1 Korinto 5 - Mazu Otchena a Mulungu

Pawulo ohakokomeza aKorinto ira kamutonge maliba raruwa afwanyeya muwari mwewa

¹ Ihimala vweya ira muwari mwa nyo muhukala mararuwelo abure kwaranya, anno masiki atu ohombalra Mulugu anakonda atu. Muwari mwa nyo uhukalamo eto mutu mmohi unangonana mwadi babaye.

² Mbwenye nyo muire garati bahi, vitetelaga zela jinera liye jo. Afwanele munle na mwasa wa joira jaye. Mwamala nla, mmutamangihe mutu wenno unaira ejo ira ahafwanyeye na nyo.

³ Uli miyo uno dihiiziwa ira ulapela na wewo uli nyo wo. Mbwenye masiki ulapenleve, mmirimani mwaga dili vamohi na nyo. Muwari mokala vamohi na nyo, makalelo erile mutuyo, miyo dihimala mutonga wewuno.

⁴ Miyo nnourumani ira siku nnafuna nyo gumana mwa nzina na Yesu Kiristu, mmutonge mutuyo muwari mwa utongi wa Nabwiya wehu Yesu. Mwamutongaga mutuyo, miyo dili vevo zela mmirimani mwaga.

⁵ Mutonga uwa, munvahede mmandani mwa Satana ira maningo a mutuyo kabwanyuliwe. Ili ira siku nnafuna za Nabwiya, munembaye awande vulusiwa.

⁶ Makalelo anavitetela nyo kili pama. Kodi nyo kamuiziwile ira leverina wa vang'onove amwadeya, masa matene anomala nyakuwa?

⁷ Mukumihemo leverina wa wanle unafwanyeya muwari mwa nyo ira mwahala mukale nnga masa maxa ohoheliwa leverina nnga muli nyo vamentoni va Mulugu. Mwasiwa Kiristu mwana Nibila nehu na Pwando ya Mavirelo umala sakanyiwa mukuto.

⁸ Nona nadjaga Pwando ya Mavirelo yehu, kanidjege na pawu dokana leverina wa wanle. Leverina unawonga miyo ba makalelo oidana na ubure. Inafwanela nadjaga Pwando ya Mavirelo yehu, nidje na pawu dohokana leverina. Pawu dohokana leverina nnawongiwa di ku wonga irana jofuna ja Mulugu na mmirimani mwehu mwatene no wonga ibaribari.

Ule unairana jabure komove atongiwe

⁹ Miyo malambo a mundulri dohoulrembelani karta, miyo ukokomezani ira: <<Nyo kamuwendege vamohi na atu oraruwa.>>

¹⁰ Diwongaga eno, kadawonga aliba raruwa a unde, nari. Eto nne kadawonga ira mwahawende na atu abure a unde, aliba raruwa, aliba funa kana jorayela pwi, aliba adjelra afwiwa, aliba hara vikwamutu josema, nari. Tchoira dahafunege ira mwahawendege vamohi na atu a mwilamboni, yerege funeya mukumemo mwilamboni ya vati mwasiwa anno anafwanyeya mwatene mwene.

¹¹ Mbwenye va nnoulrembelani mazu ira dukokomezeni ira mwamuona mutu unaitaniwa na nzina na mbalihu omuroromela Yesu eragana makalelo oraruwa, nari maliba funa kana jorayela pwi, nari ohara vikwamutu josema, nari oaruwana afwaye, nari olrezelra, nari oadjelra afwaye, mutu wenno kamukale vamohi na liye. Masiki dja, kamudjena vamohi.

¹² Miyo kadinnamo ira nnomutonga mutu uli unde. Mbwenye mutu wenno unafwanyeya muwari mwa nikuru na atu omuroromela Yesu, airana yabure, inafwanela mukale okozeyene ira mmutonge.

¹³ Unafuna atonga atu a unde gu Mulugu. Mbwenye zela nyo, mutu wabure inafwanela mmukumihemo ira ahafwanyeye muwari mwa nyo.