaba pama na sayi dohiyana-hiyana da Mulugu.

¹¹ Wenno uvahiwe ira alaleyege, inafwanela alaleyege nnga unalaleya Mazu okumela wa Mulugu. Wenno uvahiwe ira aakamihedege afwaye, aakamihedege muwari mwa kopolo Mulugu unavaha liye. Muiregena jatene jejo ira mwa jatene jinairegena nyo, Mulugu awandege tamaleliwa muwari mwa Yesu Kiristu, wenno unna undimuwa na utongi kala no kala. Ame!

Onihiwa goyi na mwasa okala muwari mwa Kiristu

¹² Afwaga anaaziveliwa miyo, kamutikine zela makatamiho anafuna ufwanyani anno anakala nnga munlo ohindetchetcha wenno unaza wa nyo ira auxixeni kalaga nnga tchi yengo imohiwene.

¹³ Mbwenye nyo mwafwanyeyana makatamiho amohive anno aonihiwe Kiristu inafwanela mukayena hagalala ira undimuwa wa Kiristu waza uoneyihiwaga, na nyenne muze mukayena hagalala no ziveliwa ulukulu.

¹⁴ Nyo mwaruwaniwaga na mwasa wa nzina na Kiristu, munorelihiwa. Tchoira mwera eno, Munemba wa Undimuwa wenno uli Munemba wa Mulugu, unafwanyeya na nyo.

¹⁵ Mbwenye muwari mwa nyo kakalemo unafuna onihiwaga goyi na mwasa ompa nfwaye, owu uba, owu ubure, nari na mwasa omexeri ja annya.

¹⁶ So mwaonihiwaga goyi na mwasa okala muKiristawu, kamukayena manyazo mbwenye mmutitimihege Mulugu na mwasa oitaniwa na nzina neno.

¹⁷ Mwasiwa tempu yotonga ihifiya. Ale anafwanyeya pandi ya nlogo na Mulugu banafuna kala arandji tongiwa. Kodi akala Mulugu unafuna arome nitonga hiyo, nnga ale kahanavwelela Muselu Wapama wa Mulugu anafuna kagomele avi?

¹⁸ Eto nnga akala ili yorutcha ira atu apama kavulusiwe, kodi atu abure na anamatega anafuna kagomele avi?

¹⁹ Na mwasa wenno atu anne anaonihiwa goyi mofuna mwa Mulugu, inafwanela kavivelele mmandani mwa Namapandutcha wewa ororomeleya eto kadowege sogolro muwari moirana japama.