1 Korinto 12 - Mazu Otchena a Mulungu

Jolemelela Mulugu unaavaha liye atu omuroromela Yesu ira kawande limbihana

¹ Zela jolemelela jinavaha Mulugu, miyo kannafuna ira nyo abalaga muwende mohoiziwa yengo tchivi.

² Nyo mumala iziwa ira malambo a mundulrimu mwali nyo atu ohombalra Mulugu, moholowa, nyo haraga makalelo madjindjene vikwamutu josema johowanda wonga yengo.

³ Nona nnafuna muiziwe ira mutu wenno unasogolrelriwa na Munemba wa Mulugu kanawanda wonga ira: <<Yesu atembelrelreye.>> Eto ahali mosogolrelriwa na Munemba Otchena, kalivo unawanda kana kopolo dowonga ira: <<Yesu gu Nabwiya.>>

⁴ Jolemelela Mulugu jinivahile liye jihiindjiva mbwenye mutu unasogolrelra jolemelela jatene gu mmohive Munemba Otchena.

⁵ Atu analaba mabasa ohiyana-hiyana kamulabaga Nabwiya mmohive.

⁶ Masiki eto jengo jinalaba atu jiindjive, unaavaha atu atene kopolo ira kawande irana jatene gu Mulugu mmohive.

⁷ Munemba Otchena unonvaha kada mutu yolemelela yaye ira muwari mowenda na yolemelela ivahiwe liye, mutule awande alimbihana afwaye.

⁸ Munemba Otchena unonvaha mutu mmohi ira awandege awelruza afwaye. Munemba Otchena mmohive wenno unanvaha mutu mmohiwa ira awandege wonga jengo joaiziwiha afwaye.

⁹ Munemba Otchena mmohive unonvaha mutu mmohiwa ira akayena nroromelo nlukulu. Munemba Otchena mmohive unonvaha mutu mmohiwa ira aavulumutchege arenda.

¹⁰ Mmohiwa unovahiwa ira airegena jengo jotikiniha. Mmohiwa unovahiwa ira awandege fiyiheda ja Mulugu. Mmohiwa unovahiwa ira awandege hiyanihavo ja Satana na ja Mulugu. Mmohiwa unovahiwa ira awandege wonga viwongelo dimohi diwa dahafundjile liye. Mmohiwa unovahiwa ira aatapulelege afwaye viwongelo dohofundjiwa nnawonga atu.

¹¹ Mbwenye masiki mabasa analaba atu kaindjive, atu atene anowanda hinda mabasiwa muwari mwa kopolo da Munemba Otchena mmohive. Munemba Otchena mofuna mwaye gunanvaha kada mutu yolemelela yaye.

Atu omuroromela Yesu atene ti jano ja maningo mamohive

¹² Tchoira sawasawa nnga maningo mamohive anokana jano jidjindji jene eto masiki jano jiindjivileve, maninguwa ba mamohive. Sawasawa hiyo atu omuroromela Yesu nili maningo mamohive a Kiristu.

¹³ Tchoira hiyo nibatiziwaga, batiziwa wehu watonyiheda ira Munemba Otchena unigumaniha hiyo atene ira nikale maningo mamohive. Masiki aJudewu nari aGerego, masiki azari nari ahali azari, atene nili maningo mamohive. Hiyo atene eto nivahiwa ira ning'we Munemba Otchena mmohive.

¹⁴ Tchoira maningo kahi ira inakala yengo imohi, mbwenye tchi yengo inagumanihiwa jano jidjindji.

¹⁵ Masiki nnyalo niwonge ira: <<Voira miyo kadili ndanda, kadinna pandi na maningo>>, liye uli mmaningoni emule, kakumilemo.

¹⁶ Eto masiki nibaru niwonge ira: <<Voira miyo kadili niso, kadinna pandi na maningo>>, liye uli mmaningoni emule, kakumilemo.

¹⁷ Maningo matene kahakale niso, atu kafuna kavwege avi? Maningo matene kahakale nibaru, puno yahakalawo, maningo kafuna kaonege avi jonuka nari jonukela pama?

¹⁸ Mulugu mbwenye uwanda gumaniha jano jatene ja maningo, liye tandaga kada yano na makalelo asakunlre liye.

¹⁹ Mulugu ahapandutche yano imohive, maningo tchakalawo.

²⁰ Mulugu mbwenye ohopandutcha jano jidjindji ira jigumanele mokala maningo mamohive.

²¹ Ninto kannawanda wonga na ndanda ira: <<Moya we kunna mabasa para miyo.>> Eto nne muru kaza awonga na manyalo ira: <<Nyo kamunna mabasa para miyo.>>

²² Mofutukula jano jejo jinaoneya nnga jovuta jihikana mabasa a ibaribari analaba atu.

²³ Jihikalawo eto jano jahanafuna oniwa na atu. Jano ejo nnoriheda pama muwari mokunela na jowara.

²⁴ Jano jimohi eto jinowanda oniwa na atu. Jano ejo hiyo kannakoya. Mbwenye Mulugu muwari mosakanya maningo, ohosakanya ira yano yenno yafuna lramwisiwa irihediwe

²⁵ ira kada yano yahawandege kana gaweya na yano nfwaye mbwenye kada yano iwandege ikukumuwela yano nfwaye.

²⁶ Yano imohi yasegedeya, jano jatene jinosegedeya vamohi. Yano imohi yateteliwa, jano jatene jinohagalala vamohi.

²⁷ Nyo munafwanyeya mwagali maningo a Kiristu. Kada mutu unafwanyeya agali yano muwari mwa maningo mamohive.

²⁸ Ha jano jiwa, Mulugu muwari mwa nikuru na atu omuroromela Yesu, voroma uharuma anamarumiwa. Vowelela uharuma anamafiyiheda. Vowelela uharuma anamafundjiha. Nomala eno, liye uharuma aliba irana jotikiniha, aliba avulumutcha arenda, aliba akamiheda afwiwa, aliba sogolrelra jengo, aliba wonga na viwongelo dohofundjiwa.

²⁹ Kodi hiyo atenene nili anamarumiwa? Kodi atenene nili anamafiyiheda? Kodi atenene nili anamafundjiha? Kodi atenene nili oirana jotikiniha?

³⁰ Kodi atenene nnowanda avulumutcha arenda? Kodi atenene nnowonga na viwongelo dohofundjiwa? Kodi atenene nnowanda atapulela aliba wonga na viwongelo dohofundjiwa nnawonga atu?

³¹ Nyo mbwenye inafwanela mufunege jolemelela jilukulu. Miyo eto nnafuna duwandeleni makalelo apama kwaranya.