1 Korinto 3 - Mazu Otchena a Mulungu

Kinafwanela atu omuroromela Yesu tetelana oka oka

¹ Miyo abalaga malambo a mundulrimu kadawandile ufundjihani nnga mutu aafundjihaga afwaye osogolrelriwa na Munemba Otchena. Daufundjihani nnga mwali atu ofuna sogolrelriwa na jofuna ja maningo. Mwagalive muwari mwa Kiristu, daufundjihani nnga mwali ahima a mmandani.

² Dauvahani nipala ira musure mwasiwa kamwawanda dja tchima. Eto evale na vano, kamunawandeve.

³ Mwasiwa mulive atu osogolrelriwa na jofuna ja maningo. Tchoira na vanove muwari mwa nyo, munofwanyeya kalelana nrima no haraharana. Mwairaga eno muiziwe ira munasogolrelriwave na jofuna ja maningo eto munawendave na makalelo a atu a mwilamboni.

⁴ Tchoira muwari mwa nyo, mutu mmohi uni: <<Miyo dili wa Pawulo.>> Nfwaye uni: <<Miyo dili wa Apolo.>> Na joira ejo jinera nyo jo, kodi kamunawanda iziwa ira munahara mawendelo a atu a mwilamboni?

⁵ Miyo Pawulo dili ani? Nnga Apolo bani? Hiyo atene nili anamalaba bahi eto muwari mwa hiyo nyo muhufiyeda mwezo omuroromela Yesu. Kada mutu unalaba mabasa nnga mwemo mwavahediwe liye na Nabwiya.

^6-7 Miyo dohozala, Apolo liye za regari. Mbwenye roma maliba zala, na maliba regari, hiyo atene kanili yengo. Uli yengo gu mutu unaulukuliha yengo izanle hiyo ile wenno unafwanyeya agali Mulugu.

⁸ Ule unazala na ule unaregari anailaba yengo imohive. Kada namalaba unadediha tambilra zela mabasa alabile liye.

⁹ Tchoira nyo muli nnga munda wa Mulugu. Hiyo eto nnalaba mmindani mwemo vamohi na Mulugu. Nyo eto muli nnga nyumba ya Mulugu. Hiyo nnamanga vamohi na Mulugu.

Anamalaba a Mulugu anoza katambilre zela mabasa analaba atu

^10-11 Mwa sayi Mulugu udivahile liye, miyo dili nnga mesilri oiziwa manga pama. Dihiroma manga aliserisi. Ukala mutu mmohiwa unamanga vazulu va aliserisi. Aliserisi unawongiwa gu Yesu. Kalivo unafuna za manga vazulu va aliserisi ahali aliserisi wa Yesu Kiristu. Nona, inafwanela kada mutu unamanga, aing'ane pama mamangelo anamanga liye.

¹² Mutu amangaga vazulu va aliserisi, unamanga na oru, parata, mabwe ofuneyetchetcha, owu hehi jimiri, malatchi, na mpinda.

¹³ Mabasa alabile kada mutu anoza kavuhuleye tchoira nikalawo siku nnafuna za ira mabasa matene kavituliwe. Mabasa a kada mutu anoza kaoniwe muwari mwa munlo. Tchoira munlole aza, jatene jene jinoxixiwa mmunloni emule.

¹⁴ Munlo avira, ja makata jagajile, ja ibaribari jagahanle, panafuna kada mutu kana yotambilra yaye zela jinafuna halavo vazulu va aliserisi.

¹⁵ Mbwenye ule ahanakanavo yengo inafuna hala munlo agavirile unokala nnga mutu atawaga munlo. Vulusiwave, unovulusiwa, so kanakanavo yengo mwasiwa jaye jihimala ja.

Nyumba ya Mulugu ya tempu ili hiyo ila ba atu omuroromela Yesu

¹⁶ Kodi kamuiziwile ira nyo muli Nyumba ya Mulugu? Eto kodi kamunawanda iziwa ira Munemba wa Mulugu unakala muwari mwa nyo?

¹⁷ Mutu wenno unafuna atolotche Nyumba ya Mulugu, mutu wenno Mulugu unomutolotcha. Tchoira Nyumba ya Mulugu tchotchena. Nyumba inawongiwa gu nyenne.

Kakalevo unavitetela

¹⁸ Kakalevo unafuna vinyenga. Inafwanela ira ule unaviona ira: <<Miyo dihikana zelru da tempu ili hiyo ila>>, asanduwe, akale zimora ira awande kana zelru da Mulugu.

¹⁹ Tchoira Mulugu aona zelru da ilambo ya vati, unaona nnga uzimora. Kalaga nnga ilrembiwe mMazuni ira: <<Mutu wenno unaviona nnga: <Miyo dili mutu wa zelru>, Mulugu unomugwihana mulandu na zelru daye dohokala pama dedo.>>

²⁰ Inakala eto nnga ilrembiwe mMazuni ira: <<Nabwiya umala iziwa joumbuwela ja atu a zelru eto umala iziwa ira zelru dewa kadinna mabasa.>>

²¹ Nona kakalevo unafuna vititimiha zela mutu unamuhara liye ira: <<Miyo dili wa Udje.>> Tchoira jatene jiliwo ti jenyu.

²² Mabasa analaba miyo Pawulo, mabasa analaba Apolo, mabasa analaba Peduru, masiki jatene jili mwilamboni ya vati, kalawo nari ukwa, jinaireya tempu ili hiyo ila nari jinafuna za ireya sogolro, Mulugu unotukula jatene ejo ira muwari mwa ejo nyo muone upama wenyu.

²³ Nyo eto muli atu a Kiristu. Kiristu eto gu mutu wa Mulugu.