1 Korinto 2 - Mazu Otchena a Mulungu

Zelru na makalelo alaleyana Pawulo

¹ Miyo abalaga, dizaga laleya muselu wa Mulugu wa nyo, kadazile laleya mazu na makalelo a uyesa owu zelru da ilambo ya vati.

² Tchoira tempu dawenda miyo na nyo, kadifunne wonga yengo ili yatene ahali muselu wa Yesu Kiristu na ukwa waye vamuradini bahi.

³ Miyo eto dulaleyagani, dazile movuta, moova eto mongurumela.

⁴ Yowonga yaga, muselu dalaleya miyo, kadalaleya mazu ouzivelihani okumela zelru da atu a mwilamboni. Mbwenye dalaba muwari mwa kopolo da Munemba Otchena.

⁵ Jatene ejo dairana ira nroromelo nenyu nikumele mwa kopolo da Mulugu hiyaniha no kumela mwa zelru na uyesa wa hiyo atu.

⁶ Mbwenye hiyo nnaawandela zelru atu olimba muwari mwa nroromelo ira zelru diwa didowege sogolro. Mbwenye zelru nnaawandela hiyo kahi zelru nnga dedo dinna atu na andimuwa a tempu ili hiyo ila anno anadediha tolotchiwa bahi.

⁷ Hiyo mbwenye zelru nnawonga hiyo, nnaawandela zelru da Mulugu dokoyeya, dohooneya na atu, dedo Mulugu aumbuwenle liye romelave wanle ahanapandutche zulu na ilambo ya vati ira hiyo niwande ona upama waye wohomala.

⁸ Zelru dedo mbwenye andimuwa a tempu ili hiyo ila tchawandile onelramo. Tchoira ahakanlege nnga kaonelramo, tchamukomela vamuradini Nabwiya wenno unafwanyeyana undimuwa.

⁹ Mbwenye inakala nnga ilrembiwe mMazuni ira: <<Jengo jejo jili jahanababihe oniwa, nne jejo jili atu kahanababihe vwa eto jengo jejo jili jahanababihe umbuweliwa mmirimani mwa mutu uli watene, ti jejo jisakanyile Mulugu ira aavahe atu anne anamuziveliwa.>>

¹⁰ Mbwenye Mulugu uhuwanda nionelrihedamo hiyo eji muwari mwa Munemba Otchena, mwasiwa Munemba Otchena uhuiziwa jatene masiki jengo jejo jinafwanyeya jagali jokoyeya ja Mulugu.

¹¹ Tchoira kalivo mutu unaiziwa joumbuwela ja mutu nfwaye. So mutu eka, muzimu unna liye gunawanda iziwa joumbuwela ja mbwiyaye. Sawasawa na Mulugwene, kalivo unawanda iziwa ja Mulugu ahali Munemba wa Mulugu.

¹² Hiyo mbwenye kanitambilrile munemba wa ilambo ya vati mbwenye nimutambilrile Munemba okumela wa Mulugu ira niwande onelramo ejo Mulugu jinanivaha liye vasayi.

Onelramo wa atu a mwilamboni kunavahana no onelramo wa atu omuroromela Yesu

¹³ Hiyo kannalaleya ja Mulugu muwari mwa zelru da hiyo atu mbwenye nnalaleya ja Mulugu muwari mofundjihiwa na Munemba Otchena. Hiyo nnaatapulela ibaribari zela Mulugu atu anne anna Munemba Otchena.

¹⁴ Fwanyeya ira mutu ubaliwe fendo imohi bahi kanawanda vwa jengo jokumela wa Munemba wa Mulugu, tchoira avwa, unaesa nnga uzimora. Kanawanda onelramo, mwasiwa ja Munemba jinaonelreyamo muwari mwa Munemba.

¹⁵ Mbwenye mutu wenno unawenda na Munemba Otchena unowanda pima jatene, liye onelramo ibaribariwa. Eto kalivo unawanda mpima liye.

¹⁶ Kalaga nnga ilrembiwe mMazuni ira: <<Kodi mutu guvi unawanda iziwa joumbuwela ja Nabwiya? Bani unawanda mufundjiha?>> Mbwenye hiyo atu omuroromela Yesu nihikana joumbuwela ja Kiristu.