1 Korinto 7 - Mazu Otchena a Mulungu

Jowakula ja Pawulo zela jofuka janna aKorinto zela telana

¹ Va nnafuna diwakule jowonga jidilrembenle nyo. Zela nkani otela, yali pama mulombwana ahatele.

² Mbwenye voira mulombwana ahatele eto muhiyana ahateliwe, unokana funafuna ira araruwe, inafwanela mulombwana uli watene akayena muhiyanaye eto muhiyana uli watene akayena mamunaye.

³ Inafwanela mulombwana agumanege na muhiyanaye eto muhiyana agumanege na mamunaye nnga vinera atu katelana.

⁴ Tchoira muhiyana kanna utongi zela maningo aye eka mbwenye unatonga maningo a muhiyana gu mulombwana. Sawasawa eto mulombwana kanna utongi zela maningo aye eka mbwenye unatonga maningo a mulombwana gu muhiyanaye.

⁵ Kakalevo unafuna nkonda nfwaye. So muwari movwanana, mwafuna, so mmalege tempu ya vang'ono mwahanagumane ira mukayena ora yolobela mopwaseya. Mwamala eno, inafwanela mugumanege akoka tawiha ira Satana unaze aunyengeni mwasiwa kamunawanda vihiyiha jabure.

⁶ Dawongaga eno kannaurumani. So nnawonga ira mwafuna.

⁷ Miyo dohofuna nnga atu omuroromela Yesu kakale adiye nnga miyo. Mbwenye dihiiziwa ira kahi eno, mwasiwa kada mutu ukana yolemelela yaye yenno Mulugu invahile liye. Mutu mmohi uvahiwe ila, nfwaye uvahiwe ila.

⁸ Zela pandini wa adiye na amakwele, inafwanela kawendege eno ohotelene owu ohoteliwene nnga miyo.

⁹ Mbwenye mutu aviona ira miyo jofuna jaga jihiindjiva, inafwanela atele owu hehi ateliwe. Mwasiwa yapama ku tela owu teliwa hiyaniha no wenda na iluveluve yongonana nfwaye.

¹⁰ Zela nyo muli otelanene na wanle, nnafuna durumeni eni. Eto unaurumani kahi miyo. Unaurumani gu Nabwiya. Kakalevo muhiyana unafuna muhiya mamunaye.

¹¹ Mbwenye muhiyana amuhiya mamunaye, inafwanela awendeve ohoteliwene owu hehi, awele aze awandane na mamunaye akoka. Eto pandi ya mulombwana, kakalevo mulombwana ofuna mwalana na muhiyanaye.

¹² Eto zela amohiwa, miyo nnafuna diwonge, unawonga gu miyo hiya Nabwiya, ira mbalihu akana muhiyanaye ohomuroromela Yesu, arumela wenda na liye, inafwanela mulombwana ahamulanye.

¹³ Eto murongolihu akana mamunaye ohomuroromela Yesu, arumela wenda na liye, inafwanela muhiyanole ahamuhiye mamunaye.

¹⁴ Tchoira mulombwana ohomuroromela Yesu unotchenihiwa muwari mowenda na muhiyanaye omuroromela Yesu. Eto muhiyana ohomuroromela Yesu unotchenihiwa muwari mowenda na mamunaye omuroromela Yesu. Eto kamwalana, ahimiwa anotakala mbwenye kakala vamohi, anokala otchena.

¹⁵ Mbwenye mutu ohomuroromela Yesu afuna jomwalana, airena mofuna mwaye. Jaireya eno, mulombwana omuroromela Yesu nari muhiyana omuroromela Yesu ahala, umala kutchiwa. Tchoira Mulugu uniitanne ira hiyo niwendege na murendele.

¹⁶ We muhiyana omuroromela Yesu, unaiziwa avi akala mamunawo unoza amuroromele Yesu muwari mwa weyo? Kunonne. Eto weyo mulombwana omuroromela Yesu, unaiziwa avi akala muhiyanawo unoza amuroromele Yesu muwari mwa weyo? Kunonne. Malambo a mundulrimu ilambo yakala atu wewule, kohokalawo azari. Mutu akana mangawa, muwari mohokana kobiri yopagalri, liye odowa merkado, viguliha kala muzari. Mutu afuna ira: <<Nnafuna dimukayena muzari>>, odowa merkado, liye afwanya atu kavigulihaga. Liye musakulra wenno anfuna liye, liye mugula, mudowana vande vaye. Amudowana vande vale, muzari ule ahinda mabasa afuna muruma mbwiyaye ule. Liye katambilra yengo. So erave laba, vahiwaga udja na jowara na vogona bahi. Muzari ule akalave na mbwiyaye ule fiyeda awande pagalri mangawa anna liye. Tchoira mutu apata kobiri yenno yaguliwena liye, owanda viwombola muuzarini mwaye. Pawulo awendaga aalaleyaga atu ohiyana-hiyana, amohiwa kavulusiwaga, kafwanyeya kagali azari, atu okana ambwiyiwa a mwilamboni ya vati. Nona Pawulo ohokana mazu afuna liye wonga muwari moakokomeza atwale.

Inafwanela kada mutu awendegena makalelo Mulugu unvahile liye Zela azari wanle

¹⁷ Nlamulo nnawonga miyo muwari mwa makuru matene a atu omuroromela Yesu ti ni. Zela jotela ji, zela joineliwa, inafwanela kada mutu aimele na makalelo anno Nabwiya anvahile liye eto aimele nnga vali liye Mulugu amuitanaga ira amuroromele Yesu.

¹⁸ Akala ukala mutu umanle ineliwa, amala Mulugu amuitana ira amuroromele Yesu, kazuzume ira atu kahaiziwe ira uhumala ineliwa, nari. Akala ukala mmohiwa ali ahanaineliwe, amala Mulugu amuitana ira amuroromele Yesu, kazuzumele ira aineliwe.

¹⁹ Tchoira ineliwa kunna mabasa. Masiki eto haineliwa kunna mabasa. Inna mabasa ku irana malamulo a Mulugu.

²⁰ Inafwanela kada mutu aimele na makalelo nnga Mulugu anfwannyena liye ora imuitanne liye ira aze amuroromele Yesu.

²¹ Akala uitaniwe wagali muzari, kusimbwe kukumuwa, ukaleve eno. Mbwenye wawanda viwombola muuzarini mule, ili yapama uviwombole.

²² Tchoira wenno uitaniwe na Nabwiya agali muzari, umala kutchiwa. Sawasawa eto ule uitaniwe agali vande vaye, ahali muzari, gu muzari wa Kiristu.

²³ Tchoira nyo muhuguliwa na peresu yokwima. Nona kamukalegeve azari a atu amohiwene a ilambo ya vati.

²⁴ Nona abalaga, inafwanela mutu aimele vevo Mulugu vanfwannye liye, awendegeve eto na Mulugu.

Jokokomeza para adiye

²⁵ Va nnafuna duwakuleni zela nkani wa adiye. Zela nkani wa adiye, miyo kadinna nlamulo nawongile Nabwiya. So nnga dili mutu ororomeleya muwari mwa tangaranga da Mulugu, moonelramo mwaga nnafuna diwonge eni.

²⁶ Dera diumbuwelemo, nnaonamo ira na mwasa wa makatamiho a malambwala, inafwanela kada mutu aimele evale vaimenle liye.

²⁷ Akala ukana muhiyanawo, kusake jomulanya. Akala kunna muhiyanawo, kumusake muhiyana.

²⁸ Masiki eno, ule unafuna mutela muhiyanaye, amutela, kategile. Eto muhiyana unafuna teliwa, ateliwa kategile. Eto fwanyeya ira makatamiho anakana aliba tela mwilamboni ya vati muno kahi mang'ono. Nnawongela eno ira durambeliheni makatamiho anno.

²⁹ Miyo abalaga, inafuna miyo duwelruzeni tchi ila. Tempu ibanlre Mulugu imala gwadeya gwadeya. Nona roma peno dowa sogolro, ule utenle, kabalre ira: <<Miyo dihitela.>>

³⁰ Mutu unatomola kuto, kabalre muselu unanlela liye. Mutu uli ohagalalene, kabalre hagalala waye. Ule unagula yaye, kabalre ira: <<Peno dihigula yengo.>>

³¹ Ule unahinda mabasaye a ilambo ya vati, aiziwe ira: <<Ilukuluwa kahi mabasa anahinda miyo ala.>> Tchoira jatene ja ilambo ya vati jiliwo tchineneva jinadowa mamalelo.

³² Miyo nnafuna dukokomezeni nyo ira mwahakukumuwe zela ja ilambo ya vati. Tchoira mulombwana wenno uli mudiye unowanda zuzumela ja Nabwiya, aumbuwelaga makalelo bavi ofwanela ira Nabwiya aziveliwege joira jaye.

³³ Mbwenye utenle unakukumuwela ja ilambo ya vati. Unokana youmbuwela ira: <<Dire avi ira dimuzivelihe muhiyanaga?>>

³⁴ Unofuna ja wu na ja wu. Sawasawa muhiyana uli mudiye unakukumuwela ja Nabwiya bahi. Unowanda umbuwela makalelo otchena bavi anafuna liye wenda na mmirimani mwaye na maningo anna liye. Mbwenye ule uteliwe unakukumuwela ja ilambo ya vati. Unokana youmbuwela ira: <<Dire avi ira dimuzivelihe mamunaga?>>

³⁵ Miyo jatene ejo kannautongani ira mwahatele. So miyo nnawonga ira mukale pama ira mukayena makalelo ofwanela ira kada mutu alabe jofuna ja Nabwiya kwaranya jengo jatene.

³⁶ Zela mutu wenno umbanyenlre mwendaye, anfunave pama, aona ira: <<Miyo dihimala mbanyelra. Eni liye ukana idadi yoteliwa, ira dimuhiye wene kinakala>>, akala inofuneya amutele, inafwanela amutele nnga munafunela liye. Inafwanela katelane, tchoira telana kahi yotega.

³⁷ Mbwenye ule uli ngi ngi ngi mmirimani mwaye ahafunaga mutela, akala liye kanagondjihiwa na iluveluve yaye, akala liye umala sakulra mmirimani mwaye ira amuhiye, inafwanela ahamutele. Liye eto usakanya pama.

³⁸ Fwanyeya ira ule unamutela mwendaye, usakanya pama. Eto ule ahanamutela unosakanya pama kwaranya.

³⁹ Muhiyana uteliwe uli omangiwene na mamunaye wenno pakana siku nnafuna kwa mamunaye. Mbwenye mamunaye agakwile, liye unowanda teliwa na mulombwana wenno unanfuna liye. Malringana katelane muwari mwa Nabwiya.

⁴⁰ Mbwenye miyo dera diing'anemo, muhiyanole ahateliwe akoka, unokana hagalala ulukulu kwaranya hagalala wafuna liye kana ateliwa. Dawongaga eno, nnaona ira nnawonga muwari mokana Munemba wa Mulugu.