1 Korinto 15 - Mazu Otchena a Mulungu

Pawulo unaawumbutcheda afwaye zela Muselu Wapama

¹ Va abalaga, nnafuna duwumbutchedeni Muselu Wapama dulaleyileni miyo. Dagaulaleyileni, muhuwatchela muselu ule eto pakana peno mulive oimelene na muselu mmohive.

² Eto munavulusiwa muwari mwa muselu wenno. Malringana mwahahiye mazu anno dulaleyileni miyo. Tchoira mwahiya mazu daulaleyileni miyo, ku wonga mmuroromenle Yesu vasayi vene.

³ Miyo nnafuna duwandeleni akoka mazu amohive nnga mwawandeliwe miyo. Yengo ilukulu ya ibaribari iwandeliwe miyo tchoira Kiristu ohokwela jotega jehu nnga mwemo mwalrembele atu mMazuni.

⁴ Yesu agakwile, ohokoyiwa. Agakoyiwe, vagamanle malambo mararu, ohovenya mokwani nnga mwemo mwalrembele atu mMazuni.

⁵ Agavennye mokwani ohomukumelela mulombwana Peduru. Akumaga evo, ohakumelela anamamuharaye kumi na ambinli.

⁶ Nokuma evo, siku nimohi liye ohakumelela abalihu omuroromela Yesu kwaranya atu 500, fendo imohive. Mwa atu anno, oindjiva na vanove kohokalawo. Amohiwa vari na vari kohogona gona wa ukwa.

⁷ Yesu agamanle akumelela abalihu oindjiva, ohomukumelela mulombwana Tiyagu. Nomala evo ohakumelela anamarumiwa atene.

⁸ Mutu ogomiheda kumeleliwa eto ogomiheda muona Yesu gu miyo. Yesu adikumelenle nnga mwana obaliwa tempuwa yagakwaranyile.

⁹ Tchoira muwari mwa anamarumiwa atene, miyo dili ogomiheda eto kadili ofwanela itaniwa namarumiwa wa Yesu, mwasiwa miyo doaharaharetcha atu omuroromela Yesu, anno anafwanyeya kagali nikuru na Mulugu.

¹⁰ Miyo malambwala makalelo anna miyo kazenle muwari mwa sayi da Mulugu. Sayi diwa udivahile Mulugu kadivahiwe vasayi vene mbwenye dihilabana mabasa akwaranya anamarumiwa afwaga atene. Dawongaga eno eto, kannawongela ira miyo mabasa anno dilabile na kopolo daga, mbwenye diwandile laba muwari mwa sayi da Mulugu bahi.

¹¹ Akala mulaleyiwe na miyo, akala mulaleyiwe na anamarumiwa afwaga, ilukuluwa tchoira hiyo nnalaleya eto nyo muhuroromela muselu ulaleyiwe nyo.

Atu omuroromela Yesu anoza kavenyihiwe mokwani

¹² Akala hiyo nnoulaleyani ira: <<Kiristu uvenya mokwani>>, nyo eto munawanda avi wonga ira: <<Mutu akwa, kanavenya mokwani.>>?

¹³ Tchoira akala atu kakwa kinavenya mokwani, era eno, Kiristu na liyene kavennye mokwani.

¹⁴ Akala Kiristu kavennye mokwani, hiyo nnalaleya vasayi eto nyo munamuroromela Kiristu vasayi.

¹⁵ Akala na ibaribari atu kakwile kinavenya, Kiristu na liyene kavennye eto hiyo anamarumiwa nihikana mulandu omunukeda Mulugu nilaleyaga niiraga: <<Mulugu unvenyiha Kiristu mokwani.>>

¹⁶ Tchoira akala atu kinavenya mokwani, Kiristu na liyene kavenyihiwe mokwani.

¹⁷ Vamohive vevo akala Kiristu kavenyihiwe mokwani, muroromela Kiristu wenyu kunna mabasa eto mulive na jotega jenyu.

¹⁸ Eto akala Kiristu kavenyihiwe mokwani, ale kakwile kamuroromelaga Kiristu, kohomala tolowa.

¹⁹ Akala hiyo nnamuroromela Kiristu ira anikamihede tempu ili hiyo ila bahi, akala sogolro kaninna yodediheda, mwa atu atene a ilambo ya vati, tangaranga para hiyo.

²⁰ Mbwenye Kiristu na ibaribari ohovenya mokwani. Venya waye watonyiheda ira ale anagona anoza kavenye.

²¹ Tchoira sawasawa nnga atu karomile kwa muwari mwa mabasa a mulombwana mmohi, atu anovenya mokwani muwari mwa mabasa a mulombwana mmohi.

²² Tchoira sawasawa nnga atu atene anafwanyeya munikuruni mwa Adawu anokwa, atene anafwanyeya munikuruni mwa Kiristu anoza kakayena ingumi.

²³ Zela venya mokwani, kahi ira atu atene anovenya fendo imohive, nari. Tchoira murandji venya ali Kiristu. Venya waye wanitonyiheda ndila inafuna atwaye hara Yesu aza azaga.

²⁴ Liye aza, aavenyihaga atwaye mokwani, ku wonga wewo ku makutulo. Tchoira Yesu agamanle gondjiha utongi watene nari umwene watene nari kopolo datene, tchi tempu inafuna liye tukula umwene waye, anvahede Mulugu.

²⁵ Tchoira inafuneya liye atongege fiyeda mwezo oanyingala amwidanaye atene.

²⁶ Mwidani ogomiheda unafuna liye mutolotcha ku ukwa.

²⁷ Tchoira Mazu anawonga ira: <<Mulugu uhela jatene vati va manyalo aye.>> Kawongaga keraga: <<jatene jiheliwe vati va manyalo aye>>, ihimala iziweya ira Kiristu unotonga jatene muhiya Mulugu wenno unvahile ira atongege.

²⁸ So Mulugu utukula jotonga jile, liye nvaheda mwanaye ira: <<Udowe watonge.>> Mwanaye agamanle tonga jatene, tchi tempu yenno inafuna liye za welela tongiwa na Mulugu wenno anvahile ira atonge jatene ira Mulugu akale mwinnya otonga jatene jinafwanyeya mwatene mwene.

²⁹ Muumbuwele vinera atu anne anabatiziwa vamalroni va ale kakwile kahanabatiziwe. Aliwa anafuna nni kairagana eno? Ahakale aliwa kaharumela ira mutu unovenya mokwani, tchafunege joira kabatiziwe vamalroni va atu kakwile wanle.

³⁰ Nnga mwasiwa gwa nni miyo rumelaga piwa ora ili yatene?

³¹ Miyo abalaga, akala nyo muhuiziwa ira dihikana hagalala zela nyo mwasiwa hiyo atene nili muUmweneni mwa Yesu Kiristu Nabwiya wehu, inafwanela eto muiziwe ira malambo matene dawendaga nnahala vang'ono ira dipiwe.

³² Dagali ilambo ya Efezo miyo dihiwana na vinyama da mukokolani. Kodi muwari mowana dafuna diganyalri ja ilambo ya vati? Akala mutu kanavenya mokwani, valepena nidjege, ning'wege, mwasiwa metchelo ihanle ku kwa bahi.

³³ Nyo kamunyengiwe. Wandana wabure unononga mawendelo apama.

³⁴ Murome umbuwela japama jinafwanela para nyo. Eto muhiye makalelo otega munna nyo. Tchoira miyo nnoona ira muwari mwa nyo, kohokalamo atu ohomuiziwa Mulugu. Dawongaga eno, ba manyazo para nyo.

Atu omuroromela Yesu anoza kakayena maningo maxa

³⁵ Na vanove kohokalawo atu anawanganyeda ira: <<Nnga atu kakwile anafuna kavenye avi? Anafuna kavenye na maningo bavi?>>

³⁶ Unawonga eno gu zimora. Mwasiwa mutu azala mbewu, yahavunde, we podi vuhula, unofwanyave mbewu ile yahanamele. Mbwenye yavunda, inomela.

³⁷ Eto inazala we kahi mutati unafuna zavo. So unazala kongolo, kaya tirigu, kaya tchi nni,

³⁸ mbwenye Mulugu ukana maningo asakunlre liye ira kada mbewu yamela, ikayena maningo anno. Kada mbewu ikana maningo Mulugu asakunlre liye ira yamela, ikayena.

³⁹ Tchoira kahi ira jatene ja ingumi jinna maningo mamohive. Atu kanna maningo ewene, anavinyama kanna maningo ewene, mbalrame dinna maningo ewene eto somba dinna maningo ewene.

⁴⁰ Kohokalawo maningo okalana ilambo ya zulu, kohokalawo maningo okalana mwilamboni ya vati. Eto undimuwa unna maningo okalana ilambo ya zulu unohiyana na undimuwa unna maningo okalana mwilamboni ya vati.

⁴¹ Undimuwa unna nzuwa, kahi umohive unna mwedi. Eto undimuwa unna mwedi kahi umohive unna nyenyedi. Eto undimuwa unna kada nyenyedi unohiyana na undimuwa unna nyenyedi nfwaye.

⁴² Mavenyelo a atu kakwile anakala eno. Inafuna zaliwa ba maningo ovunda. Inafuna venya inokala yengo yohowanda vunda.

⁴³ Maningo anakoyiwa tchi yengo yohokana mabasa. Eto inafuna venyihiwa anakala maningo otitimihiwa. Maningo anakoyiwa tchi yengo yovuta. Eto inafuna venyihiwa inakala yengo ya kopolo.

⁴⁴ Maningo anakoyiwa ba maningo okalana ilambo ya vati. Eto inafuna venyihiwa ba maningo okalana ilambo ya zulu. Sawasawa nnga kohokalawo maningo a ilambo ya vati, kohokalawo eto maningo okalana ilambo ya zulu.

⁴⁵ MMazuni mulrembiwa ira: <<Adawu ali mutu aromile vuma ilambo ya vati, ali wenno aromile kana ingumi.>> Mbwenye zela ingumi ya ilambo ya zulu, ukala Adawu mmohiwa ogomiheda wenno unaavaha atu ingumi ya ilambo ya zulu.

⁴⁶ Mbwenye kavali mutu unakana maningo a ilambo ya zulu ahanakayena maningo a ilambo ya vati. Mutu unaroma kana maningo a ilambo ya vati, amala liye kana maningo a ilambo ya zulu.

⁴⁷ Mulombwana oroma wenno awombiwe na teya, gwa ilambo ya vati. Mbwenye mulombwana wanembinli ukumenle zulu.

⁴⁸ Atu a teya anakala nnga mulombwana wenno ukumile teyani. Atu a zulu anakala nnga mulombwana wenno ukumile zulu.

⁴⁹ Sawasawa nnga nihikana maningo olingana na maningo a mutu wenno ukumenle teyani, nnoza nikayena maningo olingana na maningo a mutu wenno ukumenle zulu.

Ukwa kunna mabasa zela atu omuroromela Yesu

⁵⁰ Abalaga nnafuna duwandeleni ibaribari. Maningo anna hiyo a nyama na sangiri bahi kinawanda volowa Umwene wa Mulugu. Kavali wandeya yengo yovunda ivolowe Umwene wa Mulugu ohowanda vunda.

⁵¹ Kavwani pama! Nnafuna duwandeleni yengo yokoyeya. Kahi hiyo atene muwari mwa Kiristu nnafuna gona gona wa ukwa, mbwenye hiyo atene nnoza nisandutchiwe.

⁵² Jatene ejo jinaireya palraza yogomiheda yaza inla, na tempu ya vang'ono nnga kwapira wa meso. Tchoira palraza inoza ivweye, ale kakwile muwari mwa Kiristu anoza kavenye ira kavahiwe maningo ohowanda kwa. Eto hiyo niliwo mwilamboni, nnosanduwa ira nikayena maningo a makalelo mamohive.

⁵³ Tchoira inafuneya ira maningwala ovunda katukule makalelo ohowanda vunda eto maningwala okwene katukule makalelo ohowanda kwa.

⁵⁴ Maningo ovunda okwa ala katukula makalelo ohowanda vunda, katukula makalelo ohowanda kwa tchi tempu yenno inafuna kwakwanela mazu oteya ukwa kalrembiwe mMazuni oira: <<We Ukwa, peno kunna mabasa, ingumi ihimala ugondjiha.

⁵⁵ We Ukwa, kodi gondjiha wawo uli waani? We Ukwa, kodi luma wawo ugomele vavi?>>

⁵⁶ Ukwa mbwenye unawanda muluma mutu wenne unafwanyeya na jotega. Tega ule kopolo daye nnazela muwari mwa malamulo.

⁵⁷ Mulugu mbwenye atamaleliwe mwasiwa uwanda muruma Nabwiya wehu Yesu Kiristu ira anivahe kopolo dowanda gondjiha ukwa.

⁵⁸ Nona nyo abalaga anauziveliwani miyo, mukale olimbene eto mukale oimelene pama. Inafwanela musimbwege irana mabasa a Nabwiya muwari moiziwa ira mabasa analaba hiyo muwari mwa Nabwiya kannalabela vasayi.