1 Korinto 14 - Mazu Otchena a Mulungu

Fiyiheda ja Mulugu kwa pama hiyana no wonga na viwongelo dohofundjiwa

¹ Muhare ndila yozivelana. Inafwanela eto mufunege jolemelela Mulugu unanivaha liye, makamaka yolemelela ira nyo muwande fiyiheda ja Mulugu.

² Tchoira fiyiheda ja Mulugu unohiyana no wonga na viwongelo mwasiwa ule unawonga na iwongelo kanawonga na atu mbwenye unawonga na Mulugu. Tchoira kalivo unaonelramo inawonga liye. Unawonga jengo jokoyeya mwa Munemba Otchena.

³ Mbwenye wenno unafiyiheda unawonga na atu na iwongelo yovweya ira aliba vwa kawande ulukula muwari mwa nroromelo newa eto kalimbihiwe eto kawande didilihiwa murima muwari mwa makatamiho.

⁴ Fwanyeya ira ule unawonga na iwongelo yahanavweya mwa afwaye unavilimbiha eka. Mbwenye ule unafiyiheda ja Mulugu unalimbiha nikuru na atu omuroromela Yesu.

⁵ Nnafuna ira nyo mwatene muwongege na viwongelo dohofundjiwa. Mbwenye pama pama nnafuna ira muwandege fiyiheda ja Mulugu. Maliba fiyiheda ja Mulugu umukwaranya maliba wonga na viwongelo. So para kala sawasawa, maliba wonga na viwongelo atapuleliwe ira nikuru na atu omuroromela Yesu niwande limbihiwa.

⁶ Miyo abalaga, daza wewo uli nyo wo, dawongaga na viwongelo dohofundjiwa, nyo mwahawandaga vwa, era eno, kodi dihilabavo yengo para nyo? Nari. So inafwanela miyo daza, diwongege yowonga yenno inawanda nyo onelramo. Dauwandelanimo jengo jiwandeliwe miyo na Mulugu owu dauonelrihanimo yengo owu dafiyiheda ja Mulugu owu daufundjihani yengo, dera eno, mbwenye dihilaba yengo para nyo.

⁷ Masiki jengo joimbana jinaimbetchana atu jejo jahanna ingumi, jinalaba na makalelo mamohive. Maliba muzika atukula bangwe nari siribo aimbaga, ahaimbe pama, kalivo unafuna vwa yengo.

⁸ Maliba aitana anyakondo ahaimbe pama palraza, kodi bani unafuna vikoza ira adowe awane?

⁹ Sawasawa na nyenne, mwawonga na iwongelo imohiwene, bani unafuna iziwa yawonga nyo? Yowonga yawo inavava na nipevo, dowaga.

¹⁰ Hiyo nihiiziwa ira ilambo ya vati ila, viwongelo jilimo kahi jing'ono. Kada iwongelo ikana inatapulela atu.

¹¹ Mbwenye miyo dangumanana mutu awongaga iwongelo yahanavwa miyo, voira iwongelo yenne kannavwa, damuing'anaga awongaga, nnamuona nnga mmarala. Eto liye unadiona nnga mmarala.

¹² Sawasawa na nyenne, voira nyo munafuna muone Munemba Otchena alabaga muwari mwa nyo, inafwanela mulimbele ira mukale atu olimbiha nikuru na atu omuroromela Yesu.

¹³ Nona, mutu wenno unawanda wonga yengo na iwongelo imohiwene, inafwanela anvepe Mulugu ira anvahe kopolo dowanda tapulela yengo inawonga liye ile.

¹⁴ Tchoira dalobela na iwongelo yahaiziwile miyo, inakala nnga nnalobela na mmirimani mwaga mwatene dahaiziwile inawonga miyo.

¹⁵ Nnga yapamiwa dire avi? Yali yapama dilobele na mmirimani mwaga mwatene eto diiziwaga inalobela miyo. Yali yapama daimbaga, diimbe na mmirimani mwaga mwatene, eto diiziwaga inaimba miyo.

¹⁶ Wahairena eno, waroma mutamalela Mulugu na mmirimani mwawo mwatene na iwongelo yahanawanda vwa nfwawo, wamala lobela, nnga nfwawo unawanda avi rumelela nlobelo nawo mowakula ira: <<Ame!>>, agali mazu awo omutamalela Mulugu kavwile?

¹⁷ Tchoira weyo unamutamalela Mulugu mwapama mbwenye nfwawo, voira kanavwa yengo, kanalimbihiwa.

¹⁸ Miyo nnomutamalela Mulugu mwasiwa liye udivaha wonga na viwongelo didjindji dohofundjiwa kwaranya makalelo anawanda nyo mwatene.

¹⁹ Masiki eno, miyo dagumana na nikuru na atu omuroromela Yesu afwaga, ili yapama diwonge mazu matanu oafundjiha afwaga atene kavwaga, digarati, hiyaniha no wonga mazu 10.000 na iwongelo yahanavwa atu.

²⁰ Abalaga, kamukayena joumbuwela ja ahima. So mukale nnga ahima a mmandani zela jengo jabure. Sawasawa nnga mwana wa mmandani kanaiziwa yengo tchivi yabure, na nyenne kamuiziwe yabure. Mbwenye zela joumbuwela jenyu, mukale olimba muwari mwa nroromelo.

²¹ Mazu kalrembiwe mMalamuloni, Nabwiya ohowonga zela aIzarayeli ira: <<Miyo nnafuna daatukule atu owonga viwongelo dohiyana-hiyana nari atu okumela vilambo dimohi diwa ira kaze kawande wonga na atwala. Masiki diirena eno, miyo dihiiziwa ira kinadivwa. Unawonga gu Nabwiya.>>

²² Ku wonga ira wonga na viwongelo dohofundjiwa kunaalaba atu omuroromela Yesu mbwenye tchi ionihedo zela atu kali kahanamuroromele Yesu. Fiyiheda ja Mulugu eto kunazela atu kali kahanamuroromele Yesu mbwenye unazela atu omuroromela Yesu.

²³ Nona nyo nikuru natene na atu omuroromela Yesu mwagumana, mwatene mwaroma wonga na viwongelo didjindji dahafundjile nyo, mutu ohoiziwa viwongelo dile owu hehi mutu uli ahanamuroromele Yesu aza, auvuruwanani madugudugu munaira nyo, liye unouwesani nnga muli anamihala.

²⁴ Mbwenye nyo mwatene mwafiyiheda ja Mulugu na iwongelo yovweya, mutu ohoiziwa iwongelo yenno owu hehi mutu uli ahanamuroromele Yesu aza, onovimanga mulandu eto unotongiwa mmirimani mwaye zela inawonga nyo mwatene.

²⁵ Unoona nnga munawonga yengo yenno ikoyile liye mmirimani mwaye. Evale liye unokokora, roma mutamalelaga Mulugu. Eto unowonga ira: <<Na ibaribari Mulugu uli muwari mwa nyo.>>

Zela gumana wa atu omuroromela Yesu

²⁶ Yapamiwa abalaga inafwanela niire avi? Nyo mwagumana, ukalavo mutu unaimba nyumbo yaye, ukalavo mutu unaafundjiha afwaye, ukalavo mutu unaawandela afwaye jengo jokoyeya, ukalavo mutu unawonga na iwongelo imohiwa, ukalavo mutu unatapulela jowonga ja maliba wonga na iwongelo imohiwa ile. Inafwanela kada mutu alabege ira afwaye kalimbihiwe.

²⁷ Akala ukalavo unna yofuna ira awonge na iwongelo imohiwene, so mukale ambinli owu araru. Eto kamuwonge atu ambinli tempu imohive. Arome wonga mutu mmohi. Liye agarati amala eno, avenye maliba tapulela ira atu kali evale kavwe.

²⁸ Mbwenye vahaoneye maliba tapulela, siku neno aliba viwongelo dimohi diwa kiwonge. Maliba wonga na iwongelo awonge na iwongelo yaye agali eka, so avwe Mulugu bahi.

²⁹ Zela pandi yofiyiheda ja Mulugu, kawonge anamafiyiheda ambinli nari araru. Eto inafwanela ale kali evale kapimege jowonga jiwa.

³⁰ Eto mutu mmohi awongaga jofiyiheda, Mulugu anvaha toto mutu mmohiwa uli ogaratene evale, inafwanela ule unawonga arome miyala ira nfwaye awonge.

³¹ Tchoira nyo mwatene munowanda fiyiheda ja Mulugu mmohi mmohi ira atwale ali evale kawande fundja yengo eto kawande limbihiwa.

³² Anamafiyiheda anowanda vahana, anowanda dedihana.

³³ Tchoira Mulugu kahi Mulugu wa madugudugu mbwenye gu Mulugu opwaseya. Molingana na jejo jinera makuru matene a atu otchenihiwa afwinyu,

³⁴ na nyenne mwagumana, inafwanela ahiyana kakale omiyalene. Tchoira kinarumelihiwa muhiyana awonge vamentoni va anamwindji. So muhiyana uli watene anvwelelege mulombwana nnga malamulo anawonga atu.

³⁵ So mbwenye muhiyana akana yofuka inafuna liye fundjavo, anfuke mamunaye kagadowile vande. Tchoira muhiyana awongaga vogumana nikuru na atu omuroromela Yesu tchi yengo inanyaswiha.

³⁶ Kodi Mazu a Mulugu kakumile mwa nyo? Kodi nyo muli atu amohive kavwile mazu a Mulugu?

³⁷ Inafwanela mutu wenno unaviona ira: <<Miyo dili namafiyiheda, dihiiziwa ja Munemba Otchena>>, aiziwe ira jinalremba miyo ji ba malamulo okumela wa Nabwiya.

³⁸ Mwamuona mutu alramwisaga jengo jinalremba miyo ji, mutu wenno na liyene alramwisiwe.

³⁹ Ilukuluwa nyo abalaga mwagarati, so inafwanela mufunege fiyiheda ja Mulugu. Eto kamwaakamelihege atu anne anafuna wonga na viwongelo didjindji dahafundjile atu.

⁴⁰ Mbwenye mwagumana, jatene jinalaba nyo, mulabege mwapama, mopwaseya.