1 Korinto 9 - Mazu Otchena a Mulungu

Makalelo olramwiseya a Pawulo Pawulo afuna joira jaye jatene jilabe ira atu kawande vwa Muselu Wapama

¹ Kodi nyo kamunawanda ona ira miyo kadili muzari wa mutu mmohiwa? Kodi nyo kamunawanda diona ira miyo dili namarumiwa, dili mutu umuonne Yesu Nabwiya wehu? Kodi nyo kamuli nnga yengo isakannye miyo muwari mwa kopolo da Nabwiya?

² Akala atu amohi kinadiona nnga namarumiwa, zela nyo mbwenye na ibaribari dili namarumiwa wa Nabwiya. Tchoira nyo muli karimbu yorumelela zela unamarumiwa waga muwari mwa Nabwiya.

³ Zela ale anawanganyeda unamarumiwa waga, nnafuna daawakule atwale eni.

⁴ Kodi miyo na Barnabe kaninna direitu yotambilra jodja na jong'wa zela mabasa analaba hiyo?

⁵ Kodi miyo na Barnabe kaninna direitu yomutela muhiyana omuroromela Yesu amala nimuwendagana muwari mwa mabasihu nnga vere anamarumiwa afwihu, Nabwiya Yesu adibiliye no zaga mulombwana Peduru?

⁶ Kodi miyo na Barnabe bahi guvahiwe hinda mabasa a Mulugu mohokala motambilra ja ilambo ya vati, funeyaga ira hiyo bahi nilabege na mandihu? Nari.

⁷ Kodi munyakondo guvi unalaba ahatambilra yengo? Kodi bani unazala munda wa uva, amala uva uwa ahadjaga? Bani unakumbuza anavinyama liye ahang'waga mukaka wa anavinyamale?

⁸ Miyo dawongaga eji, kannawonga muwari mwa zelru da atu bahi, nari. Tchoira malamulo anowonga imohive.

⁹ Tchoira muwari mwa malamulo a Mozeji munofwanyeya mazu oira: <<Kakalevo unafuna imanga ng'ombe wanoni, amala adugudiha udja.>> Ira Mulugu awonge yofwalrafwaniha yenna kodi ilukuluwa Mulugu akukumuwela ng'ombe? Nari.

¹⁰ Na ibaribari awonga zela hiyo atu. Awongela liye na hiyo atu tchi ila. Inafwanela maliba tipulra atipulrege eto maliba handa ahandege muwari modediha gaweliwa jalo jinafuna kumavo.

¹¹ Akala hiyo nihizala ja Mulugu muwari mwa nyo, kodi kifwanenle nihande ja ilambo ya vati muwari mwa nyo?

¹² Akala mwa nyo kohokalawo atu okana direitu yovahiwa jengo, kodi hiyo kaninna direitu yoakwaranya atu anne? Masiki eno, kuma varomile hiyo laba na vanove kannakose direitu dihu. Mwasiwa nnatawa ira nakosa direitu dihu, atu anoza kakayena wanganyeda zela hiyo. Nona hiyo nnorumela zuzumela yengo ili yatene ira atu kavwe Muselu Wapama wa Kiristu.

¹³ Kodi nyo kamunaonelramo ira mutu wenno unalaba mabasa a Nyumba ya Yehova, unopata udja waye Nyumba ya Yehova emule? Eto anamakuta anakuta mikuto vaibuwani anogaweliwa muwari mwa mikuto emule ira na aliwene kadjege emule.

¹⁴ Sawasawa eto zela anamalaleya. Na aliwene Nabwiya utonga ira ule unalaleya Muselu Wapama, udja waye ukumege muwari molaleya mwemo.

¹⁵ Mbwenye miyo kannarome kosa direitu daga nne imohi. Eto dalrembaga karta ni, kannalrembela ira mudivahe yengo. Tchoira yali yapama dikwe hiyaniha no nvaha mutu tempu yodiwaka inavitukulelana miyo.

¹⁶ Tchoira laleyave Muselu Wapama kunadivaha mwasa ira divitukulele mwasiwa dire rumiwa. Eto udilu wa miyo dahalaleye.

¹⁷ Akala miyo nnalaleya na mmirimani mwaga mwatene, nnokana yotambilra. Mbwenye masiki dahafunege, dilive mutu ovahediwa izo yolaleya.

¹⁸ Miyo mbwenye nnafuna dikayena yotambilra nni? Yotambilra inna miyo, nnaziveliwa laleya mohodediheda tambilrihiwa na aliba laleyiwa ira dahadjege direitu daga zela laleya Muselu Wapama.

¹⁹ Agali kadili muzari wa mutu mmohiwa unafwanyeya mwilamboni ya vati, miyo nnavikaliha muzari wa atu atene ira amohiwa oindjiva kamuroromele Yesu muwari mwa miyo.

²⁰ Ira daalaleye aJudewu, miyo dohovikaliha muJudewu ira aJudewu kawande rumela jalaleya miyo. Kadili mutu owenda na malamulo mbwenye ira daalaleye atu owenda na malamulo, miyo dohovikaliha mutu owenda na malamulo ira atu owenda na malamulo kawande rumela jalaleya miyo.

²¹ Ira daalaleye atu kahanawenda na malamulo, miyo dohovikaliha mutu ohowenda na malamulo ira atu ohowenda na malamulo kawande rumela jalaleya miyo. Dawongaga ira davikaliha nnga mutu ohowenda na malamulo, kahi ira kannawenda na malamulo a Mulugu, tchoira miyo nnawendave na malamulo a Kiristu.

²² Ira daalaleye atu ovuta, miyo dohovikaliha mutu ovuta ira atu ovuta kawande rumela jalaleya miyo. Miyo nnoirana jatene jene vamentoni va atu atene ira muwari mwa makalelo matene anera miyo, atu kawande vwa jolaleya jaga ira kavulusiwe.

²³ Jatene ejo jinera miyo, ilukuluwa so nnafuna atu kawande vwa Muselu Wapama ira kagavwile, kawatchele upama uwatchenle miyo.

²⁴ Nyo muhumala iziwa ira ilambo yakana korida, atu atene anne anotamanga. Masiki atene katamangege, unafuna ganyalri gu mutu mmohi bahi. Nona inafwanela mutamangege na makalelo oira muganyalri yotambilriwa.

²⁵ Kada mutu ahanatamange, unokana tundela maningo aye na makalelo madjindji, mwasiwa liye unafuna atamange mwapama. Mbwenye jatene jeji anerela mwasiwa anafuna katambilre tchapowa ohorutcha vunda. Hiyo mbwenye mabasa ehu analaba hiyo, nnafuna nitambilre yengo yohokana goma uwa.

²⁶ Muwari mofuna tambilra yengo yohomala, miyo kannatamanga na makalelo a burebure eto kannalaba nnga mutu unabubuda yengo yohooneya, bubudaga nipevo.

²⁷ Mbwenye nnokana tundela maningwaga ira diiregena japama tawiha ira dagamanle alaleya atu, miyo damwinnya nnaze dikumihiwemo mukoridani.