1 Korinto 8 - Mazu Otchena a Mulungu

Mazu otanda nkani wa jodja jokuteliwa vikwamutu josema Nkani wa jodja jokuteliwa vikwamutu josema

¹ Zela yofuka yenyu zela nkani wa jodja jokuteliwa vikwamutu josema, nnafuna dirome wonga ira hiyo atene nihimala iziwa ira kada mutu ukana jengo jiiziwile liye. Iziwetchetcha unoziha vitukulela mbwenye kana zivela unoziha alimbiha afwawo.

² Akala ukalavo mutu mmohi unaona ira: <<Jatene jene dihimala iziwa>>, kanaiziwe ibaribari muupamani muwa.

³ So mbwenye wenno unamuziveliwa Mulugu gwenno unaiziweya na Mulugu.

⁴ Zela nkani odja jengo jokuteliwa ikwamutu yosema, hiyo nihimala iziwa ira ikwamutu yosema kahi yengo yokalawo, mbwenye uliwo gu Mulugu mmohi wa ibaribari bahi.

⁵ Tchoira mwa ibaribari kohokalawo amilugu a ilambo ya zulu na amilugu a ilambo ya vati anaahara atu. Mbwenye masiki kakalewo amilugu oindjiva nari anabwiya oindjiva anaahara atu,

⁶ zela hiyo mbwenye nihiiziwa ira ninna Mulugu mmohi bahi, Baba wenno upandutchile jatene jene. Nihiiziwa ira hiyo nikalelewo ira liye ateteliwe. Eto nihiiziwa ira hiyo ninna Mbwiye mmohive bahi, Yesu Kiristu. Jatene jipandutchiwe, jipandutchiwe muwari mwa liye eto nikanlewo muwari mwa liye.

⁷ Fwanyeya ira kahi atene anakana onelramo wewo. Tchoira kohokalawo atu wanle kalemenle riheda ikwamutu yosema. Kawelela dja jadja atu jile, para aliwa inakala nnga kahanlena makalelo ewa a wanle otamalela ikwamutu yosema. Evale voira kinalimba, kadja, mmirimani mwiwa munotakalihiwa.

⁸ Na ibaribari kahi udja unanikaliha pama vamentoni va Mulugu. Wahadje, kupuzeyile, eto wadja, kuganyalrile.

⁹ So mbwenye akala weyo unowanda dja, polre polre tawiha ira muwari modja wawo unaze ungwagwadutche nfwawo oholimba murima zela ejo.

¹⁰ Tchoira nfwawo unoufwanya we maliba iziwa yoira udjege jatene, udjaga munyumbani mwa ikwamutu yosema. Liye agauing'anne, muwari moholimba murima waye, unopela nrima jodja jikuteliwe vikwamutu josema jinadja we jile.

¹¹ Liye adja mowanganyeda, ku wonga weyo utukula ibaribari yanna we, weyo munongana mbalawo wenno Kiristu umukwenle liye.

¹² Tapulela eno umala mutegela mbalawo eto vamohive vevo umutegela Kiristu mwasiwa weyo unvaha yowanganyeda nfwawo mmirimani mwaye.

¹³ Nona miyo daiziwa ira: <<Dadja ila, nnomugwagwadutcha mbalaga>>, miyo kadiza diwelela idja yenno tawiha ira nnaze dimugwagwadutche mbalagole.