1 Peduru 3 - Mazu Otchena a Mulungu

Bandja na mutu omuroromela Yesu

^1-2 Na makalelo mamohive, na nyenne ahiyana muteliwe inafwanela mwaavwelelege amamuninyu. Ili ira wamukana mamunawo ohobalra mazu, aona makalelo awo ira weyo uli muhiyana wa makalelo apama, okana respeto, liye awande iziwa ira mazu kohokana mabasa muwari mwa mawendelo awo apama masiki weyo wahamuwandenleve mazu.

³ Eto riya wenyu kukale riya wa undeve bahi zela luwa wa nsisi, wara birinku da oru, nari wara nguwo dapama.

⁴ Mofutukula, nyo riya wenyu inafwanela ukale riya wa mirima denyu. Tchoira wakana makalelo opwaseya, omiyala, riya wewo ku riya wohowanda dimela eto ku riya wofuneya valukulu vamentoni va Mulugu.

⁵ Mwasiwa ahiyana otchena a wanle, anno kamuroromeletcha Mulugu, makalelo ewa oriya ali oira kada muhiyana orumela tongiwa na mamunaye.

⁶ Kalaga nnga Sara. Sara ali muhiyana onvwelela mamunaye Abarahamu, ante liye fiyeda mwezo omuitana mamunaye na nzina na mbwiye. Nyo ahiyana mweragana japama mwahaovaga yengo ili yatene yowopiha, munafwanyeya mwagali ana Sara.

⁷ Eto na nyenne alombwana mutenle, inafwanela mukalege vamohi na ahiyaninyu mmavande mwinyu mwa zelru. Tchoira aliwa makalelo kanna atu ba makalelo ovuta kwaranya makalelo munna nyo. Nona inafwanela mwarihedege ahiyaninyu mwasiwa na aliwene anafuna kawatchele ingumi yohomala mwa sayi vamohi na nyo. Inafwanela muiregena jatene eji ira jolobela jenyu jiwandege vweya.

Mawendelo ofwanela para atu omuroromela Yesu

⁸ Vogomiheda vuwa, inafwanela nyo mwatene mukayena zelru dimohive, mukayena kumbanyana, muzivelanege nnga anazivelana atu a muibalini mmohive, mukayena mirima dowendelana tangaranga eto mukale oviyeviha mwa joumbuwela jenyu.

⁹ Mutu auirela ubure, weyo kumuwelihede ubure wakokene. Eto mutu auruwana, weyo kumuwelihede ruwana wakoka wene. Mofutukula inafwanela mwaarelihege. Tchoira Mulugu uitanileni ira mwaarelihege atu ira na nyenne muwande watchela mareliho.

¹⁰ Tchoira mazu anawonga ira: <<Mutu wenne unaziveliwa kalawo waye eto unafuna ona malambo apama, inafwanela akale oing'ana nlumi naye ahanawonge, tawiha ira unawonge yabure eto mulomo waye unawonge jonyenga.

¹¹ Inafwanela akale olapela wene na jabure, airegena upama, avende murendele eto aharege murendele wenno.

¹² Mwasiwa meso a Nabwiya anaaing'ana atu apama eto mabaru aye kali oreyene ira avuruwane jolobela jiwa. Mbwenye takaleliwa wa Nabwiya uli na atu anne anasakanya ubure.>>

Onihiwa goyi na mwasa oirana japama

¹³ Nyo mwakalela ntindi irana japama, kodi bani unafuna uirelani jabure?

¹⁴ Mbwenye masiki muonihiwaga goyi na mwasa oirana upama, kamukukumuwe, nne kamwaovege aliba uonihani goyi ale. Mwasiwa munorelihiwa.

¹⁵ So mbwenye mmuhelege Kiristu vasogolro venyu nnga Nabwiya wenyu. Mukalege okozeyene ira muwande wakula yofuka ya kada mutu unafuna ufukagani zela yoing'anela inna nyo.

¹⁶ Mbwenye muwakulege moviyeviha eto muwari moariheda afwinyu. Muiregena eno na mmirimani mwenyu mwatene ira ale anawonga joululuvihani zela mawendelo enyu apama omuroromela Kiristu kawande kana manyazo.

¹⁷ Tchoira akala Mulugu unanfunana mutu ira aonihiwe goyi, ili pama mutu aonihiwe goyi na mwasa oirana upama, hiyaniha no onihiwa goyi na mwasa oirana jabure.

¹⁸ Tchoira Kiristu na liyene ukwile fendo imohive ira atimihe jotega jihu jatene. Masiki liye alive mutu wapama ahategile, ohoonihiwa goyi zela jotega ja atu abure ira awande nizana wa Mulugu. Liye akwile mwa maningo, mbwenye ohovenyihiwa mwa Munemba.

¹⁹ Mwa eno, mMunembani ohodowa laleya minemba nnafwanyeya mukadeya.

²⁰ Minemba dalaleyile liye dile dali dedo dahanvwelela Mulugu tempu ya mulombwana Nowe asakanyaga mwadeya. Ora yenno Mulugu adediheda movilela ira katwaruwe. Atu a vang'ono kafwanyeya mmwadeyani mule atanu na araru bawandile vulumuwa muwari mwa mahindje madjindji kazile.

²¹ Mahindje ale ali yofwalrafwaniha yobatiziwa. Eto peno va batiziwa tcheniyo inauvulumutchani. Dawongaga ira batiziwa, kahi batiziwa mutu unabwina liye mwiko akumihamo tumbulru nnafwanyeya mmaningoni mwaye nari. Nnawonga zela mutu nvepaga Mulugu ira amuhuwe mmirimani mwaye muwari mwa Yesu Kiristu venya mokwani.

²² Liye agavenyihiwe, agadowile zulu, peno va unafwanyeya muwononi odjana wa Mulugu. Liye eto uhuvahiwa utongi ira aatongege angelro nari andimuwa andimuwa nari kopolo datene.