1 Korinto 11 - Mazu Otchena a Mulungu

¹ So nnafuna mudisazihege miyo, nnga nnamusaziha miyo Kiristu. Mwilamboni mwa Korinto wanle mohokala iwendelo yalimo. Muhiyana ainga mpalra, awendaga aoneya ira gu puta. Mbwenye muhiyana apota murwaye, awendaga okana ionihedo yotonyiheda ira ukana mamunaye unanvwelela liye. Akala muhiyana wa mudiye, na liyene ohokana makalelo asakanyeda liye murwaye ira kamuona, kavayele iziwa ira gu mudiye. Ku wonga na makalelo asakanya muhiyana nsisi naye, nari makalelo apota liye murwaye, mutu ovayela iziwa ira muhiyanola goteliwa, owu hehi gu puta, owu hehi gu mudiye. Eto zela alombwana, mwilamboni mwa Korinto wanle, mulombwana akana nsisi nolapa, nsisi naye nne nomunyaswiha. Navwa mazu a 1 Korinto 11:2-16, inakala nnga muwari mwa ahiyana omuroromela Yesu kafwanyeya Korinto, amohiwa kaumbuwela ira hiyo nili muUmweneni mmohive na amamunihu. Hiyo atene nnamuhara Kiristu bahi. Jopota muru kajinna mabasa. Evale Pawulo ohokana mazu awonga liye muwari moakokomeza ahiyanale.

Zela ja nsisi Yokokomeza zela kunela muru

² Miyo nnoutamalelani mwasiwa nyo kamudiwanle jowonga jaga jatene eto munnana hariha mangano dauwandenleni miyo.

³ Mbwenye nnafuna muiziwe ira muru wa mulombwana uli watene gu Kiristu. Muhiyana murwaye gu mamunaye. Eto Kiristu murwaye gu Mulugu.

⁴ Mulombwana uli watene afunaga lobela nari afunaga fiyiheda ja Mulugu, inafwanela alobele eno ahakunenle murwaye. Akunela murwaye, tapulela ira umululuviha murwaye wenno unafwanyeya agali Kiristu.

⁵ Mbwenye muhiyana oteliwa, afunaga lobela nari afunaga fiyiheda ja Mulugu inafwanela akunele murwaye. Ahakunele murwaye, unaoneya nnga muhiyana oinga mpalra, tapulela ira umululuviha murwaye wenno unafwanyeya agali mamunaye.

⁶ Muhiyana wenno unakonda kunela muru, inafwanela agwade nsisi naye. Mbwenye voira kifwanenle ira muhiyana agwade nsisi, owu ainge mpalra, so ili yofwanela akunele muru bahi.

⁷ Mbwenye kifwanenle mulombwana akunele muru, mwasiwa Mulugu umusakannye olingana na liye eto ohomugawelamo undimuwa waye. Mbwenye muhiyana undimuwa waye ukumilena mwa mulombwana.

⁸ Tchoira kahi mulombwana upandutchiwe mwa muhiyana, nari. So mbwenye muhiyana gwapandutchiwe mwa mulombwana.

⁹ Vamohive vevo eto, kahi ira mulombwana apandutchiwe ira akale nkamihedi wa muhiyana. Muhiyana mbwenye gwapandutchiwe ira akale nkamihedi wa mulombwana.

¹⁰ Muwari mwa eno, inafwanela muhiyana oteliwa akayena ionihedo yotonyiheda ira unatongiwa na mamunaye ira na angelrwene kaiziwe ira unotongiwa na mamunaye.

¹¹ Masiki diwongeve eno, muwari mwa Nabwiya ahiyana bofuneya na alombwana eto alombwana bofuneya na ahiyana.

¹² Ineriha, masiki muhiyana upanduwileve mwa mulombwana, malambwala mulombwana unabaliwa mwa muhiyana. Eto fwanyeya ira mulombwana, muhiyana, nari jatene jene jinakuma wa Mulugu.

¹³ Inafwanela muumbuwele pama nyoka inafuna nyo iranavo akala ili pama muhiyana alobele wa Mulugu ahakunenle muru.

¹⁴ Kodi mmirimani mwenyu kamunawanda onelramo ira mulombwana akana nsisi nolapa nnga muhiyana, nnerege munyaswiha?

¹⁵ Mbwenye muhiyana akana nsisi nolapa, nsisi naye nnonfwanela pama. Mwasiwa muhiyana Mulugu uhunvaha nsisi nolapa ira ikale yokunelana murwaye.

¹⁶ Akala ukala mutu mmohi muwari mwa nyo ahanafuna vwa jiwongile miyo ji, inafwanela aiziwe ira romana hiyo anamarumiwa eto zagave makuru matene a atu omuroromela Yesu anno anafwanyeya kagali atu a Mulugu, zela ja nsisi ji hiyo atene kaninna ningano nimohi niwa nahali ningano neni.

Pawulo ohawandela aKorinto makalelo apama odja seya

¹⁷ Miyo dihivwa ira nyo mwagumana, ubure unaira nyo unokwaranya upamiwa. Akala vo mbwenye, miyo kannawanda utamalelani.

¹⁸ Tchoira yengo yoroma nnovwa ira nyo mwagumana nnga nikuru na atu omuroromela Yesu, munagumana muwari mogaweya makuru makuru. Inavwa miyo, nnoona nnga na ibaribari inoireya.

¹⁹ Mwaonamo ira: <<Hiyo nnafuna nigaweye makuru makuru>>, inafwanela musakulremo ira kaoneyege kodi atu a ibaribari bavi eto ahali a ibaribari bavi?

²⁰ Nyo mwafunaga gumana, madjelo munadja nyo kahi seya ya Nabwiya.

²¹ Tchoira mwagumana, kada mutu unadja jaye jikumilena liye vande vaye. Mutu mmohi unokana ndala eto mutu mmohiwa unolrezelra.

²² Kodi nyo iragana eno, kamunna mmavande mofuna nyo dowa ira mwadjelemo? Kodi munaziveliwa apeta afwinyu a nikuru na Mulugu? Kodi munaziveliwa anyaswiha ale kahanna yengo? Nnga diwonge na nyo avi? Kodi dutamaleleni? Vo mbwenye kavali wandeya.

²³ Tchoira Nabwiya ohodiwandela makalelo ong'wa seya, eto dagawandeliwe, miyo malambo a mundulrimu dohouwandelani nyo. Fwanyeya ira mahiyu anne Yesu afunaga gulihiwa, liye otukula pawu,

²⁴ liye mutamalelana Mulugu. Evale liye ohomeya, liye wonga ira: <<Pawu ila ba maningwaga anavelela miyo ira nyo mukale pama. Muiregena eni modiumbuwela miyo vano.>>

²⁵ Na makalelo amohive, kagamanle jantari, Yesu ohotukula kopo, liye wonga ira: <<Kopo ila tchi kopo ya yopangana ixa zela sangiri naga. Vanang'wege nyo kopwela, mung'wege modiumbuwela miyo vano.>>

²⁶ Nona mwadjaga pawu eto mwang'waga kopo, munalaleya ibaribari zela ukwa wa Nabwiya fiyeda siku nnafuna liye za.

²⁷ Nona mutu wenno unatukula pawu ya seya adjaga owu unatukula kopo ya Nabwiya ang'waga na makalelo ohofwanela, ukana mulandu oluluviha maningo na sangiri na Nabwiya.

²⁸ Nona inafwanela mutu arome viing'ana pama vili liye amala adje pawu eto ang'we kopo. Agaviing'anne, aonavo pama, atukule pawu, adje, atukule kopo, ang'we.

²⁹ Tchoira mutu wenno unadja no ng'wa ahaumbuwelaga maningo a Nabwiya, unodja eto unong'wa muwari movitotela tongiwa.

³⁰ Nyo na mwasa oirana jinawonga miyo ji, atu oindjiva muwari mwa nyo munavuta eto munabulela. Eto muwari mwa nyo kohokalawo kagonile gona wa ukwa na mwasa wa ejo.

³¹ Mbwenye nababiha viing'ana mwa ibaribari, kannatongiwa.

³² Mbwenye masiki nitongiwe na Nabwiya, nnatongiwela ira nitchindje makalelo ehu ira nahagwena mulandu vamohi na atu abure anafwanyeya mwilamboni ya vati ila.

³³ Nona abalaga, mwagumana ira mudje seya, muromege dedihana.

³⁴ Akala ukalavo unna ndala, arome dja vande vaye. Mwera eno, muiziwe ira gumana wenyu kunazana tongiwa na Mulugu. Zela jalrembile nyo jahawelihile miyo, nnafuna duwandeleni jinafuna nyo irana dagazile.