1 Korinto 6 - Mazu Otchena a Mulungu

Kinafwanela atu omuroromela Yesu sumelana vamentoni va atu ohomuroromela Yesu

¹ Nkani mmohiwa gu ula. Nyo mwakana makani muwari mwa nyo, munotamangelana unde ira mwatongiwe na atu kahali apama vamentoni va Mulugu hiya tongiwa na atu otchenihiwa.

² Kodi nyo kamuiziwile ira atu atene a ilambo ya vati, unafuna za atonga gu hiyo atu otchenihiwa? Akala hiyo nnoza naatonge atu atene a ilambo ya vati, inawandeya avi imwanana wonga makani mang'onong'onove?

³ Kamuiziwile ira hiyo nnoza naatonge angelro? Akala nnoza naatonge angelro, kinafwanela rutchiwa tonga ja ilambo ya vati vano.

⁴ Mwaona ira muwari mwa nyo muhukana makani, mwasiwa gwa nni nyo dowagana wa atu ohokana pandi na nikuru na atu omuroromela Yesu?

⁵ Jatene eji nnalrembela ira munyaswe. Kodi muwari mwa nyo atene abali omuroromela Yesu, kamunamuona mutu mmohi wa toto ofuna tonga makani anafwanyeyana nyo muibalinive?

⁶ Nyo munawanda avi dowagana makani munna nyo na mbalinyu omuroromela Yesu ira mwatongiwe vamentoni va ale kahanamuroromela Yesu?

⁷ Akala munasumelana mmohi na mbalaye, eni murumelege ira: <<Nihimala gondjihiwa.>> Tchoira yapama ku ireliwa yabure, ku djelriwa hiyanihana we dowa musumela.

⁸ Eto mofutukula nyenne gunaairela ibure eto gunaadjelra masiki abalinyu.

⁹ Kamuiziwile ira atu abure kiza kakana pandi na Umwene wa Mulugu? Kamunyengiwe, mwasiwa romana mutu wenno unararuwa, nari unahara vikwamutu josema, ule unangoniha mwadi nfwaye, ule unavenda jomugoniha mulombwana nfwaye,

¹⁰ mbava, nari mutu ofuna kana jorayela pwi, nari unalrezelretcha, unaaruwana afwaye, unaadjelra afwaye, atene anno kiza kakana pandi na Umwene wa Mulugu.

¹¹ Malambo a mundulrimu kohokalamo muwari mwa nyo keretchana ejo. Mbwenye muhumala huwiwa, muhumala tchenihiwa, muhumala kalihiwa apama muwari mwa nzina na Nabwiya Yesu Kiristu eto muwari mwa Munemba wa Mulugu wehu.

Inafwanela atu omuroromela Yesu kaviing'anele pama ira kahagwe na yotega yoraruwa

¹² Atu anowongetcha ira: <<Jengo jatene jinorumelihiwa ira mutu airegena.>> Miyo mbwenye nnouwandelani ira kahi ira jatene jinomulabela mutu yengo. Eto anowongetcha ira: <<Jengo jatene jinorumelihiwa ira mutu airegena.>> Miyo mbwenye kannarumela irana yengo inafuna dikaliha muzari.

¹³ Atu anowongetcha ira: <<Mulugu upandutcha jodja ira mutu adja, jidowe jakale munifuni. Eto Mulugu upandutcha nifu ira nitambilre udja unadja hiyo.>> Miyo mbwenye nnouwandelani ira Mulugu vasogolro unoza atukule nifu na udja univahile liye, atolotche. Vamohive vevo Mulugu osakanya maningo. Mbwenye Mulugu kasakannye maningo ira niraruwegena, nari. Mulugu asakanyele maningo ira liye awande kala muwari mwa maningo ehu ala. Nabwiya eka gunawanda sogolrelra maningo.

¹⁴ Eto sawasawa nnga Mulugu ohomuvenyiha Nabwiya Yesu mokwani, unoza eto avenyihe maningo ehu ala mokwani mwa kopolo daye.

¹⁵ Kodi nyo kamuiziwile ira maningo enyu ti jano ja Kiristu? Kodi vinowandeya ira miyo ditukule jano ja Kiristu, didowe dagumanihe na jano ja puta? Kavali wandeya!

¹⁶ Kodi nyo kamuiziwile ira ule unadowa gumana na puta, uli maningo mamohive na liye? Kalaga nnga ilrembiwe mMazuni ira: <<Ambinlene anokala maningo mamohive.>>

¹⁷ Mbwenye ule ugumanne na Nabwiya, mutu wenno gunna murima mmohive na Nabwiya.

¹⁸ Inafwanela mutawe raruwa. Tchoira yotega ili yatene yahali raruwa ili unde wa maningo. Mbwenye mutu wenno unararuwa, unatakaliha maningo anna liye.

¹⁹ Kodi nyo kamuiziwile ira maningo anna nyo ayo tchi nyumba munakala Munemba Otchena wenno Mulugu uuvahileni liye? Nyo kamuli annya a vingumi denyu

²⁰ tchoira ukala ukumihile yengo ira auguleni. Nona inafwanela maningo anna nyo mmutitimihegena Mulugu.